Read Imbabura Highland Quichua HEBREOS 8 Bible Online

HEBREOS 8 - Imbabura Highland Quichua bible

HEBREOS 8

¹Cunanga, curacunata mandaj curata charishcatami, ashtahuambachaca villashpa catimushcanchi. Paica, jahua pachapi mandana ushaita charij Dios mandashpa tiarina ali ladomanmi tiarirca.

²Paica, Diospajlla huasipimi Diospajta rurajun. Chai jatun carpataca, runacunaca na shayachishcachu, ashtahuangarin Jatun Diosmi shayachishca.

³Curacunata mandaj tucui curacunaca, imagutapash Diosman carangapaj animalcunata Diosman cushpa huañuchingapajllami churai tucushca. Shinamandami Jesuspash, Diosman imagutallapash caranata charin.

⁴Paica, cai pachapilla causajushpaca, curallapash na tucunmanllu carca. Mandashcapi nijunshna, Diosman imagutapash cungapaca, caipipash curacuna tianmi.

⁵Paicunaca, jahua pachapi tiajcunata llandushna ricuchijcunatami servinajun. Chai huasita Moisés ruragrijujpica, chashna canata villashpami, Diosca cashna nirca: “Ricui, canman urcu jahuapi ñuca ricuchishcashna, tucuita aliguta rurangui” nircami.

⁶Ashtahuangarin cunanga Jesusca, chai curacunatapash yali ashtahuan alitami, Diospajta ruranata charin. Dios ashtahuan alipacha ari nishcataca, Jesusmi Diosta gentecunamanda mañashpa pactachijun.

⁷Dios punda ari nishcapi ima huaglipash illajpica, napacha shuj mushujta rurangapaj, ari ninmanllu carca.

⁸Diosca, jarcashpa rimashpami cashna nirca: “Jatun Diosca cashnami nin: ‘Ricuichi, Israel llactapi, Judá llactapi causajcunahuan shuj mushujta ari nina punllacunami chayamujun.

⁹Paicunapaj ñaupa taitacunahuan ari nishcashnaca, na rurashachu. Paicunahuanga, maquimanda japishpa, Egipto llactamanda llujchimujui punllapimi ari nircani. Paicunaca, chaipi ari ninajushcataca na pactachishpa causanajurcachu. Chaimandami, ñucapash paicunata jichushpa saquircani’ ninmi Jatun Diosca.

¹⁰Shinamandami Jatun Diosca, cashna nin: ‘Chai punlla jipacunapica, israelcunahuanga cashna ruranatami ari nisha: Ñuca mandashcacunataca, paicunapaj yuyaipimi churasha. Paicunapaj shungupimi, escribinshna churasha. Shina rurashpami, paicunapaj Taita Dios casha, paicunapash ñuca agllashcacunami canga.

¹¹Chaipica, pipash paipaj huauquita cashpa, shujcunata cashpapash: Jatun Diosta rijsinami cangui nishpaca, na yachachijungachu. Paicunaca, tucuicunami uchillamanda callarishpa, jatungunacaman rijsihuanga.

¹²Paicuna imatapash cashcatapacha na rurashca cajpipash, llaquishami. Paicunapaj juchacunatapash, jatun nalita rurashcatapash, napacha ashtahuan yarishachu’ nijunmi” nijurcami.

¹³Shuj mushujta rurangapaj ari nishpaca, punda ari nishca ña maucayashca cajpimi, chashnaca nishca. Chai punda ari nishcapash, ña maucayashca cashpami, ña tucurigrijun.