Read Imbabura Highland Quichua HEBREOS 2 Bible Online

HEBREOS 2 - Imbabura Highland Quichua bible

HEBREOS 2

¹Shina cashcamandami ñucanchica, imata uyashcatapash, ashtahuan imata cashpapash ucha rurana canchi. Na chashna catishpaca pandarishunchimi.

²Ñaupa punllacunapi angelcuna villashca shimicunaca, napacha llullachu carca. Chaita na cazushpa nalita rurashcamandami, cuna cashcashnallata cujpi japinajurca.

³Cai juyailla quishpirinata nalicachishpa saquishpaca, ¿imashnata ninanda llaquichi tucunamandaca, pacajui ushashun? Imashna quishpirinatapash, Apunchi Jesusmi pundata ña villashca. Chai jipami, pai villashcata uyajcunaca, alipacha yachashpa villarca.

⁴Taita Diosca, chashnapachami nishpa paicunahuan villajushpami imatapash juyaillaguta ricuchinacunahuan, pipash na rurai ushanallacunahuan, imatapash juyailla ruranacunahuan, paipaj jucha illaj Espiritupaj munaihuan villajurca.

⁵Mushuj llacta shamunamandami, cunanga villanajunchi. Chai llactata mandachunga Diosca, na angelcunaman ushaita carashcachu.

⁶Ashtahuangarin Dios escribichishca Shimipica, maijanllarimi shuj pushtupi cashna nishpa villajushca: “Runaca, ¿ima cajpita paitalla yariangui, na cashpaca huañuna aichayu runataca, imamandata ricuj shamungui?

⁷Paitaca, ashamandallami na angelcunatashna rurashcangui. Paitaca, juyailla coronata churachinshnami, ninanda alicachishcangui. Paitaca, cambaj maquihuan rurashcacunata mandachunmi rurashcangui.

⁸Tucui imata cashpapash, paipaj chaquihuan saruchishpami cazuchishcangui” nijushcami. Tucui imatapash cazuchishpa charijushpami, imallapash paita na cazushpa tiajuchunga, na saquirca. Ashtahuangarin tucui imatapash cazuchijujtaca, nara ricui ushashpami causanchi.

⁹Ashtahuangarin Jesustaca, ashamandalla na angelcunatashna rurashcatami ricunchi. Ninan llaquita apashpa huañujpimi, Jesustaca juyailla coronata churachinshna ninanda alicachirca. Taita Diospaj ninan juyaimandami, tucuicunamanda huañunata munachun, chashna rurarca.

¹⁰Ashtahuangarin ima cashpapash tucuita ruraj Diosmandallami, tucui imapash tiajun. Paica, paipaj huahuacuna tucujpi ashtacacunata, paipaj punchapamba llactaman Jesucristo pushachunmi munan. Jesucristoca, llaquicunata apashpa aliguta pactachishpami, pailla quishpichingapaj callarishca.

¹¹Diospajlla causachun rurajpash, Diospajlla causajcunapash, shujlla Taitapajmi canchi. Chaimandami Jesusca, ñucanchita huauquicuna, panicuna ningapaca, na pinganayachin.

¹²Paillatami cashna nijushca: “Cambaj shutitami, ñuca huauquicunaman villasha. Tandanajushcapaj chaupipimi, candaca alicachisha” nijushcami.

¹³Cashnatapashmi nijushca: “Diostallami yariashpa causasha” nijushcami. Cutimbashmi cashna nijushca: “Ricuichi, Taita Dios ñucaman carashca huahuacunandimi, caipi cani” nijushcami.

¹⁴Chai huahuacunaca aichatapash, yahuartapash charinmi. Shinallatami Jesuspash aichayu, yahuaryu tucurca. Huañuita mandana ushaita charij diablota, Jesús huañushpa tucuchingapajmi, chashna tucurca.

¹⁵Shinallata huañunata manllashpa, tucui causaipi huatai tucushcashna causajcunata cacharingapajmi, chashna tucurca.

¹⁶Paica, angelcunataca napacha ayudarcachu. Ashtahuangarin taita Abrahambaj miraicunatami ayudarca.

¹⁷Chaipajmi Jesusca, imapi cashpapash, paita crijcunashnallata tucuna carca. Shina tucushpami, Taita Diospajta rurashpa, ninanda llaquij cashpa, tucuita pactachij cashpa, curacunata jatun mandaj tucurca. Shina tucushpami, gentecunapaj juchacunatapash anchuchirca.

¹⁸Jesusllatapashmi pandachingapaj munaj llaquicunata japirca. Shinamandami, pandachi tucugrijujta ayudangapaca, paica ninan ushaita charin.