Read Imbabura Highland Quichua HEBREOS 12 Bible Online

HEBREOS 12 - Imbabura Highland Quichua bible

HEBREOS 12

¹Shinamandami ñucanchi muyundipica, Diosta alipacha crishcata ashtacacuna ricuchishca tian. Ñucanchipi quipishna urmachingapaj munajuj juchata ruranataca, tucuitami saquina canchi. Shina saquishpami, ñucanchi chayagrinaman na ñapash fiñarishpa ninanda rijunshna ali shunguhuambacha calpana canchi.

²Jesusta ricujunshna catishunchi. Paimi, ñucanchi crichun callarichishpa, aligutapacha crishpa causachun pactachijun. Cushijushpa causagrinata yachashpami, paica cruzpi llaquinayaita chacatai tucushpapash, nalicachishpa rimanajujpipash na pinganayachishpa huañurca. Cunanga, Taita Dios mandashpa tiajuj ali ladomanmi tiajun.

³Juchayu runacuna ninanda llaquichijpi, ninan llaquita apaj Jesustami yarina canguichi. Na shaijushpa na cungashpa, cushijuita japishpami catina canguichi.

⁴Cangunaca, juchata na rurangapaj macanajunajushpapash, huañuchi tucungacaman llaquitaca, nara apashcachu canguichi.

⁵Diosca, paipaj huahuacuna cajpimi, cangunataca aliguta yarichishca. Chaitaca, na cunganachu canguichi. Diosca cashnami nijurca: “Ñuca huahualla, Jatun Dios llaquichijpica, ama yangapi churanguichu. Pai jarcashpa rimajpipash, na shaijunachu cangui.

⁶Jatun Diosca, maijandapash juyashpami llaquichin. Shinallata paipaj huahua cachun, pai chasquishcacunataca tucuicunatami astin” nijurcami.

⁷Cangunapaj ali cachunmi Taita Diosca, paipaj huahuacuna cajpi, ima llaquitapash cachamun. Chaitaca, ali shunguhuan apanguichilla. ¿Maijan churitata, taitaca na llaquichishpa charin?

⁸Ashtahuangarin canguna nalita rurajpipash na astishpa saquijpica, napacha paipaj huahuacunachu canguichi. Ashtahuangarin shuj taitapaj huahuacunami canguichi.

⁹Ñucanchica cai pachapica, astishpa viñachij taitatami charircanchi. Astijpica, cazushpami causarcanchi. Shina cashpaca, ñucanchiman espirituta caraj Taitatacarin, ¿nachu ashtahuan aliguta cazuna canchi? Shina rurashpaca causagrishunmi.

¹⁰Ñucanchi taitacunaca, asha punllacunatallami paicunapi imashna ali canata ricushpa astin carca. Ashtahuangarin Diosca, ñucanchipaj ali cachun, paishnalla jucha illaj cachunmi, ñucanchitaca astijun.

¹¹Na llullashpami, cashna ninchi. Ima llaqui cunambi japijpipash napacha cushijui ushanashnallachu, ashtahuangarin llaquiringapajmi. Shina cajpipash, ali causaiguta charishpa, imatapash cashcatapacha rurashpa, granota fucuchinshna causashpami, juyailla causanata japinchi.

¹²Shinamandami cangunapaj shaijushca maquitapash, na cuyurij cunguritapash shinlliyachina canguichi.

¹³Canguna purina chaqui ñangunataca, alichinami canguichi. Jangacuna ñanmanda ama llujshishpa ali tucuchunmi, chashna rurana canguichi.

¹⁴Tucuicunahuan casilla aliguta causanata Diospajlla causanata catishpa causaichi. Pipash na chashna causashpaca, Jatun Diostaca napacha ricungachu.

¹⁵Aligutapacha ricushpa catinguichi, Maijan cashpapash pactara Taita Dios ninanda juyashpa caramujujta japinata saquinman. Chashna rurashpara, jayaj jihuapaj sapi llujshimunshna cangunataca muspachijunman. Chaihuanra ashtacacuna mapayanajunman.

¹⁶Pactara canguna purapi maijambash huainayaj, na cashpaca Esaú shuti runashna Diosta yangapi churashpa causajra tianman. Esaú runaca punda churi cashpa, ashtacata japinata charishcataca, shuj asha micunapajllami jatushca.

¹⁷Chai jipaca, taitapaj bendicionda japingapaj munajpipash, na cushcachu. Chaita japingapaj ninanda llaquirishpa huacajujpipash, na cutin tigrachi ushashcachu. Chaitaca yachanguichimi.

¹⁸Israelcuna chayashpa tacarinalla urcumambash, cangunaca na chayashcachu canguichi. Chai urcuca, nina rupajuj, ninanda yanayajuj, ninan huairahuan tamiajuj urcumi carca.

¹⁹Chaipimi, trompeta huacajpash, Dios rimajpash, ninanda uyarijurca. Shina uyarijpi na uyai ushashpami, ama ashtahuan rimachun ninanda mañanajurca.

²⁰“Ima animalpash, cai urcuman chayamujpica, rumihuan cashpa, flechahuan cashpapash huañuchinami” nishpami, Diosca mandajurca. Chaita na uyai ushashpami, shina ninajurca.

²¹Paicuna ricujujca ashtahuan ninan manllanayai cajpimi, Moisesca: “Ninanda manllashpami chujchujuni” nijurca.

²²Ashtahuangarin cangunaca, Sion shuti urcumambash, causajuj Taita Diospaj jahua pachapi tiajuj Jerusalenmambash, huaranga huaranga angelcuna tianajujpaj ñaupajmambash chayashcami canguichi.

²³Jahua pachapi tiaj libropi shuticunata escribichishca, Diospajlla tandanajushca, punda huacharishca huahuacunapajmambash chayashcami canguichi. Tucuicuna imata rurashcata ricuchij Taita Diospajmambash, imatapash cashcatapacha rurashpa, ima pandapash illajcunapaj almacunapajmambash chayashcami canguichi.

²⁴Dios mushujta rurangapaj ari nishcataca pactachij Jesuspaj ñaupajmambash, pai ñucanchimanda jichashca yahuarmambashmi chayashcanguichi. Paipaj yahuarmi, Abel shuti runapaj yahuartapash yali ushaita charin.

²⁵Cangunata rimajta ama yangapi churangapaca, aliguta yarinami canguichi. Cai pachapi shinlli tacurijujta yangapi churajcunapash, ninanda llaquichi tucunamandaca na pacajui usharcachu. Jahua pachamanda shinlli tacurijujta yangapi churashpacarin, ñucanchica napacha pacajui ushashunllu.

²⁶Ñaupa punllacunaca, alpa mamapash cuyujtami Diosca rimarca. Cunangarin cashnami nirca: “Cutin cuyuchisharami. Na cai pachatalla cuyuchishachu, ashtahuangarin jahua pachandimi cuyuchisha” nircami.

²⁷“Cutin cuyuchishami” nishpaca, Dios rurashca cuyurinalla tiajcunataca anchuchinatami shina nijun. Shina anchuchijpipash, na cuyurinallacunaca chashnallatami canga.

²⁸Dios mandajuj, na cuyurinalla llactatami japinchi. Shinamandami Diosta pashi nishpa, tucui shunguhuan manllashpa, alicachishpa causana canchi.

²⁹Ñucanchi Taita Diosca, ninashna rupachishpa tucuchijmi.