Read Imbabura Highland Quichua HEBREOS 11 Bible Online

HEBREOS 11 - Imbabura Highland Quichua bible

HEBREOS 11

¹Imata japigrinata crishcatapash, chaitaca japigrishapacha yashpami shuyanajunchi. Crishcamandami, na ricushpapash japigrinataca aligutapacha yachanchi.

²Chashna crishcamandami ñaupa taitacunaca, ninanda alicachi tucushca.

³Ima tiachumbash Taita Diosca, paipaj Shimihuan rimashpalla churashcataca, crishcamandallami yachanchi. Cunambi ricunajunchi, chaitaca imapash na ricurijmandami, Diosca churarca.

⁴Abel shuti runaguca crishpallami, Caín shuti runatapash yali aligutapacha Taita Diosman animalta carashpa huañuchirca. Crishpa carashcamanda, imatapash cashcatapacha ruraj runagu cajtami, tucuicuna rijsishca. Pai carashcataca, Taita Dios chasquishpa ricuchijpimi, Abel runagu huañushca cajpipash, chai crishcamandaca cunangaman villajun.

⁵Enoc shuti runagutapash, crishcamandallami ama huañuchun causajtallata aparca. Taita Dios apajpimi, paitaca mascashpapash na tarirca. Enoc shuti runaguca, nara apai tucushpallatami, Taita Diosta cushichishpa causajujtaca ricuchijurca.

⁶Ashtahuangarin crishpallami, Taita Diostaca cushichin. Taita Diospajman quimiringapaj pipash munashpaca, pai tiajtaca crinapachami. Paita mascashpa causajcunaman aliguta caranatapash crinapachami.

⁷Crishcamandallami Noé shuti runagupash, Taita Dios imata mandashcatapash cazurca. Imahuan llaquichinata na ricushpapash manllashpami, paipaj huasipi causajcunandi quishpiringapaj, huambuna huasita rurarca. Noé shuti runaguca, chashna crishcamandami, cai pachapi causajcunaca ninanda llaquichi tucunapacha cajta ricuchirca. Alipacha crij cashpami Diosca, imatapash cashcatapacha rurachun Dios carashcata chasquirca.

⁸Abraham runagupash crishcamandallami, Dios cayashcata cazushpa paiman carashapachami nishca llactata japingapaj rirca. Maiman rinatapash na yachashpatami llujshirca.

⁹Abraham runaguca crishpallami, Dios carashapacha nishca llactapica, caru llactamanda shamushca runashna shujcunapaj llactapi causajurca. Isaacpash, Jacobopash chai llactapimi, Abraham causashcashnallata carpacunapi causanajurca. Dios carashapacha nishca llactata japishun yashpami, chashnaca causajurca.

¹⁰Abraham runaguca, shinllitapacha churashca pueblopi causagrinatami shuyajurca. Chai pueblotaca, Taita Diosllata aligutapacha callarichishpa, shinllita huasichishcami.

¹¹Shinallata Abrahambaj huarmi Sarapash crishcamandallami, huahuata tarinata na yachashpapash, vijsayu tucuna ushaita japirca. Payagupacha cashpapash, shuj jari huahuagutami ungurca. Huahuata carashami nishpa villaj Diosca, pactachingapachami yashpa crishpami tarirca.

¹²Shinamandami shujmandalla, Abraham ña huañunalla cajpipash, paimandaca ninanda mirarca. Paicunami, jahua pacha luzerocunashna, mama cucha manñapi tiaj t'iyu alpashna, na cuentai ushanalla mirarca.

¹³Chai ñaupa taitacunaca crishpallami, Dios carashapachami nishcacunatapash, nara japishpallata huañunajurca. Paicunaca, alipacha crij cashpami alicachishpa, jipaman Dios imata pactachinatapash, carumandalla ricunshna crishpa cushijurca. Shinallata: “Caru llactamanda shamushpa purinajunshnami, cai pachapica purinajunchi” nishpami villanajurca.

¹⁴Shina villashpaca, shuj llactapi causangapaj mascashpa purinajujtami aligutapacha yachachirca.

¹⁵Paicuna saquishpa llujshishca llactaman cutin tigranata yarinajushca cashpaca, tigranataca charircapachami.

¹⁶Ashtahuangarin paicunaca, ashtahuan juyailla llactatami munanajurca. Chaica, jahua pachapimi tiajun. Shinamandami Taita Diosca, paicunapaj Taita Diosmi cani ningapaca na pinganayachin. Paillatami, shuj juyailla pueblotapash paicunaman alichishca.

¹⁷Abraham runaguca, ali crij cajta Dios ricungapaj munajpipash crishpallami, Isaactaca Diosman carashpa huañuchingapaj aparca. Dios carasha nishcata chasquishca cashpapash, paipaj shujlla churitaca cararcallami.

¹⁸Paitaca: “Isaacmanda miraicunatami charingui” nishcami carca.

¹⁹“Huañuchijpipash, Taita Dios causachingapaj ushaita charinmi” yashpami, Abrahamga chashna carajurca. Shina crishcamandami, cutin causachijpishna Abrahamga, paipaj churitaca cutin japirca.

