Read Imbabura Highland Quichua JOSUÉ 20 Bible Online

JOSUÉ 20 - Imbabura Highland Quichua bible

JOSUÉ 20

¹Mandaj Diosca, Josuetaca cashna nishpami mandarca:

²“Israelcunataca cashna nishpa mandai: Pacajuna pueblocunata agllaichi. Chaicunataca, Moisestami cangunaman villachun mandarcani.

³Maijan cashpapash napash huañuchina yuyaihuan cashpata, cungashcapi huañuchij runaca, chaipimi pacajunga. Chai puebloca, huañuchishpa yahuarta jichashcamanda randi huañuchigrijujpi, pacajungapajmi canga.

⁴Chai huañuchij runaca, chai agllashca maijan pueblocunapi pacajugrishpapash, chai puebloman yaicuna pungumanmi chayanga. Chaiman chayashpaca, mandaj rucucunamanmi, imamanda pacajushpa purijujtapash villanga. Chashna villajpimi paicunaca, chai pueblo ucuman pushashpa, chaipi paicunahuan causanata cunga.

⁵Huañuchishcamanda randi huañuchingapaj catij runa chaiman chayajpica, na paipaj maquipi churangachu. Paica, cungashcapimi paipaj cumbataca huañuchishcanga. Paihuanga, ashallatapash na fiñajushcachu cashcanga.

⁶Pacajushpa purijuj runaca, chaipi tucui tandanajushcacunapaj ñaupajpi tapuchingacamanmi, chai pueblopillata shuyanga. Shinallata chai punllacunapi, curacunata mandajuj cura huañungacamanmi, chai pueblopillata causajunga. Chai jipaca, huañuchij runaca maijan llactamanda pacajushpa rishca cashpapash, chai llactapi paipaj huasimanllata tigranallami” nijurcami.

⁷Shina nijpimi, paicunaca cai pueblocunata agllanajurca: Neftalí aillupaj urcupi Galilea llactapica, Cedes shuti pueblota, Efraín aillupaj urcupica, Siquem shuti pueblota, Judá aillupaj urcupica, Quiriat-arba nishca Hebrón shuti pueblotami agllanajurca.

⁸Jordán yacu chimba ladoman Jericó pueblomanda, indi llujshimuj ladomambash, cai pueblocunatami agllanajurca: Rubén aillupaj jatun pambapica, jichushca pambapi tiaj Beser shuti pueblotami agllanajurca. Gad shuti aillupaj Galaad llactapica, Ramot shuti pueblota, Manasés aillupaj Basán llactapica, Golán shuti pueblotami agllanajurca.

⁹Tucui israelcunamambash, paicunahuan causanajuj na israelcunamambash agllashca pueblocunaca, chaicunami carca. Maijambash cungashcapi huañuchishca cashpaca chaipi pacajuchunmi, chashna agllanajurca. Tandanajushcacunapaj ñaupajpi nara tapuchijpillata, randi huañuchingapaj munaj runapaj maquipi ama huañuchi tucuchunmi, chashna agllanajurca.