Read Imbabura Highland Quichua 2 TESALONICENSES 2 Bible Online

2 TESALONICENSES 2 - Imbabura Highland Quichua bible

2 TESALONICENSES 2

¹Huauquicuna, panicuna, ñucanchica ñucanchi Apunchi Jesucristo shamujpi, paihuan tandanajungapaj rinatami shuyanajunchi. Shina cashpami, cashna nipanchi:

²Canguna aliguta yarinajushcataca, na ñapash cunganachu canguichi. Diospaj Espituhuanmi villajuni nijpipash, imata parlashca shimita uyashpapash, ñucanchi cachamujpishna cartata cachamujpipash, na pandarinachu canguichi. Apunchi Jesús shamuna punlla chayamujunmi nijpipash, na pandarinachu canguichi.

³Cangunataca, pipash imashnallapash ama umachijuchun, Jesús shamuna punlla nara chayamujpillatami, Diosta crinata saquishpa, fiñashpa causanajunga. Shinallata chingaita chingangapaj rinapachami ni tucushca, juchatalla ruraj runapashmi punda shamunga.

⁴Chai runami, Taita Diostapash, Diosta mañangapaj ima tiajcunatapash, na ricunayachishpa ninanda fiñanga. Chashna rurashpaca, Taita Diosmi cani nishpami, Taita Dios tucushpa, Taita Diospaj huasipi tiaringa.

⁵Cangunahuan cashpa ñuca chashna villashcataca, ¿nachu yaringuichi?

⁶Cunanga, chai runata ima jarcariajujtapash, ñami yachanguichi. Pai shamuna punlla chayajpica, shamungallami.

⁷Pacalla tiajuj chai nalita rurachijujca, ñami nalita rurachijun. Ashtahuangarin cunambi paita jarcariajujta anchuchingacamanmi, chashna shuyajun.

⁸Shina anchuchishca jipami, chai jatun nalita ruraj runaca ricurimunga. Chai runataca, Apunchi Jesusmi paipaj shimimanda llujshijuj Espirituhuan huañuchinga. Punchapamba pai shamushpami tucuchinga.

⁹Chai jatun nalita ruraj runaca, Satanás cachamujpimi shamunga. Chai runaca, ninan ushaita charishpami, pipash na rurai ushanallacunata rurashpa ricuchinga, jatun manllarinacunatapash llullashpami rurajunga.

¹⁰Umachishpami paica, imatapash nalitalla rurashpa ricuchinga. Chingaita chingangapaj rinajuj gentecunatami crichinga. Na llullashpa, juyaimanda villajuj Shimitaca, paicuna quishpirichun villajpipash, na chasquishcamandami, chashnaca tucunga.

¹¹Shinamandami Taita Diosca, llullatara crichun, umashpa crichina ushaita cachamunga.

¹²Na llullashpa villajuj Shimita na crishcamanda ninanda llaquichi tucuchunmi, chashna cachamunga. Paicunaca, imatapash cashcatapacha na rurashpami, cushijushpa causanajurca.

¹³Apunchi Jesús juyashca crijcuna, cangunamandaca Taita Diosta punllandi pashi ninajunallami canchi. Taita Diosmi, cai pachata nara rurashpallata, cangunata quishpichingapaj agllarca. Cangunataca, Diospaj Espiritullata Diospajlla causachun rurashcamanda, na llullashpa villajuj Shimita crishcamandami, shina agllarca.

¹⁴Ali villaita ñucanchi villajpimi, ñucanchi Apunchi Jesucristo punchapamba tiajuj llactapi canguna causagrichunga, Dios cayarca.

¹⁵Huauquicuna, panicuna, shinamandami cangunaman villashpa, na cashpaca cartapi escribishpa, ñucanchi imata yachachishcatapash na cungashpa, aliguta shinllipacha catina canguichi.

¹⁶Ñucanchi Apunchi Jesucristopash, ñucanchi Taita Diospash, ninanda juyashpami, causaita causaicaman cushijushpa causanataca aliguta yariashpa shuyanajuchun, ñucanchiman carashca.

¹⁷Imata parlashpapash aliguta parlashpa, imata cashpapash aliguta rurashpa catichunmi, Diostaca cangunapaj shungupi aligutapacha yarichipai nishpa mañanajunchi.