Read Imbabura Highland Quichua JOSUÉ 2 Bible Online

JOSUÉ 2 - Imbabura Highland Quichua bible

JOSUÉ 2

¹Nun shuti runapaj churi Josueca, Sitim shuti jichushca pambamandami, pacalla richun, ishcai runacunata pacalla cachashpa, cashna nirca: “Chai llactatapash, Jericó pueblotapash rijsishpa tigramugrichi” nircami. Shina nijpi paicuna rishpaca, culquimanda huainayaj Rahab shuti huarmipaj huasimanmi chayarca. Chaipimi, mingarishpa pacarirca.

²Chaitami, Jericó pueblota jatun mandajman cashna nishpa villanajurca: —Ricui, Israel runacuna cunan tutami, cai llactata pacalla ricungapaj shamushca— ninajurcami.

³Shina villajpimi, Jericó pueblota jatun mandajca, Rahab shuti huarmipajman, cashna nigrichun cacharca: —Cambaj huasiman shamushca runacunata, canllaman llujchi. Paicunaca, tucui llactata pacalla ricungapajmi shamushca— nichunmi cacharca.

⁴Ashtahuangarin chai huarmica, chai ishcai runacunataca pacashpami, cashna nirca: —Ari, shuj runacunaca ñuca huasiman shamurcapashmi. Ashtahuangarin paicuna maimanda cashcatapash, na yacharcanichu.

⁵Ña tutayashcapi pueblo punguta vichanallapimi, caimandaca llujshirca. Paicuna maiman rishcatapash na yachanichu. Ucha calpashpa catishpaca, japigringuichimi— nircami.

⁶Ashtahuangarin chai huarmica, chai ishcai runacunataca, huasi jahuaman vitsiachishpami, lino nishcacunata asha asha huatashpa alichishca ucupi pacashca carca.

⁷Chai runacunaca, Jordán yacuman rina ñanda rishpami, chai yacuta chimbanalla ladocaman catishpa rinajurca. Catishpa rinajuj chai runacuna llujshijhuanmi, pueblo pungutaca vicharca.

⁸Rahab shuti huarmica, paicuna nara puñujpillata, huasi jahua patioman vitsiashpami, cashna nijurca:

⁹—Cangunata ninandapacha manllana, ñucanchi jahuapi shamushcamandami, Mandaj Dios cai llactata cangunaman carashcataca yachani. Cangunata manllashpami, cai llactapi tucui causajcunaca shaijushpa, imata ruraitapash na ushanajun.

¹⁰Egiptomanda canguna llujshimujpi, Puca Cuchata canguna chimbachun, Mandaj Dios chaquichishcatapash uyarcanchimi. Shinallata Jordán yacu chimba ladoman causanajushca amorreocunata jatun mandaj Sehón shuti, Og shuti ishcai runacunata imashna tucuchishcatapash uyarcanchimi.

¹¹Chaita uyashpami, ñucanchi shungupica ninanda shaijushcashna tucurcanchi. Cangunata manllashpami, tucui runacuna ña huañugrinajun. Cangunata Mandaj Taita Diosca, jahua pachapipash, cai pachapipash Taita Diosmi.

¹²Shina cashcamandami cunanga, cangunata Mandaj Diospaj shutipi juramentuchun mañapani: Ñuca taitapaj huasipi causajcunataca, ñuca cangunata llaquishcashnallata llaquipanguichiyari. Chaitaca, chashnapacha canata yachangapajmi, shuj ricuchinaguta ricuchina cahuanguichi.

¹³Shinallata ñuca taitapaj, ñuca mamapaj, ñuca turicunapaj, ñuca ñañacunapaj causaitapash quishpichishunmi. Tucui imalla paicunapaj cashcataca, imatallapash na rurashunllu. Cangunapaj causaitaca, huañunamanda quishpichishunmi nipaichiyari— nijurcami.

¹⁴Shina nijpimi paicunaca, cashna nishpa tigrachinajurca: —Ñucanchimanda, canguna na villashpa upalla cajpica, cangunata huañuchigrijujpipash, ñucanchimi huañushun. Cai llactata ñucanchiman Mandaj Dios carajpi japishpaca, ñucanchica canda llaquishpa, na llullashpami pactachishun— ninajurcami.

¹⁵Rahab shuti huarmi causajuj huasica, pueblo muyundi jatun pirca jahuapimi carca. Chaimandami, paicunataca cabiahuan huatashpa, ventanata uriajuchirca.

¹⁶Chai jipaca, cashnami nirca: —Mascashpa catijcuna cangunahuan ama tuparichun, urcuman richi. Cangunata catijcuna tigramungacaman, quimsa punllata chaipi pacajunguichilla. Chai jipaca, cangunapaj ñanda catishpa ringuichilla— nircami.

¹⁷Shina nijpimi paicunaca, cashna ninajurca: —Ñucanchita can juramentuchijpi ñucanchi juramentushcamandaca, ima llaquitapash na apanami quedashun.

¹⁸Ricui, cai llactaman ñucanchi yaicumujpica, ñucanchita uriajuchishca ventanapi racuta caupushca cai puca puchata huatangui. Cambaj taita mamata, turicunata, cambaj taitapaj familiacunatapash, tucuillata cambaj huasipi tandachingui.

¹⁹Cambaj huasimanda maijambash llujshijpi huañuchijpica, paipaj yahuarca paipaj jahuallatami canga. Ñucanchica, na juchachi tucushunllu. Ashtahuangarin maijambash cambaj huasipi cajpita maquihuan huañuchijpica, chai huañujpaj yahuarca ñucanchi jahuami canga.

²⁰Can ñucanchimanda imatapash villajpica, ñucanchita juramentuchishcata na pactachishpapash, ima llaquitapash na apashunllu— ninajurcami.

²¹Shina nijpimi, Rahab shuti huarmica: —Canguna nishcashnallatami pactachisha— nirca. Shina nishca jipaca, shuj punllacaman nishpa cachajpimi, chai runacunaca rinajurca. Chai jipami chai huarmica, racuta caupushca puca puchata ventanapi huatarca.

²²Paicunaca, chaimanda rishpa urcuman chayashpami, paicunata mascajcuna tigramungacaman quimsa punllata pacajushpa tianajurca. Paicunata mascajcunaca, tucuilla ñangunata mascashpapash, na tarishpami tigranajurca.

²³Chai jipami, chai ishcai runacunaca, urcumanda uriajushpa, Jordán yacuta chimbashpa, Nun shuti runapaj churi Josuepajman tigramurca. Shina tigramushpami, paicuna ima tucushcatapash tucuita parlanajurca.

²⁴Cashnami Josueman ninajurca: “Mandaj Diosca, chai tucui llactatami ñucanchi maquipi churashca. Chai llactapi tucui causajcunaca, ninanda shaijushcashnami ñucanchi ñaupajpica tucunajun” ninajurcami.