²⁰Isaac runagupash cashpallami, Jacobotapash, Esautapash, Dios jipaman imatapash aliguta carachun nishpa bendiciarca.

²¹Shinallata alipacha crij cashpami Jacobopash, ña huañugrijushpaca, Josepaj tucuilla churicunata bendiciajurca. Josepaj taunapi marcarishpami, Diosta ninanda alicachijurca.

²²Josepash crishpallami, ña huañugrijushpaca, israelcuna Egiptomanda llujshinata villajushca. Paipaj tullucunatapash apashpa richunmi mandashca.

²³Moisespaj taita mamapash crishpallami, huahua Moisestaca, quimsa quillacaman pacashpa charishca. Chai huahuaguca juyaillagu cajpimi, huahuacunata huañuchinajuchun, chai llactata jatun mandaj mandashca cajpipash, paicunaca na manllashca.

²⁴Moisespash ña viñashpaca, crishpallami: “Faraonbaj ushipaj churimi cangui” ni tucungapaca na munashca.

²⁵Paica, juchata rurashpa ashacamanlla ninanda cushijushpa causangapaca, na munashcachu. Ashtahuangarin Taita Diospaj gentecunahuan ninanda llaquichi tucunatami ashtahuan munashca.

²⁶Moiseca, Egiptopi ninanda charijyangapaca na munashcachu. Ashtahuangarin ninanda nalicachishpa Cristo rimai tucushcashna, jahua pachapi charijyangapajmi munashca. Dios carajpi japinata yariajlla cashpami, shina causashca.

²⁷Moisesca crishpallami, Egipto llactata jatun mandaj fiñanatapash na manllashpa, chai llactataca saquishpa rishca. Pipaj ñavipipash na ricurij Diostaca ricujunshna yarijushpami, aligutapacha catishca.

²⁸Moisesca crishpallami, pascua fiestata rurachun callarichishca. Paica, pungu jahuacunapi llamapaj yahuarta javichunmi mandashca. Chaitaca, paicunapaj punda huacharishca jari huahuacunata huañuchij ama tacarichunmi shina mandashca.

²⁹Israelcunapash crishpallami, Puca Cuchataca, chaquishca pambatashna yalinajushca. Paicuna ña yalijpimi, Egiptomanda soldadocunapash, paicunashnallata yalingapaj munashpa catinajushca. Paicunataca, yacu ñapash shamushpami pambashca.

³⁰Israelcunaca crishpallami, Jericó shuti pueblota canchiscaman muyushca jipaca, chai pueblo muyundi patacuna urmashca.

³¹Culquimanda huainayashpa causaj Rahab shuti huarmipash crishcamandallami, Diosta na cazujcunahuanga na huañushca. Paimi, chai llactata ricuchun cachashca israelcunataca, aliguta mingachishpa pacashca.

³²¿Imatata ashtahuanga villasha? Gedeón, Barac, Sansón, Jefté, David, Samuel shuti runacunamanda, Dios ima nishcata shuj villajcunamandapash villangapaca, na pactanichu.

³³Paicunapash crishcamandallami, llactacunata jatun mandajcunatapash macanajushpa misharca. Imatapash cashcatapacha rurashpami, Dios carashapacha nishcataca japinajurca. Leongunapaj shimicunatapashmi vicharca.

³⁴Paicunaca, ninanda rupajuj ninatapash huañuchircallami. Filo espadahuan huañuchi tucunamandapash quishpirircallami. Ushaita na charishpapash, macanajuicunapica ninanda shinlli tucurcallami. Shuj llactamanda soldadocunataca, mishashpa calpachircallami.

³⁵Huañushcacunata causachijpi, cutin chasquij huarmicunapashmi tiarca. Ashtahuangarin shujcunaca, ninanda llaquichi tucushpami huañurca. Paicunaca, Dios causachijpi, ashtahuan ali causaita japingapaj munashpami, cacharishunmi nijpipash na munashpa huañurca.

³⁶Shujcunaca ninanda nalicachishpa rimai tucushpami, angucunahuan asti tucurca. Chai jahuapash huatai tucushpami, prezuna huasicunapi churai tucurca.

³⁷Paicunaca, rumicunahuanmi huañuchi tucunajurca. Shinallata sierrahuan cuchui tucushpami huañunajurca. Paicunaca, alipacha crij cajta ricuchingapajmi llaquichinajushca, espadahuambash huañuchi tucurcalla. Llama carata, chivo caratami churajushpa, caiman chaiman purinajurca. Imagupash illaj, manllaihuan, ninanda llaquichi tucushpami purinajurca.

³⁸Cai pachaca, chai ali gentecuna causangapaca na ali carcachu. Paicunaca, jichushca pambacunapi chingashca, urucucunapi, huaicucunapi, utujucunapimi pacajushpa causanajurca.

³⁹Cai tucuilla alipacha crijcunaca, crishcamandami ninanda alicachi tucurca. Ashtahuangarin Dios carashapacha nishcataca, na japishpallatami paicunaca huañurca.

⁴⁰Taita Diosca, ñucanchipaj ali cachunmi, shuj ashtahuan juyaillagutapacha caramushca. Ama paicunalla ima pandatapash na rurajcuna cachunmi alichishca.