Read Imbabura Highland Quichua JOSUÉ 3 Bible Online

JOSUÉ 3 - Imbabura Highland Quichua bible

JOSUÉ 3

¹Josueca, chai cayandi tutamandata jatarishpami, Sitim shuti pambamanda llujshishpa paipash, tucuilla israelcunapash, Jordán yacu ladoman chayarca. Paicunaca, yacuta nara chimbashpallatami samanajurca.

²Ña quimsa punlla jipami, israelcunata mandajcunaca carpacunata shayachishca chaupicunata purishpa,

³gentecunata cashna nishpa mandanajurca: “Cangunata Mandaj Taita Dioshuan ari ninajushpa escribishcata alichishca arcataca, levita curacunami huandushpa rinajunga. Shina ricushpaca, canguna tianajushca pushtumanda llujshishpa, paicunata catishpa ringuichilla.

⁴Shina catishpami, canguna maitalla rinatapash yachanguichi. Cangunaca, cai ñandaca nara purishcachu canguichi. Ashtahuangarin Diospaj arcamandaca, iscun patsaj metro caruta catishpa ringuichi. Cangunaca, na yapata chai arca ladoman quimirinachu canguichi” ninajurcami.

⁵Josuepash, israelcunataca cashnami nirca: “Diospajlla tucunami canguichi. Mandaj Diosca, cayami canguna purapica, juyaillacunata rurashpa ricuchinga” nircami.

⁶Curacunatapashmi, Josueca cashna nirca: “Dioshuan ari ninajushpa escribishcata alichishca arcata huandushpa, israelcunata ñaupashpa richi” nircami. Shina nijpimi paicunaca, Diospaj arcata huandushpa, gentecunata ñaupashpa rinajurca.

⁷Shinamandami Mandaj Diosca, Josuetaca cashna nirca: “Cunan punllamandapachami candaca, tucui israelcunapaj ñaupajpi jatunyachigrini. Moiseshuan imashna cashcashnallata, canhuambash cajta yachachunmi, shina ruragrini.

⁸Ñucahuan ari ninajushpa escribishcata alichishca arcata huandushpa rinajuj curacunataca: ‘Jordán yacuman chayashpaca, chaupi yacupi shayaringuichi’ nishpa mandangui” nircami.

⁹Shina nijpimi Josueca, israelcunata cashna nirca: “Cangunata Mandaj Taita Dios rimashca shimita uyangapaj quimirimuichi” nircami.

¹⁰Josueca, ashtahuan cashnatapash nircarami: “Cangunaca caita ricushpami, causajuj Taita Dios cangunapaj chaupipi cajtaca yachanguichi. Paimi cananeo, heteo, heveo, ferezeo, gergeseo, amorreo, jebuseo nishca gentecunataca, cangunapaj ñaupajmanda llujchishpa cachanga.

¹¹Ricuichi, tucui cai pachata mandaj Jatun Dioshuan ari ninajushpa escribishcata alichishca arcataca, cangunata ñaupashpami, Jordán yacu chaupiman apanga.

¹²Cunanga, Israel aillucunamanda chunga ishcai runacunata agllaichi. Paicunaca, cada aillumanda shujllami canga.

¹³Tucui cai pachata Mandaj, Jatun Dioshuan ari ninajushpa escribishcata alichishca arcata huandushpa rinajuj curacuna, Jordán yacupi sarujpica, chai yacuca shicanyaringallami. Janajmanda shamujuj yacuca, mundunarishpami jarcaringa” nijurcami.

¹⁴Shina nijpimi israelcunaca, Jordán yacuta chimbangapaj paicunapaj carpacunamanda llujshishpa rinajurca. Dioshuan ari ninajushpa escribishcata alichishca arcata huandunajuj curacunami, paicunata ñaupashpa rinajurca.

¹⁵(Jordán yacuca, cozecha punllacunapica, tucui lado manñamanmi jicharin carca). Chaimandami, Diospaj arcata huandujcuna, Jordán yacuman yaicujpica, chai arcata huandushpa rinajuj curacunapaj chaquicunaca yacu manñapillata mutiyarca.

¹⁶Janajmanda shamujuj yacuca, Saretán shuti pueblo ladopi tiaj Adam shuti pueblomanda ashtaca carupimi, mundunarishpa jarcarirca. Shinamandami, Arabá shuti pambapi Cachi tiaj Cuchacaman rijuj yacuca, chaupirishpa tucurirca. Shina tucujpimi israelcunaca, Jericó puebloman chimbanajurca.

¹⁷Ashtahuangarin Mandaj Dioshuan ari ninajushpa escribishcata alichishca arcata huandushpa rinajuj curacunaca, Jordán yacu chaquishca chaupipimi, shinlli shayanajurca. Paicunaca, tucuilla gentecuna chimbangacamanmi shayanajurca. Israelcunaca, tucuillami Jordán yacu chaquishcata chimbanajurca.