Read Imbabura Highland Quichua TITO 2 Bible Online

TITO 2 - Imbabura Highland Quichua bible

TITO 2

¹Ashtahuangarin canga, aliguta yachachijpi yachajushcatalla villangui.

²Ruculla taitacunaca, ama juizu illaj, ama pugllarijuj cachun yachachingui. Shinallata aligutapacha yarishpa causajcuna cachun, alipacha crij, pitapash juyashpa, na ñapash fiñarishpa causaj cachun yachachingui.

³Shinallata payalla mamacunapash, Diostalla yariashpa causaj, pitapash na yangata parlashpa, na machashpa, aligutalla rurashpa causaj cachun yachachingui.

⁴Shina causashpaca, chairalla huarmicunatapash, paicunapaj cusata, huahuacunata juyashpa causachun yachachijcuna cachun.

⁵Shinallata imatapash aliguta yarishpa, juyailla causashpa, huasipipash aliguta cuidashpa causachun yachachijcuna cachun. Shujcunatapash llaquishpa, cusatapash cazushpa causanata yachachijcuna cachun. Taita Diospaj Shimitaca, pipash ama nalicachijuchunmi, chashna rurachun yachachina cangui.

⁶Shinallata chairalla viñaicunatapash, aliguta yarishpa purichun, aliguta yachachishpa rimangui.

⁷Shujcunapaj ñaupajpica, canllata aliguta rurashpa ricuchishpa, shinallata imata yachachishpapash aligutapacha, na nij tucushpalla yachachishpami, chashna rurana cangui.

⁸Ama nalicachinajuchunmi, aligutalla yachachinataca aliguta yachachina cangui. Shina yachachijpimi, cangunata na ricunayachij gentecunaca pingai tucushpa, imata juchachitapash na ushanga.

⁹Servijcunataca, amota cazushpa causachun, aliguta yarichishpa rimangui. Amotaca, tucuipi cushichishpa causachun, shinallata ama na cazushpa tigrachinajuchun yachachingui.

¹⁰Amopajtaca na shuhuashpa, imatapash aliguta tucuita pactachinajuchun yachachingui. Shina aliguta rurashpami, ñucanchita Quishpichij Taita Diosmanda yachajunaca, juyailla cashcata tucuipi ricuchinajunga.

¹¹Taita Diosca, tucui gentecunata quishpichingapajmi, pai ninanda juyajushcata ricuchimurca.

¹²Shina juyashpami Diosca, cai pacha nali munaicunata ruranata paita na manllashpa causanatapash cungachun yachachijun. Chaita yachajushpaca, cai causaipi aliguta yarishpa, imatapash cashcatapacha rurashpa, Diosta yariajlla causachunmi yachachijun.

¹³Ñucanchi jatun Taita Dios, Quishpichij Jesucristoca punchapamba shamushapacha nishcami. Chaita ñucanchi ninanda cushijushpa shuyanajuchunmi yachachijun.

¹⁴Jesucristoca, tucui nalicunata ruranajujpimi, ñucanchita quishpichingapaj paillata japi tucushpa huañurca. Paipajlla, mapa illaj causachun alitalla ruranata yariajlla causachunmi huañurca.

¹⁵Cai ñuca imata nishcataca, tucui ushaihuan shinllita rimashpa, aliguta yachachingui. Pipash candaca, ama nalicachishpa rimachun ninimi.