Read Imbabura Highland Quichua HEBREOS 13 Bible Online

HEBREOS 13 - Imbabura Highland Quichua bible

HEBREOS 13

¹Caishuj chaishuj juyarishpa causanaca, cangunamandaca ama anchurishca cachun.

²Mingachinatapash, na cunganachu canguichi. Huaquingunaca, maijan cajta na rijsishpapash, cushijushpa mingachishpami, angelcunata mingachishca.

³Prezu tiajcunatapash, canguna paicunahuan prezu tiajunshnallatami yarina canguichi. Ninanda llaquichi tucujcunatapash, canguna llaquita apanajunshnallatami yarina canguichi.

⁴Cazaraipash tucuipi alicachi tucushca cachun. Ama mapayashpallata cazarachun. Nara cazarashpallata huainayashpa causajcunata, cazarashca jahua shujhuan causajcunataca, Taita Diosmi ninanda llaquichinga.

⁵Shinamandami, imata cashpapash charijyanata munashcamandalla na rurana canguichi. Cunan imaguta charishpapash, chaihuanlla cushijushpa causanguichi. Diosca cashnami nirca: “Candaca na jichushachu, na saquishachu” nircami.

⁶Shinamandami cushijushpa, cashna ni ushanchi: “Ñucata ayudajca, Jatun Diosmi. Shina cashcamandaca, gentecuna imata ruranatapash, na manllashachu” ni ushanchimi.

⁷Cangunata michijcuna, Diospaj Shimita cangunaman villanajushcataca yariashpa causaichi. Paicuna crishpa causanajushpa imashna catijta aliguta ricuichi. Shina ricushpaca, paicuna causanajunshnallata causaichi.

⁸Jesucristoca pundacunapash, cunambash, causaita causaicamambash paillatami.

⁹Na uyashca shimicunata, shuj shuj yachajunacunata yachachishpa cangunata umachinajuchunga, na saquinachu canguichi. Diospaj ninan juyaihuan cangunapaj shunguta shinlliyachinaca alipachami. Imapash micunamanda yachachishcatalla catishpa shinlliyachinaca, napacha alichu. Chaitalla ricushpa catijcunapaca, chaica imapajpash na alichu.

¹⁰Ñucanchica, shuj altartami charinchi. Diospaj jatun carpapi paita servij curacunapash, chai altarmanda japishpa micuitaca na ushanllu.

¹¹Ashtahuangarin animalcunapaj aichataca, gentecuna causanajuj carpacunamanda llujchishpami carupi rupachinajun. Chai animalcunapaj yahuartaca, curacunata mandaj curami, Diospajlla shicanyachishca ucuman apashpa, gentecunapaj juchamandaca Diosman cujun.

¹²Shinallatami Jesuspash, gentecunata Diospajlla cachun rurangapaca, pueblo ucumanda canllaman llujchi tucushpa, paipaj yahuarhuan maillangapaj, ninanda llaquichi tucushpa huañurca.

¹³Ñucanchipash, gentecuna causanajushcamanda llujshishpa, Jesús nalicachi tucushpa rimai tucushcashnallata, llaquichi tucushunchilla.

¹⁴Cai pachapica, na causaita causana llactata charishcamandami, shuj juyailla llactapi causanata shuyanajunchi.

¹⁵Shina cashpaca, Diosman animalta cushpa huañuchinshna, Jesusmandaca Taita Diosta punllandi alicachishunchi. Shina nishpaca, grano fucujunshna paipaj shutita ñucanchi shimihuan villanatami ninchi.

¹⁶Shinallata caishujman, chaishujman imagutapash carashpa aliguta ruranataca, na cunganachu canguichi. Shina rurashcatami, Taita Diosman carashpa rupachijpishna paica cushijun.

¹⁷Cangunata michijcunataca, cazushpa causaichi. Paicuna mandajpi causaichi. Paicunami, imata rurashcatapash Diosman villanata charishpa, cangunapaj almacunamandaca na puñunshna causanajun. Cushijuihuan na llaquirishpa, imatapash rurachunmi cazuna canguichi. Paicuna canguna llaquichijpi llaquirishpa chashna ruranajushpaca, cangunapaca napacha alichu.

¹⁸Ñucanchimandapash Diosta mañapanguichi. Ñucanchipash ali yuyaihuan, tucuita aliguta rurangapaj munashpami, chaita ruranata yariajlla causanajunchi.

¹⁹Ashtahuambachaca caimanda cangunapajman ñuca ucha tigrangapajmi, chashna ninanda mañapanguichi nipani.

²⁰Casilla ali causaiguta caraj Taita Diosmi, ñucanchi Apunchi Jesucristotaca, huañushcacunapaj chaupimanda causachirca. Jesucristoca, llamacunatashna ñucanchita jatun Michijmi. Diosca, Jesucristo yahuarta jichashpa huañujpimi, causaita causaicaman pai pactachirca.

²¹Diosllata, pai munashcashna canguna imagutapash tucuita aliguta rurai ushachun yachachijuchun, shinallata Jesucristomanda, pai munashcashna ñucanchi imatapash rurachun, yachachijuchun ninimi. Jesucristotaca, causaita causaicaman ninanda alicachishunchi. Shina cachun.

²²Huauquicuna, panicuna, cangunata aliguta yarichishpa, cai asha shimicunatalla ucha escribimushcataca, ali shunguhuambacha uyapanguichi nipanimi.

²³Ñucanchi huauqui Timoteotaca, ñami prezumanda cacharishca. Chaitaca yachachunmi munani. Pai uchalla shamujpica, cangunata ricungapaj shamushami.

²⁴Cangunata michijcunatapash, Diospajlla causajcunatapash, tucuicunata alillachu capanguichi nijunmi nishpa villapaichi. Italia llactapi causanajuj crijcunapashmi, cangunataca alillachu capanguichi ninajun.

²⁵Taita Diospaj ninan juyaica, tucui cangunahuan cachunmi munani. Shina cachun.