Read Imbabura Highland Quichua JOSUÉ 6 Bible Online

JOSUÉ 6 - Imbabura Highland Quichua bible

JOSUÉ 6

¹Cunanga, Jericó pueblopi causajcunaca, israelcunata manllashpami, chai puebloman yaicuna pungutaca, alipacha vichashca carca. Chaimandami llujshitapash, yaicuitapash pipash na usharca.

²Ashtahuangarin Mandaj Diosca, Josuetaca cashnami nirca: “Ricui, Jericó pueblopi causajcunataca, paicunata jatun mandajtapash, macanajunata ali yachaj soldadocunatapashmi, cambaj maquipi churarcani.

³Chaimandami cai pueblotaca, macanajunata ali yachaj tucuilla soldadocunahuan muyuna canguichi. Punllapi shujtalla rishpami, muyuna canguichi. Sucta punllacamanmi, chashna rurana canguichi.

⁴Canchis curacunaca, jari llamacunapaj canchis cachucunata apashpami, Diospaj arcata ñaupashpa ringa. Canchis punlla tucujpica, canchiscamanmi chai pueblota muyuna canguichi. Curacunaca cachutami huacachinajunga.

⁵Jari llamapaj cachuta ña unaillata huacachinajujpica, chai cachuta huacachijta uyashcandimi, tucuilla gentecuna ninanda caparinga. Shina caparijpica, chai pueblo pircapash urmangallami. Ña urmajpica, tucuicunami ñaupajman vichai ringa” nircami.

⁶Shina nijpimi, Nun shuti runapaj churi Josueca, curacunata cayashpa cashna nirca: “Dioshuan ari ninajushpa escribishcata alichishca arcata apaichi. Shuj canchis curacunaca, jari llamapaj cachuta apashpa, Mandaj Diospaj arcata ñaupashpa ringuichi” nircami.

⁷Israelcunatapash, cashnami nirca: “Caita yalishpa, pueblota muyuichi. Macanajungapaj alichirishcalla rinajuj runacunaca, Mandaj Diospaj arca ñaupajpimi ringa” nircami.

⁸Gentecunata Josué chashna nijhuanmi, canchis curacunaca jari llamacunapaj canchis cachucunata apashpa, Mandaj Diospaj arcata ñaupashpa rinajurca. Paicunaca, chai cachucunata huacachishpami rinajurca. Mandaj Dioshuan ari ninajushpa escribishcata alichishca arcata huandushpa rinajuj curacunaca, catishpami rinajurca.

⁹Macanajungapaj alichirishcalla runacunaca, cachuta huacachishpa rinajuj curacunata ñaupashpami rinajurca. Cuidashpa huashata catij runacunaca, na samashpa cachucunata huacachinajujpimi, Diospaj arcata cuidashpa catinajurca.

¹⁰Josueca, gentecunataca cashnami nirca: “Cangunaca, na caparinachu canguichi. Cangunapaj rimashcallapash, ama uyarichun. Shinallata rimaitapash na rimashpa, upalla rinajunguichilla. Ñuca: ‘Caparichi’ nishpa mandana punlla chayangacaman shuyanguichilla. Ñuca mandajpilla caparinguichi” nircami.

¹¹Shinami Josueca, Mandaj Diospaj arcahuanga, chai pueblo muyundita shuj viajella muyuchirca. Chai jipaca, paicunapaj carpacunamanllata tigrashpami, chaipi pacarinajurca.

¹²Cayandi punllapaca, tutamandata Josué jatarijpimi, curacunapash Mandaj Diospaj arcata huandunajurca.

¹³Jari llamacunapaj canchis cachucunata apanajuj canchis curacunaca, Mandaj Diospaj arcata ñaupashpami rinajurca. Paicunaca cachuta huacachishpami, na samashpa ñaupanajurca. Macanajungapaj alichirishcalla rinajuj runacunaca, ñaupashpami rinajurca. Cuidashpa huashata catinajuj runacunaca, na samashpa cachucunata huacachinajujpimi, Mandaj Diospaj arcata cuidashpa catinajurca.

¹⁴Chashnami, cati punllapash punda punllashnallata, chai pueblota muyushpaca, paicunapaj carpacunamanllata tigranajurca. Sucta punllacamanmi, chashna muyunajurca.

