Read Imbabura Highland Quichua JOSUÉ 7 Bible Online

JOSUÉ 7 - Imbabura Highland Quichua bible

JOSUÉ 7

¹Ashtahuangarin israelcunaca, tucuchingapaj Dios shicanyachishcata, yachashpatami na cazushpa japinajurca. Judá aillu puramanda Acán shuti runami, tucuchingapaj Dios shicanyachishcataca, pacalla japirca. Chaimandami Mandaj Diosca, israelcunahuanga nina japirinshna ninandapacha fiñarirca. Acán shuti runaca, Carmi shuti runapaj churimi carca. Carmi shuti runaca, Zabdi shuti runapaj churimi carca. Zabdi shuti runaca, Zera shuti runapaj churimi carca.

²Chai jipami Josueca, Jericó pueblomandaca, Hai shuti puebloman huaquin runacunata cacharca. Chai puebloca, Bet-el shuti pueblomanda indi llujshimuj ladoman tiaj Bet-avén shuti pueblo ladollapimi. Paicunataca, cashnami nirca: “Chai llactaman vichai rishpa rijsinguichi” nijpi vichai rishpami, Hai shuti pueblota rijsinajurca.

³Ña chaimanda Josuepajman tigramushpami, cashna ninajurca: “Hai shuti pueblopi causajcunaca huaquinllami. Ama yanga chaiman tucuillacunata pushashpa shaijuchipaichu. Ashtahuangarin ishcai huarangashna, na cashpaca quimsa huarangashna runacunatalla vichai cachapai. Chai pueblotaca, paicunallata japingallami” ninajurcami.

⁴Shina nijpimi Israel puramandaca, quimsa huarangashna runacunalla rinajurca. Paicunaca, Hai shuti pueblopi causajcunapaj ñaupajmandaca, pacajungapajmi calpanajurca.

⁵Hai shuti pueblopi causajcunaca, Israel purataca quimsa chunga sucta runacunatami huañuchirca. Chai pueblo pungumandaca, Sebarim shuti pambacaman catishpami, urai rina ñambi misharca. Chaimandami israelcunapaj shungupica, ña huañungashna tucushpa, yanga yacushna tucunajurca.

⁶Shinamandami Josueca, ninanda llaquirishpa, pai churajushcacunata liquishpa, Mandaj Diospaj arca ñaupajpi alpaman chayajta cumurishpa chishajurca. Paipash, israelcunata mandaj rucucunapashmi, ñutu alpata umapi churarinajurca.

⁷Chaipimi Josueca, cashna nijurca: —¡Aij, Mandaj Jatun Dioslla! ¿Imapajta cai gentecunataca, Jordán yacuta chimbachimurcangui? ¿Ñucanchita tucuchinajuchun, amorreocunapaj maquipi churangapajchu chimbachimurcangui? ¡Jordán yacu chimba ladopillata quedashpachari, ali canchiman carca!

⁸¡Aij, Jatun Dioslla! Israelcunaca, paicunata fiñajcuna mishajpimi tigramushca. Paicunataca, ¿imatata nipashayari?

⁹Cashna tucushcata cananeocunapash, cai llactapi tucui causajcunapash yachashpaca, ñucanchita chaupipi churashpami, ñucanchi shutitapash cai pachamanda chingachinga. Chashna rurajpica, ¿cambaj jatun shutitaca, imashnanguishi?— nijurcami.

¹⁰Shina nijpimi Mandaj Diosca, Josuetaca cashna nijurca: —Jatari. ¿Imashpata alpaman chayajta cumuriajungui?

¹¹Israelcunami juchata rurashca. Paicunaca, ñucahuan ari ninajushcata pactachinajuchun ñuca mandashcatami na cazushca. Ñuca tucuchingapaj shicanyachishcata japishpa shuhuashpami llullashca. Chai apashcataca, paicuna charishcacunahuanmi alichinajushca.

¹²Chaimandami israelcunaca, paicunata fiñajcunahuan macanajuitaca, na ushanga. Ashtahuangarin paicunata fiñajcunata manllashpami tigranajunga. Paicunapash, ñuca tucuchingapajmi shicanyachi tucushca. Shina cashcamanda, ñuca tucuchingapaj shicanyachishcata cangunapaj chaupimanda na anchuchijpica, ñucapash na ashtahuan cangunahuan cashachu.

¹³Jatari, israelcunataca Diospajlla cachun rurashpa, cashna ni: ‘Cayapaca, Diospajlla tucuichi. Israelcunata Mandaj Taita Diosmi, cashna nin: Israelcunalla, canguna purapica ñuca tucuchingapaj shicanyachishcami tiajun. Ñuca tucuchingapaj shicanyachishcata cangunapaj chaupimanda na anchuchishpaca, cangunata fiñajcunahuan macanajuitaca, na ushanachu canguichi.

