Read Imbabura Highland Quichua 2 TIMOTEO 3 Bible Online

2 TIMOTEO 3 - Imbabura Highland Quichua bible

2 TIMOTEO 3

¹Caicunatapash yachanami cangui: Tucurimui punllacunapica, jatun llaquicunami shamunga.

²Chai punllacunapica, paicunalla ali cangapaj munajcuna, charijyangapaj munajcuna, pitapash yalimi canchi nijcuna, jariyashpa jatun tucujcuna, Diostapash nali shimicunata rimajcunami tianga. Taitata, mamatapash na cazujcuna, na pashi nijcuna, Diostapash na manllajcunami tianga.

³Pitapash na juyajcuna, ninanda fiñarishcamanda ali tucungapaj na munajcuna, yangata juchachijcuna, ima munashcata rurajcuna, llaquitapash na llaquijcuna, ima alitapash na ricunayachijcunami tianga.

⁴Umachishpa japichijcuna, na shuyashpa imatapash ñapash rurangapaj munajcuna, imamandapash ninanda jariyajcuna, Taita Diostapash na juyashpa, yanga cushijushpa causanatalla juyajcunami tianga.

⁵Ñavi ricuipica, Diosta juyanshnallami ricuringa. Shina cashpapash, Diospaj ushaitaca na charingachu. Chashnacunamandaca anchuringui.

⁶Chashna puracunami, huasicunaman yaicushpa, juchatalla rurashpa llashachinshna causanajuj nali huarmicunata prezu japinshna charinajun. Chai huarmicunaca, nali munaicunatalla rurangapajmi yariashpa causanajun.

⁷Chai huarmicunaca, ninanda yachajunajushpapash, na llullashpa villajuj Shimitaca, napacha yachajui ushanllu.

⁸Imashnami Janes shuti, Jambres shuti runacunaca, Moisesta na cazurca. Shinallatami runacunaca huagli yuyaita charishpa, na llullashpa villajuj shimitaca, na cazunajun. Chashnacunaca, nalitalla yarij cashpami, critapash napacha ushanga.

⁹Ashtahuangarin paicunaca, na unaicaman pandachishpa causangachu. Paicuna juizu illajcuna cajtaca, tucuicunami yachanga. Shinallatami, Moisesta na cazujcunapash tucushca.

¹⁰Ashtahuangarin canga, ñuca yachachijujtami catishcangui. Aliguta causanata yarishpa, crishpa causanata, ali shungupacha canata, juyashpa, na fiñarishpa causanatami catijungui.

¹¹Antioquía, Iconio, Listra shuti pueblocunapica, ñucata fiñashpa ninanda llaquichijpimi, llaquicunata apajurcani. Chai tucui llaquicunamandaca, Apunchi Jesusmi cacharichihuarca. Chashna llaquicunatallatami, cambash apajushcangui.

¹²Shinallatami Cristo Jesushuan shujlla tucushpa, paita yariashpa causangapaj munajcunaca, tucuicuna llaquita apanga.

¹³Ashtahuangarin nalitalla rurashpa, shujcunata pandachijcunaca ashtahuan ashtahuanmi naliman tigranga. Shujcunatapash pandachishpami, paicunallatapash pandarinajunga.

¹⁴Ashtahuangarin can crishpa yachajushcataca, aliguta catijunguilla. Canga maijan yachachishcatapash, ali yachashpami chashna catijungui.

¹⁵Dios escribichishca jucha illaj Shimicunataca, huahuamandapachami yachajushcangui. Chai shimicunami, Cristo Jesusta crishcamanda quishpichingapaj, canda alipacha yachajta rurangapaj ushaita charin.

¹⁶Dios escribichishca tucui Shimicunaca, paillata yarichishpa escribishcami. Chai Shimicunaca yachachingapaj, nalicuna ali purichun rimangapaj, shinallata imatapash cashcatapacha rurashpa causanatapash yachachingapajmi ali.

¹⁷Chaita yachajushpaca, Taita Diospajta ruraj runaca, ima pandatapash na rurashpa, tucui imata cashpapash aliguta rurangapajmi, aligutapacha alichirishcalla canga.