Read Imbabura Highland Quichua TITO 3 Bible Online

TITO 3 - Imbabura Highland Quichua bible

TITO 3

¹Llactata mandajcunata, pueblopi mandajcunatapash, aliguta cazushpa causachun, crijcunataca yarichipangui. Imata cashpapash, aligutaca ruranallacuna shuyanajuchun yarichipangui.

²Ama pitapash nalicachishpa, ama fiñanajushpa causachun yachachingui. Ashtahuangarin juyaita ricuchishpa, ali shunguhuambacha tucui gentecunata yachachingui.

³Ñucanchipash pundaca, juizu illaj, na cazuj, chingashcami causarcanchi. Imatapash nalitalla rurachun yarichimujta gañanshna cazushpami, chaitara rurashpa cushijushpa causarcanchi. Imatapash nalita rurashpa causashpami, shujcuna imata charijtapash ñucapaj cashcanman yashpa ricurcanchi. Shinallata millanayachi tucushcacunami carcanchi, caishujhuan chaishujhuan millanayachirishpami causarcanchi.

⁴Chashna causajpipash, ñucanchita Quishpichij Taita Diosmi, tucui gentecunata ninandapacha llaquishpa, juyajushcata ricuchimurca.

⁵Shinami ñucanchitaca, imatapash cashcatapacha rurashpa causashcamandaca, na quishpichirca. Ashtahuangarin ñucanchita llaquishpallami quishpichirca. Paimi, ñucanchi juchacunata maillashpa, cutin huacharishcatashna rurashca. Paipaj jucha illaj Espiritumandami, mushuj causaitapash carashca.

⁶Chai Espiritutaca, Diosmi ñucanchita Quishpichij Jesucristomanda ashtacata talinshna ñucanchiman caramushca.

⁷Diosca, paipaj ninan juyaimandami, ñucanchitaca imatapash cashcatapacha rurashcatashna chasquirca. Shinamandami, causaita causagrinata japinataca yariajlla shuyanajunchi.

⁸Cai shimicunaca, napacha llulla cajpimi Taita Diosta crijcunaca, shinlli tucushpa, imatapash alicunata rurashpa causachun munani. Shina causanaca, tucui gentecunapaj ali minishtirishcapachami.

⁹Ashtahuangarin yanga parlocunata, ñaupa taitacunapaj shuticunamanda parlocunata, Moisés mandashca shimicunata parlashpa, fiñanajushpa chimbapurajcunataca na uyanachu cangui. Chaicunaca imapajpash nali, yanga parlocunami.

¹⁰Crij puracunata shicanyachij runataca, shuj viajella cashpa, ishcai viajeta cashpapash, shinllita tacurijpi na cazungapaj munajpica, llujchishpa cachangui.

¹¹Paica, pandashpami jatun nali juchata rurashca. Paillata ninanda llaquichi tucungapaj, chashna nalita rurajushcata yachashpami, chashna rurana cangui.

¹²Artemas shuti huauquita cashpapash, Tíquico shuti huauquita cashpapash, cambajman cachamushami. Pai chayamujpica, Nicópolis shuti puebloman ñucata ricungapaj ucha shamupangui. Chaipimi, tamia chiri quillacunapica quedasha yajuni.

¹³Mandajcunahuan ñucanchimanda rimaj Zenas shuti runaman, Apolos shuti runamambash, ama imagupash illaj rinajuchun, aliguta ricushpa carapangui.

¹⁴Can chashna carajta ricushpami, ñucanchipura crijcunapash imagupash illajcunaman imatapash alicunata ruranata yariajlla causanata yachajunga. Shina aliguta rurashpami, na yanga causanajunga.

¹⁵Ñucahuan tiajcunapash tucuillami candaca, alillachu capangui ninajun. Ñucanchita juyaj crijcunatapash, alillachu capanguichi nipangui. Diospaj ninan juyaica, tucui cangunahuan cachunmi munanchi. Shina cachun.