Read Imbabura Highland Quichua 1 TIMOTEO 5 Bible Online

1 TIMOTEO 5 - Imbabura Highland Quichua bible

1 TIMOTEO 5

¹Ruculla taitacunataca, ama yapata rimanguichu. Ashtahuangarin cambaj taitatashna, aliguta yarichishpa rimangui. Chairalla huambracunataca, cambaj huauquitashna,

²paya mamagucunatapash, cambaj mamatashna, chairalla cuitsacunatapash nalitaca ama yarishpa, cambaj panitashna aliguta yarichishpa rimangui.

³Sapalla mamagucunatapash, pailla causajujpica alicachipangui.

⁴Ashtahuangarin huaquin sapalla mamaguca, huahuacunata, nietocunata charinmi. Chai huahuacunara llaquishpa caranata, punda yachajuchun ninimi. Paicunapaj taita mamata, pashi nishpa chashna carachun. Shina caranaca alipachami. Shina carachunmi, Taita Diospash munan.

⁵Sapalla causajuj mamaguca, paigulla cashpami tutapash, punllapash Taita Diosta mañanataca na cungashpa, yariajlla causajun.

⁶Ashtahuangarin huaquin sapalla huarmicunaca, paicuna munashcata rurashpami, cushijushpa purin. Chaicunaca causashpapash, ña huañushcashnami.

⁷Paicuna ama juchachi tucushpa causachunga, cai shimicunata yachachishpa mandangui.

⁸Maijan cashpapash, pai purapillata imagutapash na carashpa, paipaj huasipipacha causajcunamambash na carashpaca, crij cashcata saquishcatami ricuchinajun. Chaicunaca, na crijcunatapash ashtahuan yali nalicunami.

⁹Sapalla huarmicunapaj shutitaca, sucta chunga yali huatata charijpajtallami churana cangui. Shujlla cusahuan causashca cajpimi, chashnaca churana cangui.

¹⁰Imata ruranapipash, aliguta rurashpa ricuchij cashca cachun. Huahuacunata aliguta viñachij, cushijushpa mingachij, Diospajlla causajcunapaj chaquitapash maillachij, llaquita apajcunata llaquishpa aliguta ruraj cashca cachun.

¹¹Sapalla cajpipash chairalla huarmicunapaj shutitaca, na churanachu cangui. Chaicunaca, paicunapaj nali munai mishajpimi, Cristota fiñashpa na cazushpa, cazarangapaj munan.

¹²Shina rurashpaca, punda crishcata na pactachishpami, ninan llaquiman rinajun.

¹³Shinallata imata rurangapajpash na munashpami, huasin huasin purinatalla yachajunajun. Imata rurangapajpash na munajcunallapash, na canllu. Ashtahuangarin shujcuna imata parlashcatapash cutin shujcunaman parlajcuna, imapipash satirishpa purijcuna tucushpami, napash parlana shimicunata parlashpa purinajun.

¹⁴Shinamandami chairalla sapalla huarmicunataca, cazarachun munani. Huahuacunata aliguta viñachishpa, huasipipash aliguta mandashpa causachunmi munani. Shina causajpimi, na ricunayachij gentecunapash ninanda nalicachitaca, na ushanga.

¹⁵Huaquin sapalla huarmicunaca, Cristota catinata saquishpami, Satanastara catinajun.

¹⁶Crij huauqui cashpa, pani cashpapash, sapalla mamaguta charishpaca, ricushpa caranatami charin. Tandanajuj crijcunara ama carachunmi, caranata charin. Crijcunaca, imagupash illaj sapalla mamagucunamanmi ricushpa, imagutapash caranatapacha charin.

¹⁷Crijcunata mandaj rucucuna aligutapacha mandashpaca, ashtahuan alicachi tucunatami charin. Villashpa, yachachishpa trabajajcunacarin, ashtahuambachami alicachi tucunata charin.

¹⁸Dios escribichishca Shimipica, cashnami nijun: “Trillajuj huagrataca, ama shimita huatanguichu” nijunmi. Shinallata: “Imagutapash ruraj runaca, culquita japinataca charinllatami” nijunmi.

¹⁹Crijcunata mandaj rucuta, shujlla juchachij tiajpica, na crinachu cangui. Ishcai cashpa, quimsa cashpa ricushcata villaj tiajpillami, crina cangui.

²⁰Maijambash cutin cutin juchata rurashpa purijujpica, caishujcunapash manllarichunmi, tucuicunapaj ñaupajpi nalitami rurajungui nishpa, jarcashpa shinllita rimana cangui.

²¹Taita Diospash, Apunchi Jesucristopash, pai agllashca angelcunapash ricunajujpimi, cashna nishpa canman mingani: Cai ñuca nijujtaca pactachingui. Ama shujtalla alicachishpa, tucuicunatami chashnallata ricushpa, imagutapash rurana cangui.

²²Diospajta rurachun maijandapash agllashpaca, nara ali ricushpallataca, na ñapash paipaj uma jahuapi, maquita churanallachu cangui. Pactarallapash shujcuna juchacunata rurashcapi, cambash chapuringuiman. Canga, ima mapapash illaj causangui.

²³Vijsata nanachishpa, cutin cutin huañujujpimi candaca, ama ashtahuan yacuta ufiashpa, asha vinota ufiangui nini.

²⁴Huaquingunapaj juchacunaca, pipash nara imata nijpillata ricurinllami. Cutin shujcunapaj juchacunaca, jipamanmi ricurimun.

²⁵Imata aliguta rurashcapash, shinallata ricurinllami. Imashnalla rurashca cashpapash, na pacalla tiajungallachu.