Read Imbabura Highland Quichua JOSUÉ 4 Bible Online

JOSUÉ 4 - Imbabura Highland Quichua bible

JOSUÉ 4

¹Tucuilla israelcuna Jordán yacuta chimbashca jipaca, Josuetaca cashna nishpami, Mandaj Diosca mandarca:

²“Chunga ishcai Israel aillucunamandaca, cada aillumanda shuj runata agllashpa,

³cashna nishpa mandai: ‘Jordán yacu chaquishca chaupipi shinlli shayanajuj curacunapaj ladomanda, chunga ishcai rumicunata apashpa yalinguichi. Chai rumicunataca, canguna maipimi tuta samana canguichi, chaipi shayachinguichi’ nishpa mandai” nircami.

⁴Shina nijpimi Josueca, chunga ishcai Israel aillu puramanda, pai agllashca chunga ishcai runacunata cayarca. Paicunataca, cada aillumanda shujtallami agllashca carca.

⁵Josueca, cashna nishpami mandarca: “Cangunata Mandaj Taita Diospaj arcata ñaupashpa, Jordán huaicu chaupiman richi. Chaimandaca, taita Israelpaj chunga ishcai churicunapaj mirai aillucuna mashna cashcashnallata, cangunaca rumita shujgu shujgu japishpa, rigra jahuapi apaichi.

⁶Chai rumicunaca, canguna purapica shuj ricuchinami canga. Jipa punllacunapi cangunapaj miraicuna: ‘Cai rumicunaca, ¿imatata ricuchin?’ nishpa, taitacunata tapujpica,

⁷cashna nishpa tigrachinguichi: ‘Mandaj Dioshuan ari ninajushpa escribishcata alichishca arcata apashpa yalichunmi, Jordán yacuca ishcandi ladoman shicanyarirca. Chai arcata apashpa Jordán yacuta yalinajujpimi, chai yacuca caiman chaiman shicanyarirca’ ninguichi. Chai mundunashca rumicunaca, israelcuna tucui causaipi tandanajushpa yarinajuchunmi canga” nircami.

⁸Josué mandashcashnallatami, israelcunaca ruranajurca. Mandaj Dios imashna Josueta mandashcashnallatami, Israel aillucuna mashna cashcashnallata, Jordán huaicu chaupimanda, chunga ishcai rumicunata japinajurca. Chai rumicunataca, paicuna carpacunata shayachina pushtucaman apashpami, chaipi shayachinajurca.

⁹Shinallata Josuepash, Jordán huaicu chaupipica, chunga ishcai rumicunatami shayachirca. Chai rumicunataca, Dioshuan ari ninajushpa escribishcata alichishca arcata huandushpa rinajuj curacuna shayanajushca pushtupimi shayachirca. Chai rumicunaca, cunangamanmi chaipillata.

¹⁰Chai arcata huandushpa rinajuj curacunaca, mandashcata gentecunaman villangui nishpa, Mandaj Dios imashna Josueta mandashcashnallata rurangacamanmi, Jordán huaicu chaupipi shayanajurcalla. Moisés imashna Josueta mandashcashnallatami, tucuita ruranajurca. Israelcunaca, Jordán huaicutaca uchami chimbanajurca.

¹¹Tucuilla israelcuna ña chimbajpica, curacunapashmi israelcuna ricujta, Mandaj Diospaj arcahuan chimbarca.

¹²Shinallata Rubenbaj, Gadpaj aillu runacunapash, Manasespaj chaupi aillu runacunapashmi, Moisés mandashcashnallata, macanajunacunata apashca, caishuj israelcunata ñaupashpa chimbanajurca.

¹³Macanajungapaj alichirishcalla runacunaca, chuscu chunga huarangashnami carca. Paicunaca macanajunacunandimi, Jericó pueblo ladolla pambaman Mandaj Diospaj ñaupajman chimbanajurca.

¹⁴Chai punllami Mandaj Diosca, tucui israelcuna ricujta Josuetaca, ninanda jatunyachirca. Chaita ricushpami israelcunaca Josuetaca, Moisesta manllashcashnallata paipaj tucui causaipi manllanajurca.

¹⁵Chai jipami Mandaj Diosca, Josueta cashna nishpa mandarca:

¹⁶“Ñuca escribichishca shimicunata alichishca arcata huandushpa rinajuj curacunataca, Jordán huaicumanda llujshichun mandai” nircami.

¹⁷Shina nijpimi Josueca, curacunataca: “Jordán huaicumanda llujshimuichilla” nirca.

¹⁸Mandaj Dioshuan ari ninajushpa escribishcata alichishca arcata huandushpa rinajuj curacuna, Jordán huaicumanda llujshijhuanmi, cashna tucurca: Paicuna llujshishpa, chaquishca alpapi sarujhuanmi, Jordán yacuca punda imashna cashcashnallata, ishcandi manñacaman jundashpa rijurca.

¹⁹Israelcunaca, punda quillapaj chunga punllapimi, Jordán yacuta chimbashpa, Gilgal shuti pueblo lado pambapi carpacunata shayachishpa tianajurca. Gilgal shuti puebloca, Jericó pueblomandaca indi llujshimuj ladomanmi.

²⁰Gilgal shuti pueblopimi Josueca, Jordán huaicumanda apamushca chunga ishcai rumicunataca shayachirca.

²¹Chaipimi Josueca, israelcunata cashna nirca: “Jipa punllacuna cangunapaj miraicuna: ‘Cai rumicunaca, ¿imatata ricuchin?’ nishpa, taitacunata tapujpica,

²²cashna ninguichi: ‘Jordán huaicutami, israelcunaca chaquishca alpata chimbarca.

²³Cangunata Mandaj Taita Diosca, canguna chimbangacamanmi Jordán yacutaca, canguna ricujta chaquichirca. Pundapash, cangunata Mandaj Taita Diosca, ñucanchi chimbangacamanmi, Puca Cuchataca chashnallata chaquichirca.

²⁴Cai pachapi causanajuj tucui gentecunaca, Mandaj Diostaca ninan ushaita charijta yachachunmi, chashna rurarca. Shinallata cangunapash, cangunata Mandaj Taita Diosta tucui causaipi manllashpa causachunmi, chashna rurarca’ nishpa villanguichi” nijurcami.