Read Imbabura Highland Quichua HEBREOS 10 Bible Online

HEBREOS 10 - Imbabura Highland Quichua bible

HEBREOS 10

¹Mandashca shimicunaca, jipa punllacunapi Dios aliguta caramunata llandushnalla ricuchijllami cashca. Shina cajpimi, imata carashca nishcapachaca nara pactashca. Chai mandashca shimicunata catishpa, Diospajman quimirijcunaca huatapi huatapi animalcunata cushpapash, paipaj ñaupajpica nara ali tucunllu.

²Chai cushcacuna juchata shuj viajella maillai ushajpica, na ashtahuan chashna cushpa alicachinajunmanllu carca. Shinallata juchayu cashcatapash, na ashtahuan yarinajunmanllu carca.

³Ashtahuangarin animalcunata Diosman cushpa huañuchinajushpaca, cada huatami paicunapaj juchacunata yarinajun.

⁴Ashtahuangarin jari huagracunapaj, jari chivocunapaj yahuarca, napacha juchacunata anchuchi ushanllu.

⁵Shina cajpimi, cai pachaman Cristo shamushpaca, Diosta cashna nirca: “Animalta huañuchinajuchumbash, ashtahuan imata cuchumbash, na munarcanguichu. Ashtahuangarin ñucatami, aichayu tucuchun alichihuashcangui.

⁶Animalcunata cushpa tucuillata rupachijpipash, juchacunata anchuchijuchun imata cujpipash, napacha cushijunguichu” nircami.

⁷Chaimandami cashna nircani: “Ricui Taita Dioslla, cambaj munaita pactachingapajmi shamuni. Canllatami, ñucamanda villashpa pillushca libropi escribichishcangui” nijurcami.

⁸Cristoca, caitarami punda nirca: “Animalta Diosman cushpa huañuchishcatapash, ashtahuan imata cuchumbash, animalcunata tucuillata rupachishcatapash, juchacunata anchuchijuchun, imata carachumbash na munarcanguichu. Chaicunahuanga, na cushijunguichu” nircami. (Mandashcapi nijushcamandallami, chaicunataca cunajun).

⁹Chai jipaca, cashnatapashmi nirca: “Ricui, Taita Dioslla, cambaj munaita pactachingapajmi shamuni” nircami. Cashna nishpaca, Diosman cuchun nishpa mandashcatami, Cristoca anchuchirca. Paica, chaita cunapaj randimi, paillata Diosman cararishpa huañurca.

¹⁰Dios munashcata pactachishcamandami, ñucanchica Diospajlla tucushcanchi. Jesucristoca aichayu tucushpa paillata cararishpami, shuj viajella huañushca.

¹¹Diosta servij curacunaca, tucuicunami punllandi animalcunata huañuchishpa, Diosman cutin cutin chashnatallata cunajun. Chaicunaca, napacha juchacunataca anchuchi ushanllu.

¹²Ashtahuangarin Cristoca, tucuicunapaj juchacunamanda causaita causaicaman Diosman cararishpa, shuj viajella huañushpami cunanga, Taita Diospaj ali ladopi tiajun.

¹³Chaimandapacha cunangamanmi, paita fiñajcunata, paipaj chaqui sarunapi Dios churangacaman shuyajun.

¹⁴Paica, shuj viajella Diosman cararishpa huañushpami, Diospajlla causajcunataca causaita causaicaman ima pandatapash na rurajcuna cachun rurarca.

¹⁵Shinallatami Diospaj jucha illaj Espiritupash, ñucanchiman aliguta villashca jipaca, cashna nijurca:

¹⁶“Shamui punllacunapica, caitami paicunaman rurangapaj ari nijusha: Ñuca mandashca shimicunataca, paicunapaj shungupimi churasha. Paicunapaj yuyaipipashmi, escribinshna churasha” nijunmi Jatun Diosca.

¹⁷Ashtahuan cashnatapashmi nijurca: “Paicunapaj juchacunatapash, paicuna na cazushcacunatapash, napacha ashtahuan yarishachu” nijurcami.

¹⁸Ñucanchi juchacunataca ña anchuchishca cajpimi, juchacunamanda imatapash Diosman caranataca, na ashtahuan charinchi.

¹⁹Shina cajpica huauquicuna, panicuna, Jesucristopaj yahuarhuan cacharichishcamandaca, Diospajlla shicanyachishca ucuman yaicunallami canchi.

