Read Imbabura Highland Quichua 1 TIMOTEO 6 Bible Online

1 TIMOTEO 6 - Imbabura Highland Quichua bible

1 TIMOTEO 6

¹Huatashcashna causaj tucui gañangunaca, paicunapaj amocunata tucuipi imapipash alicachishpa cazuchun ninimi. Shina cazujta ricushpami, Taita Diostapash, ñucanchi imata yachachijtapash, nalicachishpa rimaitaca, pipash na ushanga.

²Crij amocunata charij gañangunaca, ama huauquillami nishpa, na cazunayanllu nichun ninimi. Ashtahuangarin amo crij cajpica, gañangunaca ashtahuan aliguta servichun ninimi. Paicuna aliguta servishcatapash chasquij, juyashca crijcuna cajpimi, shina rurachun nini. Cai ñuca imata nishcataca yachachishpa, aliguta yarichishpa rimangui ninimi.

³Ñucanchi Apunchi Jesucristo juyailla shimicunata yachachishcatapash, Diosta aliguta yarichun yachachishcatapash, crishpami catinajunchi. Chaita na catishpa, pandachishpa yachachishpaca,

⁴jariyashpami, imatapash na yachashpa, imatapash caita chaita nirinajushpa, fiñanajunata yariashpalla causanajun. Chashna cashpami, shujcunashna tucungapaj munan. Shinallata fiñanajushpa, nali shimicunata rimashpami, shujcunatapash nalicachinajun.

⁵Chashnacunaca, na llullashpa villajuj shimitapash saquishpami, runacuna imatapash huaglita villashcatalla yarinajun. Chashna cashpami, fiñanajushpa rimanatalla yariashpa causanajun. Chashnacunaca, charijyangapaj munashpallami, Diosta catinchimi nij tucunajun. Chaicunahuanga, ama tandanajunguichu ninimi.

⁶Ashtahuangarin imaguta charishpapash, Diosta yariashpa causashpaca, ninanda charijyashcashnami causanchi.

⁷Cai pachapica, imagutapash na charishpami huacharinchi. Shinallata cai pachamandaca, imatapash na apai ushashunllu.

⁸Shina cashcamandaca micunaguta, churajunaguta charishpallata, cushijushpa causashunchi.

⁹Ashtahuangarin charijyangapaj munajcunaca, imatapash nalita yarichijuj nali munaicuna urmachingapaj shamujpimi, lazupishna urmashpa imatapash nalitara ruranajun. Shinamandami shinlli shungu tucushpa, ninandapacha culquita munai huaglichishpa, gentecunataca ninanda llaquichishpa, chingaita chinganaman apajun.

¹⁰Culquita juyashpa causanami, imatapash nalitalla ruranataca sapishna callarichin. Huaquingunaca, ninanda culquita munashpami, crishpa catijushcatapash saquin. Shinamandami, ninan llaquicunata apanajun.

¹¹Ashtahuangarin Taita Diospajta ruraj runa, canga shina nalicunata ruranamandaca anchuringui. Imatapash cashcatapacha rurashpa, Diosta aliguta yarishpa, crishpa catingui. Juyaihuan, na ñapash fiñarishpa, na jariyashpa causanata catingui.

¹²Causaita causagrinata japigrichunmi, Diosca candaca agllarca. Chaitaca yariashpami, macanajushpa mishanshna can crishcataca, aliguta catina cangui. Ñami ashtacacunapaj ñaupajpica, tucui shunguhuan crinipachami nircangui.

¹³Tucuicunaman causaita caraj Taita Diospaj, Jesucristopaj ñaupajpimi, cai shimicunata aliguta pactachinajuchun mandani. Jesucristoca, Poncio Pilatopaj ñaupajpica, aliguta villashpami alipi ricurirca.

¹⁴Cai ñuca mandashcataca, ñucanchi Apunchi Jesucristo tigramungacaman, imatapash nalitaca na rurashpa, na juchachi tucushpa aliguta pactachingui ninimi.

¹⁵Paica ninan cushijuihuanmi, pailla tucuita Mandaj cajta, jatun mandajcunatapash Jatun Mandaj cajta, amocunapajpash jatun Amo cajta ricuchina punllapillata ricuchimunga.

¹⁶Pailla huañuitapash na huañushpa causajujta, pipash na chayai ushanalla michapi tiajujtami ricuchimunga. Paitaca, pipash gentecunaca na ricushcachu, na ricui ushanllu. Paillami, ninanda alicachi tucushpa, causaita causaicaman tucuita mandangapaj ushaita charin. Shina cachun.

¹⁷Cai pachapi ninanda charijyashpa causajcunata, imata churashpapash ama chaillahuan jariyashpa causanajuchun yachachingui. Paicuna imata charishcacunatallapash, ama yariashpa causanajuchun yachachingui. Chaicunaca tucurinallami. Ashtahuangarin ñucanchi cushijushpa causachun, imagutapash ninanda caramujuj, causajujlla Taita Diosta yariashpa causachun yachachingui.

¹⁸Imatapash aliguta rurashpa, chai rurashcacunahuan ninanda charijyashcashna cachun yachachingui. Shujcunamambash imaguta carashpa ayudaj cachun yachachingui.

¹⁹Shina aliguta causashpaca, jipa punllacunapi charij cangapajmi alichinajun. Shina aliguta huasichingapaj callarinshna rurashpaca, causaita causanatami japinga.

²⁰Juyashca Timoteo, canman ñuca mingashcataca aliguta pactachingui. Diosta yangapi churashpa, yanga parlocunata aligutapacha yachajunami nishpa, llullashpa yachachijcunataca, na uyanachu cangui.

²¹Huaquingunaca chashna yachachishpami, crishcatapash saquishpa, pandashpa causanajun. Diospaj ninan juyaica, canhuan cachunmi munani. Shina cachun.