Read Imbabura Highland Quichua HEBREOS 6 Bible Online

HEBREOS 6 - Imbabura Highland Quichua bible

HEBREOS 6

¹Shina cashcamandaca, Cristomanda punda yachachi callarijpi fangalla yachajushcataca saquishpa, ima pandatapash na rurashpa causangapaj ñaupajman rishunchi. Huañushcashna causanajushpa nalita ruranajushcamanda, ninanda llaquirishpa Taita Diosta crishpa yachajui callarishcamanllataca, ama cutin tigrashpa ñaupajman rishunchi.

²Shinallata bautizarinamanda, crijcunapaj uma jahuapi maquita churanamanda, huañushcacuna causarinamanda, causaita causaicaman ninanda llaquichi tucunamandaca, chaitallata tigrashpaca na yachajunachu canchi.

³Taita Diospaj munaipacha cajpica, caitami yachajushpa catishunchi.

⁴Huashaman tigrashpa cutin Diospajman tigranataca, napacha ushanallachu. Ima horas ña crishpaca, paicunapaj shunguta Dios punchayachijpimi, jahua pachamanda caramushcata alicachishpa chasquinajurca. Shinallata Diospaj jucha illaj Espiritupash japijpimi causanajurca.

⁵Shinallata Taita Diospaj juyailla Shimitapash, shamui punllacunapaj ninan ushaitapash alicachishpami chasquinajurca.

⁶Chai tucuita chaquishca jahua, huashaman tigrashpaca, cutin ninanda llaquirishpa Diospajman tigraitaca, napacha ushangachu. Paicunaca, Taita Diospaj Churita cutin chacatanshna nalicachishpa rimachingapajmi, chashna ruranajun.

⁷Tarpujcuna micuchunga, cutin cutin tamiajpimi, alpaca yacuta chupashpa aligutapacha viñachimun. Shina viñachimujpimi tarpujcunaca, Taita Dios bendiciajpi fucushcata japin.

⁸Ashtahuangarin cashacunalla, nali jihuacunalla jundashca alpaca nalichu. Shina cashpami chai alpaca, ña ninanda nalicachi tucunalla tiajun. Tucurimui punllapica, rupashpami tucuringa.

⁹Juyashca crijcuna, cangunamanda parlashpaca, ña quishpirishcatami yachanchi. Shina parlajushpapash Diosca, aliguta caranatapachami yachanchi.

¹⁰Taita Diosca, imatapash cashcatapacha ruraj cashpami, canguna imatalla ruranajushcataca na cungan. Paipaj shutita juyaimanda, Diospajlla causajcunaman cunangaman canguna chashna rurashpa catinajushcamandami, na cungan.

¹¹Ashtahuangarin cangunaca, tucurimui punllacaman chashnallata aliguta catichunmi, ninanda munanchi. Canguna shuyanajushcataca, Dios tucuita pactachingacamambacha catichunmi munanchi.

¹²Na quillanayachinachu canguichi. Ashtahuangarin Dios carashapacha nishcacunata crishpa, na ñapash fiñarishpa shuyashpa japijcunata ricushpa, cangunapash paicunashnallata catichunmi munanchi.

¹³Taita Diosca, Abrahamman carashapacha nijushpaca, Diosta yali jatunga pipash na tiajpimi, paipaj shutipillata juramentushca.

¹⁴Paica, cashna nishpami juramentushca: “Candaca ninandapacha bendiciashpami, canmandaca ninanda mirachisha” nishcami.

¹⁵Abrahamga, na ñapash fiñarishpa shuyashpami, Dios carashapacha nijushcataca japirca.

¹⁶Gentecuna juramentushpaca, paicunata yali jatumbaj shutipimi juramentun. Paicuna parlanajushcata ama cutin tigrashpa parlangapajmi juramentun.

¹⁷Shinallatami, Taita Diospash pai carashapachami nishcata japijcunaman carashpa pactachinapacha cashcata ricuchingapaca juramentun.

¹⁸Taita Diosca, cai ishcai shimita rimashcataca, napacha chashna nircanichu nishpa llullaitaca na ushanllu. Pai carashapacha nishcata japigringapaj yariajlla shuyajcunaca, ninandapacha cushijushunchi.

¹⁹Chashna shuyanami, barcota jirru charijunshna ñucanchi almataca, shinllitapacha charijun. Shinallata telahuan quilpashca tiajuj ucumambashmi yaicuchun ushaita cujun.

²⁰Chai ucumanmi Jesusca, ñucanchi yaicuna ñanda pascashpa yaicushca. Paica, Melquisedec curashnami causaita causaicaman, curacunata mandaj tucurca.