Read Imbabura Highland Quichua 1 TIMOTEO 4 Bible Online

1 TIMOTEO 4 - Imbabura Highland Quichua bible

1 TIMOTEO 4

¹Diospaj Espiritumi, aligutapacha cashna nishpa tucuita villajun: Tucurimui punllacunapica, huaquingunaca crishcatapash saquingami. Chaicunaca, umachij ayacuna, pandata yachachij ayacuna yarichijpi yachachishcatarami uyanajunga.

²Imatapash nij tucushpalla llullashpa villajcuna cashpami, paicunapaj yuyaica naliman tigranga.

³Shina cashpami, cazaranatapash jarcanga. Taita Dios churashca micunatapash huaquindaca na micunachu nishpami yachachinga. Na llullashpa villajuj Shimita crishpa catijcuna cashpami, Taita Dios caramujujtaca, pashi nishpa micunchilla.

⁴Taita Dios rurashcacunaca, tucui aligumi. Shina cajpimi, Diosta pashi nishpa chasquishpaca, imata millanayachinapash na tian.

⁵Diospaj Shimita ricushpa paita mañajpimi, ima micunapash paipajlla tucun.

⁶Crijcunaman cai shimicunata yachachishpaca, Jesucristopajta alipacha rurajmi cangui. Crinamanda yachachijuj juyailla shimicunata catijushcamandaca, alipacha micushcashnami cungui.

⁷Diosta yangapi churaj parlocunata, paya huarmicunapaj parlocunataca, uyaitapash na uyanachu cangui. Diosta yarishpa causanatallami yarina cangui.

⁸Cuerpo shinlliyachun pugllanaca, ashapajllami ali. Ashtahuangarin Diosta yarishpa causanaca tucuipajmi ali. Shina causashpami, cai causaipaj, jipa causaipajpash carashapacha nishcataca japinata charin.

⁹Cai shimicunaca, na llulla cajpimi, tucuicuna alicachishpa chasquinalla.

¹⁰Shina cajpimi nalicachishpa rimajujpipash, llaquita apashpa imata ruranatapash ruranajunchilla. Causajujlla Taita Diosta shuyanajushpami, chashna ruranajunchi. Paica, tucui gentecunata Quishpichijmi, ashtahuambachaca paita crijcunatami quishpichin.

¹¹Cai ñuca imata nishcata mandapangui, yachachipangui.

¹²Pipash candaca, chairalla viñai cajpilla nalicachinman. Ashtahuangarin crijcuna canda ricushpa catichunmi, aliguta parlaj, aliguta causaj, juyaita charij, Diospaj Espirituhuan causaj, alipacha crij, ima nalitapash na yarij cana cangui.

¹³Ñuca shamungacaman canga, Diospaj Shimitaca leyijungui, aliguta yarichishpa rimangui, yachachingui.

¹⁴Can rurai ushanata Dios canman carashcataca, na cunganachu rurajunguilla. Chaitaca, Profetacuna villashcashnallatami, crijcunata mandaj rucucuna cambaj uma jahuapi maquita churajpi caramurca.

¹⁵Ñuca imata nishcacunata rurangui. Diospajta can yachajushca ali cashcata tucuicuna ricuchunmi, chaicunata yariajlla causashpa rurajunalla cangui.

¹⁶Imashna causanatapash, imata yachachinatapash, aligutapacha canllata yaringui. Shina aliguta rurajushpallami, cambash quishpiringui, can villajujta uyajcunapash quishpiringa.