Read Imbabura Highland Quichua SANTIAGO 1 Bible Online

SANTIAGO 1 - Imbabura Highland Quichua bible

SANTIAGO 1

¹Taita Diosta, Apunchi Jesucristota servij Santiagomi cani. Caiman chaiman rishca causanajuj chunga ishcai Israel aillucunatami, alillachu capanguichi nini.

²Ñuca juyashca huauquicuna, panicuna, shuj shuj llaquicunata japishpapash, ninanda cushijushpa causanguichi.

³Crij cashpa llaquicunata apanaca, na ñapash fiñarishpa causanatami yachachijun. Chaitaca yachanguichimi.

⁴Ashtahuangarin na ñapash fiñarishpa causanami, tucuita aligutapacha yachachijun. Shina causashpami ima pandatapash na rurashpa, alipacha crij, imagupash na illajpi, tucuita charinguichi.

⁵Canguna purapi ali yachaita maijambash na charishpaca, Taita Diostami mañana canguichi. Paica carangapachami. Pimambash na mitsashpa, ashtacata caramunga.

⁶Ashtahuangarin na ishcai shungu tucushpa, alipacha crishpa mañachun. Ishcai shungu tucushpa mañajcunaca, mama cucha yacuta huaira caiman chaiman shitajunshnami.

⁷Maijambash chashna mañashpaca, Jatun Dios imagutapash carajpi chasquinataca ama yajuchun ninimi.

⁸Ishcai shungu tucushpa mañaj runaca, imata rurashpapash, aliguta causaitaca na ushanllu.

⁹Na jariyashpa purij crijcunaca, Dios jatumbi churajpi cushijuchun ninimi.

¹⁰Ashtahuangarin ninanda charij cajpi Dios quichujpica, cushijuchun. Ninan charij runaca, jihua sisa chaquinshnami tucuringa.

¹¹Indi llujshimushpa ninanda rupajpica, jihuaca chaquinllami. Shinallata sisa urmajpica, chai juyailla tiajushcapash tucurinllami. Shinallatami ninanda charij runapash, pai tucuita rurajushcatapash saquishpa tucuringa.

¹²Nali munai shamujpipash na chaita ruraj runaca, ninandami cushijun. Nali munaita shinlli tucushpa mishashpaca, causaita causagrinata ricuchij coronatami japigringa. Chaitaca, paita juyajcunamanllami Taita Diosca carashapacha nijushca.

¹³Nali munai maijandapash japijpica, ama caitaca Taita Diosmi carahuan yajuchun ninimi. Taita Diosca, nali munaitaca na charishpami, nali munaitaca pimambash na cujun.

¹⁴Ashtahuangarin nali munaica, gentecunapaj shungupimi tiajun. Shina cashpami pita cashpapash, nalita rurachun yarichishpa urmachijun.

¹⁵Chai nali munaita rurajpimi, juchaca ninanda miran. Chai juchata ashtahuan rurajpi mirashpami, huañuiman apajun.

¹⁶Ñuca juyashca huauquicuna, na pandarinachu canguichi.

¹⁷Taita Diosca, jahua pachamandami juyailla aliguta imatapash na pandashpa rurachun caramujun. Paica, jahuapi punchayachijcunata ruraj Taitami. Paica, na shuj tucushpa chashnallatami. Paitaca, ima llandupash na yanayachi ushanllu.

¹⁸Diosca, pai munashpami, na llullashpa villajuj Shimimanda mushujta huacharinata ñucanchiman caramurca. Shinamandami, pai rurashcacunapaj punda ñucanchi tiagrichun munashca.

¹⁹Shina cashcamanda ñuca juyashca huauquicuna, panicuna, imaguta cashpapash tucuicunallatami aliguta uyajcuna, aliguta yarishpara rimajcuna, na ñapash fiñarijcuna cana canguichi.

²⁰Pipash fiñarishpaca, imatapash cashcatapacha rurachun Taita Dios munashcatami na pactachijun.

²¹Shinamandami mapata ruranatapash, nalitalla ruranatapash, tucuilla jichuna canguichi. Shina jichushpami, Diospaj Shimita cangunapaj shungupi tarpushcashna tiajujtaca, ali shunguhuambacha chasquina canguichi. Chai Shimimi, cangunapaj almataca quishpichi ushan.

²²Ashtahuangarin Diospaj Shimitaca pactachijcuna caichi, na yanga uyashpalla purijcunachu cana canguichi. Uyashpalla purinajushpaca, cangunallatami umachirinajunguichi.

²³Diospaj Shimita uyashpapash na pactachijushpaca, paipaj ñavita espejopi ricurij runashnami.

²⁴Paica, paipaj ñavita imashna cajta ricurishpaca rinllami. Chai jipaca, imashna cashcatapash cunganllami.

²⁵Ashtahuangarin huatashcashna causanajujmanda cacharichij Diospaj na pandashpa mandashca Shimita uyashcata shungupi alicachishpaca, na cungashpami pactachinga. Shina pactachishpaca, imata rurashpapash ninandami cushijunga.

²⁶Canguna purapi maijambash ali crijmi cani nirijushpapash, pai rimajuj jallutapash na jarcai ushashpaca, paipaj shungupillatami umachirijun. Shina crijmi cani nijushcapash, yanga yangami.

²⁷Taita Diospaj ñaupajpi tucui shunguhuambacha ima mapapash illaj crij canaca, cashnami: Taita mama illaj huahuagucuna, sapalla huarmigucuna jatun llaquipi cajpica ricugrinami. Cai pachapi imapash nalihuan mapayanamandaca, cuidarishpami causana.