Read Imbabura Highland Quichua 1 TIMOTEO 2 Bible Online

1 TIMOTEO 2 - Imbabura Highland Quichua bible

1 TIMOTEO 2

¹Tucuimanda yalica, caitami aliguta yarichini: Tucui gentecunamanda ninanda mañachun, Diosta mañachun, pashi nichun, ayudapai nishpa mañachunmi yarichini.

²Jatun mandajcunamanda, shuj mandajcunamandapash, tucuicunamanda Diosta mañachunmi yarichini. Shina mañashpami, casilla aliguta, chulunlla causashpa, Diosta yarishpa, tucuipi aliguta causai ushashunchi.

³Shina mañanaca alipachami. Shina mañachunmi, ñucanchita Quishpichij Taita Diospash munan.

⁴Paica, tucuicuna quishpirichunmi munan. Paimanda na llullashpa villajuj Shimitapash yachachunmi munan.

⁵Shujlla Taita Diosmi tian. Taita Diosmanda gentecunahuan, gentecunamanda Taita Dioshuan rimajpash, shujllami tian. Paica, aichayu tucushca Jesucristomi.

⁶Paica, tucuicunata quishpichingapajmi, paillata japi tucushpa huañurca. Chaitaca, ña ricuchina punllacunapimi ricuchimurca.

⁷Chaita tucuicunaman villaj cachun, yachachij cachunmi, Diosca ñucataca churahuarca. Shina cashpami, na llullashpa villajuj shimitaca, na israelcunapash crichun yachachijuni. (Cristota crij cashpami, na llullashpa shinapachami nishpa villajuni).

⁸Shinamandami tucui jaricunataca, maipi cashpapash, Diosta cashna mañachun nini: Maquita vichai churashpa, na fiñanajushpa, ama imatapash nirinajushpa, Diospajlla causashpa mañachun ninimi.

⁹Shinallata huarmicunapash, ama munanayaita, ama pinganayaita churajunataca churajuchun ninimi. Umatapash na yapata alichirinachu. Shinallata orota rurashca imatapash, perlascunatapash, ninan valishca churajunacunatapash, na churajunachu ninimi.

¹⁰Ashtahuangarin Diosta yarishpa causaj huarmicunashnallata causangapaca, imatapash aliguta rurashpa causachun ninimi.

¹¹Huarmica, upalla yachajushpa, imapipash cazuchun ninimi.

¹²Huarmitaca, jarita yachachijuchumbash, mandajuchumbash na saquinichu. Ashtahuangarin upalla tiachun ninimi.

¹³Diosca, Adán runatami punda rurashca. Chai jipami, Evatapash rurashca.

¹⁴Adanga, na umai tucurcachu. Ashtahuangarin huarmimi umai tucushpa, Dios mandashcataca na cazurca.

¹⁵Shina cajpipash huarmica, huahuacunata charishpa, aliguta crishpa, juyaita charishpa, Diospajlla causashpa catijushpaca quishpiringami.