¹⁵Canchis punlla tucujpica, narapash ali punllayajpillata jatarishpami, pundashnallata chai pueblotaca canchiscaman muyunajurca. Chai punllapillami, canchiscaman chai pueblotaca muyunajurca.

¹⁶Canchis viajeta cachuta curacuna huacachijpimi Josueca, israelcunata cashna nirca: “Caparichi, cai pueblotaca Mandaj Diosmi ñucanchiman curca.

¹⁷Mandaj Diosca, cai pueblopi causajcunataca, tucui chaipi imalla tiajcunandi tucuchingapajmi shicanyachishca. Culquimanda huainayashpa causaj Rahab shuti huarmillami, paipaj huasipi paihuan tiajcunandi, na huañuchi tucunga. Pacalla ricuchun ñucanchi cachashca runacunata pacashcamandami, na huañuchi tucunga.

¹⁸Ashtahuangarin cangunaca, Dios tucuchingapaj shicanyachishcataca, imatapash na japinachu canguichi. Chaicunataca, tacaritallapash na tacarishpa, imatallapash na japinachu canguichi. Chaita japishpara, israelcunapaj carpacunataca Dios tucuchingapaj shicanyachishcatashna ruranguichiman. Shina rurashpaca pandachinguichimi.

¹⁹Ashtahuangarin tucui culquipash, oropash, shinallata broncemanda, jirrumanda rurashca imalla charishcacunapash, Mandaj Diospaj cachun. Mandaj Diospaj ucupi imapash ninan valishcacunata alichishcapillata churanguichi” nircami.

²⁰Shina nijpimi, israelcunaca ninanda caparinajurca, curacunapash cachutami huacachinajurca. Chaipimi, cashna tucurca: Israelcunaca, cachuta huacachijta uyashpami, ashtahuan ninandapacha caparinajurca. Shina caparijpica, chai jatun pircapash urmarcallami. Chai jipami israelcunaca, tucuilla ñaupajman vichai rishpa, chai pueblota japinajurca.

²¹Chai puebloman yaicushpaca, chaipi tucui imalla tiashcatami, espadahuan chugrichishpa tucuchinajurca. Jaricunata, huarmicunata, chairalla viñaicunata, rucucunatapashmi tucuchinajurca. Shinallata huagracunacaman, llamacunacaman, burrocunacamanmi tucuchinajurca.

²²Ashtahuangarin Josueca, chai llactata rijsingapaj rishca ishcai runacunataca, cashnami nirca: “Culquimanda huainayaj huarmipaj huasiman yaicugrichi. Chaiman yaicushpaca, canguna paiman juramentushcashnallata, chai huarmitapash, paipaj huasi ucu puratapash, tucuillata llujchimugrichi” nircami.

²³Shina nijpimi chai runacunaca, Rahab shuti huarmipaj huasiman yaicushpa paitapash, paipaj taitatapash, mamatapash, turicunatapash, paipaj huasipi tucui imalla tiashcacunatapash llujchirca. Shinallata tucui paipaj huasi ucu puratapashmi llujchirca. Paicunata llujchishpaca, israelcunapaj carpacunamanda carumanmi churarca.

²⁴Chai jipaca, chai pueblotapash, chaipi tucui imalla tiajcunatapash rupachishpami tucuchirca. Culquita, orota, shinallata broncemanda, jirrumanda imacunatalla rurashcataca llujchishpami, Mandaj Diospaj huasi ucupi imapash ninan valishcacunata alichinapillata churarca.

²⁵Ashtahuangarin Josueca, culquimanda huainayaj Rahab shuti huarmita, paipaj taitapaj huasi ucu purata, tucui imatalla pai charishcacunatallami quishpichirca. Chaimandami Rahab shuti huarmica, cunangaman israelcunahuan causajun. Jericó pueblota rijsichun Josué cachashca runacunata pacashcamandami, chashna quishpichirca.

²⁶Chai punllacunapimi Josueca, cashna nishpa juramenturca: “Jericó pueblota shayachishpa cutin alichij runaca, Mandaj Diospaj ñaupajpica, ninanda nalicachi tucushca cachun. Cai pueblo muyundi pircata alichi callarijpica, paipaj punda churi huañushca cachun. Cai pueblomanda yaicuna punguta shayachijpica, jipa churi huañushca cachun” nircami.

²⁷Mandaj Diosca, Josuehuanmi carca. Chaimandami Josuepaj shutitaca, tucui llactapi rijsinajurca.