Read Imbabura Highland Quichua 1 TIMOTEO 3 Bible Online

1 TIMOTEO 3 - Imbabura Highland Quichua bible

1 TIMOTEO 3

¹Crijcunata maijambash ricushpa yachachingapaj munashpaca, aligutami rurangapaj munan. Cashna nishca shimicunaca, pactachij shimicunami.

²Crijcunata ricushpa yachachijca, pipash na juchachijpi causajmi cana. Shujlla huarmihuan causaj, pitapash na pugllarij, aligutapacha yarishpa purij, pipash alicachijpi causajmi cana. Mingachishpapash cushijushpa mingachij, yachachitapash aliguta yachachijmi cana.

³Na machaj, na pihuambash fiñanajuj, culquita munaimandalla imatapash nalitaca na ruraj, ashtahuangarin pitapash llaquij, fiñanajui tiajpipash alichij, charijyanatapash na munaj runami cana.

⁴Paipaj huasipi causajcunatapash, aliguta mandaj cachun, paipaj huahuacunatapash, imapipash aliguta causachun, yachachishpa cazuchij cachun.

⁵(Maijambash paipaj huasipi causajcunatallata nali mandai ushashpaca, Taita Diospaj tandanajuj crijcunatacarin, imashnata mandai ushangayari).

⁶Ama chairalla crij cachun. Chashna cashpaca, ninanda jariyashpara, diablo urmashpa llaquichi tucujunshnallata, llaquichi tucungapaj urmanman.

⁷Shinallata yachachij runaca, nara crijcunapash alicachijpi causajmi cana. Nalicachishpa rimai tucunapi, diablopaj lazupi ama urmangapajmi, chashna cana.

⁸Crijcunata ayudajcunaca, alicachijpi causaj, imata parlashcatapash na shujman yalichij, na machaj, culquita munaimandalla imatapash nalitaca na ruraj cachun.

⁹Pipash na yachashca crinata Dios caramushcataca, ali yuyaihuambacha yariashpa causachun ninimi.

¹⁰Paicunatapash pundaca, imashna causajta, aliguta ricunarami. Chai jipaca, imamanda na jarcanapash na tiajpica, crijcunata ayudangapaj yaicui ushangami.

¹¹Shinallata huarmicunapash, imatapash aliguta rurashpa causaj, pitapash na caita chaita parlashpa causaj, ashtahuangarin aliguta yarishpa, tucuita pactachijcuna cachun.

¹²Crijcunata ayudajcunaca, shujlla huarmihuan causaj cachun. Shinallata paipaj huahuacunata, paipaj huasi ucupi causajcunatapash, aliguta ricushpa yachachijcuna cachun.

¹³Crijcunata ayudaj aliguta pactachishpaca, ninanda alicachi tucunatami japin. Shinallata Cristo Jesustapash, ninanda crishpami yarianajun.

¹⁴Canda ricungapaj ucha rinatapacha yariajushpapash, caigutarami escribini.

¹⁵Ñuca na ucha chayajpipash, Taita Diospaj huasipi, tandanajuj crijcunaman imashna causanata yachachinata can yachachunmi, caitaca cachamuni. Paicunaca, causajujlla Taita Diospaj tandanajuj crijcunami. Shina cashpami, na llullashpa villajuj shimitaca, pilarshna shinlli tucushpa villanajun.

¹⁶Diosta yarishpa causanaca, pipash na yachashca ninan juyaillagumi. Chaitaca, pipash na imata ni ushangachu: Taita Diosca, aichayu tucushpami shamurca. Diospaj Espiritumi, paitaca imatapash cashcatapacha ruraj cajta ricuchimurca. Angelcunapashmi, paitaca ricunajurca. Na israelcunamambash, paimandaca villanajunmi. Paitaca, cai pachapi causajcunapash crinajunmi. Paitaca, jahua pacha punchapambagupipash chasquircami.