²⁰Pai huañushpami, quilpashca huarcuriajuj telatapash pascashpa, causaita causagrina mushuj ñandaca, ñucanchiman ricuchirca. Chai telataca, paipaj cuerpotami nijun.

²¹Taita Diospaj huasipica, Jesustami ñucanchipaj jatun curata charinchi.

²²Cunanga, na nij tucushpalla tucui shunguhuambacha crishpa, Diospajman quimirishunchi. Nali yuyaicunamanda ñucanchi shunguta mapa illajta rurashpa, ñucanchi cuerpotapash mapa illaj yacuhuan armashpa quimirishunchi.

²³Diosca, pai carashami nishcataca pactachimungapachami. Paita crishpa cushijushpa shuyajushcataca na cungashpa, shinllitapacha catishunchi.

²⁴Shinallata caishujhuan, chaishujhuan ashtahuan juyarishpa, imata cashpapash alita ruranacunata yarichirishunchi.

²⁵Tandanajunataca, na saquinachu canchi. Shujcunaca, tandanajunata saquijllacunami tian. Ashtahuangarin caishujmanda chaishujmanda aliguta yarichirishpami causana canchi. Jesús tigramuna punlla ña chayamujujta yachashpacarin, ashtahuanmi yarichirina canchi.

²⁶Na llullashpa villajuj shimita yachashca jahua, quiquin munaihuambacha cutinllata juchata rurajpica, cutin chai juchacunamanda huañungapaca, na ashtahuan tianllu.

²⁷Ashtahuangarin Dios ninandapacha llaquichinatallami shuyana. Shinallata Diosta fiñajcunataca, ninanda rupajuj manllanayai ninapashmi langanshna tucuchijunga.

²⁸Moisés mandashca shimicunata na cazunajujta, ishcai cashpa, quimsa cashpapash imashna cashcata ricushpa villajpica, llaquitapash na llaquishpami huañuchin.

²⁹Taita Diospaj Churita sarunshna nalicachishpa, paipaj yahuartapash mapatashna yangapi churashpacarin, ¿nachu ashtahuan ninandapacha llaquichi tucunataca yaringuichi? Dioshuan ari nishcata pactachijujtaca, chai yahuarmi mapara cajta ricuchijun. Chai yahuarllatami, Diospajllata rurashca carca. Ninanda juyaj Diospaj Espirituta nalicachishpa rimajcunaca, ninandapachami llaquichi tucunga.

³⁰“Ñucami, pai llaquichishcashnallata llaquichisha. Ñucami, cuna cashcataca cusha” nijuj Jatun Diostaca rijsinchimi. Shinallata cutinmi, cashna nishca carca: “Jatun Diosca, pai agllashcacuna nalita rurajpica, llaquichingami” nishcami carca.

³¹Causajujlla Taita Diospaj maquipi urmashpaca, ¡aij jatun manllanayaimari!

³²Punda punllacunapi, cangunapaj shunguta Dios punchayachijpi, ima tucushcatapash yarichiyari. Chai punllacunapica, ninan llaquicunata apashpapash, mishajmi carcanguichi.

³³Canguna puramanda huaquingunaca, ninandapacha nalicachi tucushpami, gentecunapaj ñaupajpipash, jatun llaquita aparcanguichi. Huaquingunaca, paicunashnallata llaquichi tucushpami, paicunapaj cumbacuna tucurcanguichi.

³⁴Prezu tiajcunamandapash, ninandami llaquirircanguichi. Imata charishcacunatapash quichujpimi, llaquita aparcanguichi. Chai charishcacunatapash yali, na tucurinallata jahua pachapi japigrinata yachashpami, ninanda cushijurcanguichi.

³⁵Ninan alita japigrina tiajta yariajlla causanataca, napacha cunganachu canguichi.

³⁶Chaita japigringapaca, na ñapash fiñarishpa Taita Dios munashcatalla rurashpami, ali shunguhuambacha causana canguichi. Chashna causashpami, pai carashami nishcataca japigringuichi.

³⁷Escribishcapica cashnami nijun: “Shamunami cani nijujca, ñallapachami shamunga. Paica na uyanangachu.

³⁸Ashtahuangarin imatapash cashcatapacha rurashpa causajca, crishcamandallami causanga. Shina causashpapash huashaman tigrashpaca, na ñucata cushichingachu” nijunmi.

³⁹Ashtahuangarin ñucanchica, na chingaita chingagringapaj, huashaman tigraj puracunachu canchi. Ashtahuangarin ñucanchi alma quishpirichun, Diosta aligutapacha crij puracunami canchi.