Read Imbabura Highland Quichua HEBREOS 3 Bible Online

HEBREOS 3 - Imbabura Highland Quichua bible

HEBREOS 3

¹Shina cashcamanda Diospajlla tucushca huauquicuna, panicuna. Cangunaca, jahua pachapi causagringapajmi, cayai tucushcacuna canguichi. Chaimandami Cristo Jesustaca, villaj cajta, curacunata mandaj cajta crishpa, na cungashpa catina canguichi.

²Taita Diospaj huasipica, tucuitami aliguta Moisesca pactachishca. Shinallatami Jesuspash, Dios mingashcataca, tucuita aliguta pactachijun.

³Maijan huasichijpash, chai huasita yalimi alicachi tucun. Shinallata Jesuspash, Moisesta yalimi alicachi tucunata charin.

⁴Huasicunaca, pipash huasichijpillami tian. Ashtahuangarin tucui caicunata rurashpa churajca, Taita Diosmi.

⁵Moisesca, Taita Diospaj huasipica, tucuipimi aligutapacha servishpa pactachijushca. Jipa punllacunapi, imata villachinatapash villanapacha cajtami, Moisesca ricuchijushca.

⁶Ashtahuangarin Cristoca, Diospaj Churi cashpami, Diospaj huasitaca aligutapacha mandajun. Ñucanchica, cushijushpa shuyajushcamanda, tucurimui punllacaman paita aliguta crishpa shinllipacha shuyajushpaca, Dios causajuj huasishnami canchi.

⁷Shinamandami, Diospaj jucha illaj Espirituca, cashna nijun: “Dios ima nijujta cunan uyashpaca,

⁸na shinlli shungu tucunachu canguichi. Jichushca pambapi imatapash rurana munai shamujpi, Diosta ninanda fiñachishcashnaca, na tucunachu canguichi.

⁹Chaipimi, cangunapaj ñaupa taitacunaca, ñuca imata rurajta ricungapaj paicuna munashcata rurachun mañashpa fiñachihuarca. Shinallata ñuca imata rurajujtapashmi, chuscu chunga huatacaman ricunajurca.

¹⁰Shinamandami chai miraicunahuanga, fiñarishpa cashna nircani: ‘Punllandimi, paicunapaj shungupica, yangacunatalla yarishpa purinajun. Ñuca munashcashna causanataca, na rijsinllu’ nircanimi.

¹¹Shina cashcamandami, ñuca ninanda fiñarishpa: ‘Ñucahuan samangapaca, napacha yaicungachu’ nishpa juramenturcani” nijunmi.

¹²Ricuichi huauquicuna, panicuna. Canguna purapica, nali shungu tucushpa, causajujlla Taita Diostapash na crishpa anchurijcunaca, maijanllapash ama tiachun.

¹³Ashtahuangarin cunan causajushpallata, punllandi caishuj chaishuj aliguta yarichirishpa causaichi. Juchata rurana yuyai pandachij shamujpipash, canguna purapica pipash ama shinlli shungu tucungapajmi, chashna causana canguichi.

¹⁴Cristota crishca punllamandapacha, tucurimui punllacaman paita aliguta catishpaca, Cristo japijushcashnallata ñucanchipash japigrinatami charinchi.

¹⁵Dios escribichishca Shimipica, cashnami nijun: “Pai rimajujta cunan uyashpaca, ñaupa punllacuna fiñachinajushcashnaca, na cangunapaj shunguta shinlliyachinachu canguichi” nijunmi.

¹⁶Dios rimajujta uyashcata na cazushpa fiñachijcunaca, ¿picunata cashcanga? ¿Nachu Moisespaj maquihuan llujchimujpi, Egiptomanda tucui llujshimushcacuna fiñachinajushca?

¹⁷¿Picunahuanda Diosca, chuscu chunga huatacaman nali cashcanga? ¿Nachu jichushca pambapi juchata rurashpa huañujcunahuan nali cashcanga?

¹⁸¿Picunatata Diosca: “Ñucahuan samangapaca, napacha shamui ushanachu canguichi” nishpa juramentushca? ¿Nachu paita na cazujcunata, chashna nijushca?

¹⁹Paicunaca na crishcamandami, Dioshuan samangapaca, na yaicui ushashcata ricunchi.