Read Imbabura Highland Quichua 2 TIMOTEO 2 Bible Online

2 TIMOTEO 2 - Imbabura Highland Quichua bible

2 TIMOTEO 2

¹Canga, ñuca huahuashnami cangui. Cristo Jesusmanda caramushca juyaihuan shinlli tucungui.

²Ñuca yachachijujtaca, ashtacacunapaj ñaupajpimi uyarcangui. Chaitaca, ali pactachijcunaman, shujcunamambash yachachi ushana crijcunaman yachachishpa mingapangui ninimi.

³Canga, Jesucristopaj alipacha soldadoshna llaquicunata apajuilla.

⁴Pipash soldado tucushpaca, na cai causaipajlla imatapash ruranacunahuan huatarinshna pandarinllu. Soldado cachun paita agllajta cushichingapajmi, na chashna causan.

⁵Shinallata calpangapaj munajpash, calpachun mandashcashna na aligutapacha calpashpaca, na coronata japi ushanllu.

⁶Shinallata tarpuj runapash, granota japingapaca, alpatarami punda alichinata charin.

⁷Ñuca nishcataca aliguta yaringui. Apunchi Jesús candaca, tucuita entendichijuchun.

⁸Jesucristotaca yariangui. Paica, ñaupa taita Davidpaj mirai purami. Ali villaita villajuj shimipi ñuca nijushcashnallatami paica, huañushcacunapaj chaupimanda causarirca.

⁹Cai ali villaita villajuimandami, huañuchij nali runashna llaquicunata apashpa prezu tiajuni. Shina cajpipash Diospaj Shimica, na prezu tiajunllu.

¹⁰Chaimandami Dios agllashca gentecunamandaca, llaquita apajuni. Paicunapash quishpirishpa juyailla causaita causagrinata charichunmi, shina llaquicunata apajuni.

¹¹Napacha llulla shimicunaca, caicunami: Paihuan huañushcashna cashpaca, paihuanllatami causagrishun.

¹²Llaquicunata apanajushpaca, paihuanmi mandagrishun. Paitaca na rijsinichu nijpica, paipash ñucanchitaca na rijsinichu ningami.

¹³Pai mandashcata ñucanchi na pactachij cajpipash, paica imatapash aliguta pactachijunllami. Paica, na paimandallata na ñucachu cani nishpa llullaritaca na ushanllu.

¹⁴Cashna nishcataca yarichingui. Fiñanajushpa rimarijcunataca, Apunchi Jesuspaj ñaupajpi aliguta yarichishpa rimangui. Chai rimarinacunaca, imapajpash nalichu. Ashtahuangarin uyajcunataca, chingana llaquipimi churan.

¹⁵Na llullashpa villajuj shimitaca, aliguta yachachishpa pactachishpami, imata cashpapash ucha rurana cangui. Shina causashpa na pingai tucujpimi, Taita Diosca candaca alicachinga.

¹⁶Ashtahuangarin Diosta yangapi churaj, yanga parlocunataca ama uyanguichu. Chai nali parlocunaca, ashtahuan ashtahuanmi naliman pushanga.

¹⁷Chai nali parlocunaca, ismuchij ung:uishnami mirashpa catinga. Himeneo shuti, Fileto shuti runacunapashmi chashna tucushca.

¹⁸Paicunaca, na llullashpa villajuj Shimita catinata saquishpami: “Ñami cutin causarircanchi” nishpa, tauca crijcunata pandachishpa purinajun.

¹⁹Ashtahuangarin huasichi callaringapaj Taita Dios churashca mulun rumica, shinllipachami tiajun. Chaica, cashna nishpa sellashcami tiajun: “Apunchi Jesucristoca, paipaj tucushcacunataca rijsinmi” nijunmi. Shinallata: “Cristopaj shutipi mañajcunaca, nalita ruranamanda tucuicuna anchurichi” nijunmi.

²⁰Shuj jatun huasipica orotalla, culquitalla rurashcacunaca na tianllu. Ashtahuangarin alpata, caspita rurashcacunapashmi tian. Chai rurashcacunamanda huaquinga, alicachingapajllami tian. Cutin shuj huaquingunaca, nalipajllami tian.

²¹Shina cajpimi, tucui cai nalicunata saquijcunaca alicachi tucungapaj, Diospajlla causanajun. Shinallata Apunchi Jesús mingashcata rurangapaj, imata cashpapash alitaca ucha ruranallacunami causanajun.

²²Chairalla viñaicuna nalita ruranajujmandaca, anchurinami cangui. Ashtahuangarin shungupi ima nalitapash na yarishpa, Apunchi Jesusta mañajcunahuan tandanajushpami, imatapash cashcatapacha ruranata, alipacha crinata, juyaita charinata, casilla ali causanata catina cangui.

²³Shinlli shungu cashpa, muspayachij parlocunataca, na uyanachu cangui. Chai nali parlocuna fiñanajuchijtaca yachanguimi.

²⁴Apunchi Jesusta servishpa causajca, pihuambash na fiñanajushpami, aliguta causana. Ashtahuangarin tucuicunahuan ali cachun, yachachina munaitapash charij cachun, llaquitapash apajlla cachun ninimi.

²⁵Villajujpi na cazujcunatapash, ali shunguhuambacha yachachij cachun. Shina yachachijpica, Taita Dios yarichijpi llaquirishpa, na llullashpa villajuj Shimita crishpa, paicunapash aliguta yachajunmambashchari.

²⁶Shina yachajushpaca, diablo munashcata rurachun charijuj tugllamandaca llujshinmambashchari.