¹⁴Cayapaca, cangunapaj aillu puralla tandanajunguichi. Maijan ailluta cashpapash, Mandaj Dios ñuca cayajpica, chai aillupaj familiacuna imashna cashcashnallata shamuchun. Chai familiacunamanda maijandapash Mandaj Dios ñuca cayajpica, chai huasi ucu puracuna shamuchun. Chai huasi ucu puramanda imashna cashcashnallata maijandapash Mandaj Dios ñuca cayajpica, jaricuna imashna tandanajushcashnallata shamuchun.

¹⁵Chaipica, ñuca tucuchingapaj shicanyachishcata maijambash shuhuashca cashpa japi tucushpaca, tucui imatalla pai charishcacunandimi rupachi tucunga. Paicunaca, Mandaj Dioshuan ari ninajushcata faquishpami, Israel puracunapi nalita rurashca’ ni— nijurcami.

¹⁶Shina nijpimi Josueca, cayandi tutamandata jatarishpa israelcunataca, paicunapaj aillucuna imashna cashcashnallata tandachirca. Chaipica, Judá aillumi japi tucurca.

¹⁷Judá ailluta cayajpica, Zera shuti runapaj familia purami japi tucurca. Chai jipaca, Zera shuti runapaj familiamanda jaricuna imashna tandanajushcashnallata cayajpica, Zabdi shuti runapaj huasi ucu purami japi tucurca.

¹⁸Paicunapaj huasi ucupura jaricuna imashna tandanajushcashnallata cayajpica, Carmi shuti runapaj churi Acán shuti runami japi tucurca. Carmi shuti runaca, Zabdi shuti runapaj churimi carca. Zabdi shuti runaca, Zera shuti runapaj churimi carca. Paica, Judá aillu purami carca.

¹⁹Chaimandami Acán shuti runataca, Josueca cashna nirca: —Ñuca huahualla, israelcunata Mandaj Taita Diostaca, punchapambagumi cangui nishpa alicachishpa, can imata rurashca cashpapash, ama pacashpa cunanga villahuailla— nircami.

²⁰Shina nijpimi Acán shuti runaca, Josueman cashna nishpa tigrachirca: —Na pacai ushapanichu. Israelcunata Mandaj Taita Diospaj ñaupajpica, juchatami rurapashcani. Chaitaca, cashnami rurarcani:

²¹Tucui imatalla japishpa tandachinacunapica, Babilonia llactamanda juyailla jatun churajunatami ricurcani. Shinallata ischai kilo chaupitashna pezaj culquitapash, chaupi kilo yalita pezaj barra orotapashmi ricurcani. Shina ricushpami, chaicunata ninanda munashpa, pacalla japishpa apamurcani. Chaicunaca, ñuca carpa chaupi ucupimi, alpa ucupi pacashca tiajun. Culquitapash, chai ucupillatami churarcani— nircami.

²²Shina nijpimi Josueca, villashpa purij runacunata cacharca. Paicunami, Acán shuti runapaj carpaman calpashpa rishpa, paipaj carpa ucupi pacashcata japirca. Culquitapash, chai ucupillata pacashcatami japirca.

²³Carpa ucu chaupipi pambashcata japishpaca Josuepajman, israelcunapajmanmi apamurca. Shina apamushpami, Mandaj Diospaj ñaupajpi churarca.

²⁴Chai jipami Josueca, tucui israelcunandi tandanajushpa, Zera shuti runapaj churi Acán runata japishpa, pai shuhuashca culquindi, jatun churajunandi, barra orondi, paipaj churicunandi, ushicunandi, huagracunandi, llamacunandi, burrocunandi, paipaj carpandi, tucui pai imatalla charishcandi, Acor shuti pugru pambaman tucuillata apanajurca.

²⁵Chaipimi Josueca, Acán runataca cashna nirca: —¿Imashpata ñucanchita cashna llaquipi churarcangui? Cunanga, candapash Mandaj Dios llaquichijuchun— nircami. Shinallata tucui israelcunami, rumicunahuan huañuchirca. Shina huañuchishca jipaca, tucui imatalla charishcacunandimi rupachinajurca.

²⁶Chai rupachishca jahuapica, ashtaca rumicunatami mundunarca. Chai mundunga, cunangamanmi tiajun. Chashna rurajpimi Mandaj Diosca, pai ninanda fiñarishcamandaca ali tucurca. Shinamandami chai pugru pambataca, cunangaman Acor shuti Pamba ninajun.