Read Imbabura Highland Quichua HEBREOS 9 Bible Online

HEBREOS 9 - Imbabura Highland Quichua bible

HEBREOS 9

¹Shina cajpipash, punda ari nishpapash, Diosta mañashpa paipajta mañanatami mandashca. Shinallata cai pachapipashmi, Diospajlla huasita charishca.

²Diospaj jatun carpataca, cashnami rurashca cashca: Punda ucuca, Diospajlla ucumi cashca. Chaipica, candelero nishcapash, Diosman shicanyachishca tandacunata churana mezapashmi tiajushca.

³Chaipaj cati, telahuan quilpashca huasha ucupica, jatun carpapillatami, Diospajlla shicanyachishca ucu tiashca.

⁴Chai ucupica, inciensota cushnichina oro altarpash, Dioshuan ari ninajushpa escribishcata alichina, muyundita orohuan quilpashca arcapashmi tiajushca. Chai arcapica, maná shuti micunata alichishca tiajuj oro mangapash, Aarón charishca cutin verdella viñashca varapash, Dioshuan ari ninajushcata escribishca tabla rumicunapashmi tianajushca.

⁵Chai arca jahuapica, punchapamba querubín nishcacunami, juchacunata Dios anchuchijujta ricuchishpa, alascunahuan quilpashca tianajushca. Chaicunamandaca cunambica na callarishpa, tucuita parlanata charinichu.

⁶Diospaj jatun carpa callari ucupi chashna tucuita alichishca tiajujpimi curacunaca, Diosta yaringapaj punllandi imatalla ruranacunata rurangapaj yaicunajun.

⁷Ashtahuangarin curacunata mandaj curallami, huatapi shuj viajella cati ucuman yaicuita ushan. Chaimanmi, paipaj juchacunamandapash, gentecuna na yachaimanda rurashca juchacunamandapash, animalcunapaj yahuarta Diosman cungapaj apashpa yaicun.

⁸Chaicunahuanga, Diospaj jatun carpapica, punda ucuman yaicushpa imata rurangapajpash, Diospajlla shicanyachishca ucuman yaicunataca, nara ricuchishcatami, Diospaj jucha illaj Espirituca yachachijun.

⁹Chaicunaca, cunambi chimbapurashpa yachajunatami ricuchijun. Diosman imatapash carashpa, Diosman animalcunatapash carashpami huañuchinajun. Diosta mañashpa imata rurashcapash, paicunapaj shungu alitalla yarichunga, napacha alichi ushanllu.

¹⁰Chai mandashcacunaca imata micunata, ufianata, imashnalla mapa illaj tucunata, cuerpopi mapayashca cashpa, imacunatalla rurachun mandanacunatallami villajun. Chaicunata ruranataca, Dios mushujta pactachina punllacamanllami charirca.

¹¹Ashtahuangarin Cristoca, ñamari shamushca. Paimi, curacunata mandaj cashpa, imatapash aliguta carangapaj apamushca. Diospaj jatun carpaca, punda tiashcatapash yali ashtahuan jatunmi, ashtahuan juyaillagumi. Chai carpataca, na runacuna rurashca cajpimi, na cai pachapi tiajun.

¹²Cristoca, causaita causaicaman quishpichinata japishpami, Diospajlla shicanyachishca ucuman shuj viajella yaicurca. Paica, na jari chivocunapaj, shicucunapaj yahuarta apashpa yaicurcachu. Ashtahuangarin paipaj yahuarhuambachami yaicurca.

¹³Jari huagracunapaj, jari chivocunapaj yahuartapash, huarmi shicuta rupachishca uchufatapash, mapata ruraj gentecunapajpimi tsirapachinajun. Shina rurashpaca, cuerpopi mapatalla anchuchishpami, Diospajlla cachun ruranajun.

¹⁴Cristopaj yahuarca, ¿nachu chaitaca yali ushaita charin? Causaita causajuj Diospaj Espiritumandami Cristoca, ima mapapash illaj cashpa, paillata Taita Diosman cararishpa huañurca. ¿Nachu chai yahuarca, causajujlla Taita Diosta servinajuchunga, huañuiman apajuj nali munaicunata rurashcamanda, nali yuyaicunata charishcata anchuchi ushan?

¹⁵Shina cashpami, gentecunahuan mushujta rurangapaj Dios ari nishcataca, paica pactachijun. Pai huañushpami, punda ari nishcata na cazushcataca anchuchirca. Dios agllashcacunaca, causaita causanata chasquichunmi, chashna huañurca.

¹⁶Imatapash carashami nishpa escribishca tiajpica, chai carashami nishpa escribij runa huañunapachami.

¹⁷Carashami nij runa huañujpillami, japi ushan. Chai carashami nishpa escribij runa causajujpica, imapash na alichu.

¹⁸Shinallata punda ari nishcapash, animalcunapaj yahuarhuanllatami callarishca.

¹⁹Mandashca shimicunapi imata nijujtapash, Moisesca tucuicunaman villashca jipallami shicucunapaj, jari chivocunapaj yahuarta yacundi japishpa, hisopo nishca yura malquipi, puca milmata huatashpa mutiyachishca. Shina mutiyachishpami, pai charijuj libropipash, tucui gentecunapipash tsirapachishca.

²⁰Moisesca cashnami nishca: “Ñucanchihuan Taita Dios ari nishcataca, cai yahuarmi ricuchijun” nishcami.

²¹Chashna rurashca jipapashmi Moisesca, Diospaj jatun carpapipash, Diospajta rurangapaj chai ucupi ima tiashcacunapipash tsirapachishca.

²²Mandashca shimipi nishcashna yahuarta tsirapachijpimi, ashamandalla na tucuilla mapa illaj tucun. Yahuarta na jichashca cashpaca Diosca, juchacunataca na anchuchinmanllu.

²³Jahua pachapi ima tiajujcunaman rijchajta caipi rurashcacuna mapa illaj cachunmi, animalcunapaj yahuarta jichanapacha carca. Ashtahuangarin jahua pachapi imalla tiajujcunaca, animalcunapaj yahuartapash yali alipacha yahuartami minishtin.

²⁴Cristoca, na runacuna rurashca, Diospajlla huasiman yaicurcachu. Ashtahuangarin jahua pachapi tiajuj Taita Diospaj ñaupajmanmi, ñucanchimanda cararingapaj yaicurca. Chai carpaca, jahua pachapi Diospaj huasi tiajujtapachami ricuchijushca.

²⁵Animalpaj yahuarta apashpa, huatapi huatapi Diospajlla shicanyachishca ucuman, curacunata mandaj cura yaicunashnaca na yaicurcachu. Ashtahuangarin Cristoca, cutin cutin Diosman cararishpa huañungapaca, na yaicurcachu.

²⁶Shina cashpaca, cai pachata rurai punllamandapacha, cutin cutin huañunatami charinman carca. Ashtahuangarin cunan tucurimui punllacunapimi Cristoca, shuj viajella shamushpa, gentecunapaj juchacunataca anchuchingapaj, Diosman cararishpa huañurca.

²⁷Shinallatami gentecunatapash, tucuicuna shuj viajella huañuchun churashca. Chai jipaca, llaquichi tucuchunmi churashca.

²⁸Shinallatami Cristoca, ashtacacunapaj juchacunata anchuchingapaj, Diosman paillata shuj viajella cararishpa huañurca. Paica, juchacunata anchuchingapaca na shamungachu. Ashtahuangarin pai shamunata shuyajcunata quishpichingapajmi shamunga.