Read Imbabura Highland Quichua 2 TIMOTEO 1 Bible Online

2 TIMOTEO 1 - Imbabura Highland Quichua bible

2 TIMOTEO 1

¹Taita Dios munajpi, Jesucristo villachun cachashca Pablomi cani. Cristo Jesusmanda Diosca, causaita carashapacha nishcata villajmi cani.

²Timoteo canga, ñuca juyashca churishnami cangui. Taita Diospash, ñucanchi Apunchi Jesucristopash ninan juyaita, llaquishpa causanata, casilla ali causaiguta canman carachunmi munani.

³Taita Diostami pashi nijuni. Paitaca, ñaupa ñuca taitacunashnallatami, ali yuyaihuan servijuni. Tutapash, punllapash Diosta mañajushpaca, na cungashpami canmandaca mañajunilla.

⁴Can huacajushcata yarishpami candaca, ñavi ñavi ricushpa, ninanda cushijungapaj munani.

⁵Canga, na nij tucushpalla aliguta crishpa catijushcatami yarijuni. Loida shuti cambaj abuelarami punda aliguta catijurca. Eunice shuti cambaj mamapashmi, alipacha crij carca. Shinallata cambash, alipacha crij cajtami yachani.

⁶Chaimandami, Taita Dios carashca nina rupajunshna cambi tiajujtaca, causachinshna charina cangui. Chaitaca, ñuca maquita cambaj jahuapi churajpimi chasquircangui.

⁷Taita Diosca paipaj Espiritutaca, manllashpa causachunga na carashcachu. Ashtahuangarin ushaita charishpa, juyaita charishpa, nali munaicunatapash mishashpa causachunmi cararca.

⁸Shinamandami, ñucanchi Apunchi Jesusmandaca, na pinganayachishpa villana cangui. Shinallata paimanda ñuca villajushpa prezu tiajujpipash, na pingai tucunachu cangui. Ashtahuangarin ali villaita villajushcamandaca, Taita Dios ushaita carashcashna llaquicunataca apajuilla.

⁹Paimi, ñucanchitaca paipajlla causachun agllashpa quishpichirca. Ñucanchi imatapash aliguta rurashcamandaca, na quishpichircachu. Ashtahuangarin Diosca, pai munashcashna cashcamandaca quishpichirca. Shinallata cai pachatapash nara rurashpallata, Cristo Jesusmanda ñucanchita pundallata ña juyajushpami quishpichirca.

¹⁰Shina cashpami juyajushcataca cunambica, ñucanchita Quishpichij Jesucristo shamujpi ricuchimurca. Paimi, ali villaita villajushcamandaca, huañuita tucuchirca. Shinallata tucuritapash, na tucurina causaigutapashmi, michaman llujchimurca.

¹¹Chaimandami, na israelcunaman Jesusmanda villajpash, paillata villachun cachashcapash, yachachijpash cangapaj churai tucushca cani.

¹²Chaimandami, chashnallata cai llaquitaca apajuni. Shina cashpapash, Jesusta ñuca crishcata yachashpami, na pinganayachini. Pai ñucaman mingashcataca, tigramuna punllacaman paipaj ushaihuan alichishpa charijujtaca yachanipachami.

¹³Canman ñuca yachachishca ali shimicunataca, ama cungashpa catijunguilla. Cristo Jesushuan shujlla tucushcamanda, paitaca crishpa, juyaita charishpa causangui.

¹⁴Dios alita mingashcataca, ñucanchi shungupi causajuj Diospaj jucha illaj Espiritupaj ushaihuan aliguta pactachingui.

¹⁵Asia llactamanda shamushca, Figelo shuti, Hermógenes shuti runacuna ñucatalla saquishpa, tucuilla rishcataca canllata yachanguimi.

¹⁶Onesíforo shuti huauquitaca, paipaj huasipi causajcunandi, Apunchi Jesús llaquishpa charipachunmi munani. Paillami, ñucata ricungapaj shamuriashpa cushichihuarca. Cadenahuan huatai tucushca ñuca tiajujpipash, na pinganayachircachu.

¹⁷Ashtahuangarin Roma puebloman shamushpaca, taringacamanmi mascahuarca.

¹⁸Efeso pueblopi cajpi, ñucanchita pai ninanda ayudajushcataca, canga alipachami yachangui. Shina cajpimi, Apunchi Jesús shamui punllapica, Jatun Dios paitaca llaquishpa charipachun munani.