Read Imbabura Highland Quichua TITO 1 Bible Online

TITO 1 - Imbabura Highland Quichua bible

TITO 1

¹Taita Diosta servij Pablomi cani. Jesucristo villachun cachashcapashmi cani. Taita Dios agllashcacuna crichunmi villajuni. Diosta yarishpa causajcunata yachachij, na llullaj Shimitami villajuni.

²Causaita causagrinata shuyashpa causachunmi villajuni. Na llullaj Taita Diosmi, cai pachata nara rurashpallata, causaita causagrinataca carashapachami nishca.

³Diosca, pai shina nishcata pactachina punllacunapimi ricuchimushca. Chaita villachunga, ñucanchita Quishpichij Taita Dios mandashpami mingahuarca.

⁴Caitaca, can Titomanmi escribimuni. Canga, ñucashnallata crij cashpami, ñuca huahuashnapacha cangui. Taita Diospash, ñucanchita Quishpichij Jesucristopash ninan juyaita, ninanda llaquinata, casilla ali causaiguta canman carachunmi munani.

⁵Creta shuti llactapi causanajuj, cada pueblopi tandanajuj crijcunapi nara ñuca alichishcataca, can alichijuchunmi saquircani. Paicunata cuidashpa ricuchun mandaj rucucunata agllashpa churapangui nishpami, canman mingarcani.

⁶Chai rucucunaca, shujlla huarmihuan pipash na juchachijpi causachun. Paipaj huahuacunapash crijcuna cachun, imatapash nalitaca na rurashpa, na cazunllu nishpaca, ama juchachi tucushca cachun ninimi.

⁷Crijcunata ricushpa yachachijca, Taita Dios mingashcata rurashpa, na juchachi tucushpami, aligutapacha causana. Shinallata na jariyaj, na ñapash fiñarij, na machaj, na pihuambash fiñanajuj, culquimandalla imatapash nalitaca na ruraj cashpami ali.

⁸Ashtahuangarin cushijushpa mingachij, imatapash aliguta ruraj, na machaj, imatapash cashcatapacha ruraj cachun. Diospajlla causashpa, ima nalitapash jarcarij cachun.

⁹Diospaj Shimica na llullaj cajta paiman yachachishcataca, aliguta yarishpa causaj cachun. Shina causajcunami, na chashnachu nishpa rimajcunataca mishashpa, ali shimiguta yachachishpa, aliguta yarichi ushanga.

¹⁰Ashtacacunami na cazunayachishpa, yanga parlocunatalla parlashpa, pandachishpa purijcuna tian. Ashtahuambachaca, circuncisión nishcata rurashca puracunami chashnacuna tian.

¹¹Chashnacunataca, upallayajta rimashpa tigrachinapachami. Chashnacunaca, napash yachachinacunata yachachishpami, huasi ucu puratapash pandachishpa, culquimandalla imatapash nalicunata ruranajun.

¹²Paicuna puramanda shuj villaj runaca, cashnami nishca: “Cai Creta llactapi causajcunaca, llullashpallami causan. Shinallata millai animalcunashna, na trabajashpami, micunatalla yariashpa causan” nishcami.

¹³Shina nishcapash, na llullachu. Shina cashcamandaca paicunataca, alipacha crishpa catichun, shinllitapacha ninanda rimashpa yachachingui.

¹⁴Judá llactamanda runacuna llujchishca parlocunatalla parlanajujtaca, uyaitapash na uyanachu cangui. Runacunalla mandashca shimicunatapash, na uyanachu cangui. Paicunataca, na llullashpa villajuj Shimimanda anchurishca cajpimi, chashna yachachina cangui.

¹⁵Imatapash alitalla yarishpa causajcunapaca, ima cashpapash alimi. Ashtahuangarin na crishpa, imatapash huaglita rurajcunapaca, ima cashpapash nalichu. Paicunapaca shungupash, yuyaicunapash huaglitallami yarinajun.

¹⁶Taita Diostaca yarinchimi nishpapash nalitalla rurashcahuanmi, Diosta na crij cashcataca ricuchinajun. Chashnacunaca millanayaicunata rurajcuna, Diostapash na cazujcunami. Imata aliguta rurangapaj munashpapash, na ushashpami causanajun.