Read Imbabura Highland Quichua SANTIAGO 3 Bible Online

SANTIAGO 3 - Imbabura Highland Quichua bible

SANTIAGO 3

¹Ñuca juyashca huauquicuna. Yachachij cashpata imatapash nalita rurajpica, shujcunatapash yalitami Diosca ñucanchita llaquichinga. Chaita yachashpami, na taucapura yachachijcuna tiana canguichi.

²Tucuicunami, imatapash pandata nishpa llaquichinchilla. Maijan runapash na pandata parlashpa na llaquichij cashpaca, ima pandatapash na ruraj cashpami, paipaj cuerpotapash jarcari ushan.

³Caballocunapaj shimitaca, ñucanchita cazuchunmi huatanchi. Shina rurashpami, maita ñucanchi ringapaj munashcaman tigrachinchi.

⁴Barcocunata ricushpami, yarina canguichi: Jatun cajpipash, ninanda huairajushpaca, maimambash apanllami. Shina cajpipash barcota purichij runaca, shuj uchilla caspihuanmi, maiman ringapaj munashpapash tigrachin.

⁵Shinallatami ñucanchi cuerpopipash, uchilla jallu tiajun. Shina cashpapash, ninanda jariyashpa cacharishcata rimanllami. ¡Yarichi, shuj uchilla ninapash shuj jatun sachataca tucuchinllami!

⁶Shinallatami jallupash, ninashna tiajun. Jatun nalipajmi tiajun. Jallumi, ñucanchi cuerpopi tianajuj puramandaca imatapash nalitara rimashpa, tucui cuerpota mapayachijun. Jalluca, ucu pacha nina japichishcashna cashpami, ñucanchitaca cai causaipillata rupachinshna huaglichijun.

⁷Runaca, tucui tiashca millai animalcunata, alasyu animalcunata, culebracunata, mama cuchapi tiaj animalcunata mansoyachita ushanmi. Chaicunaca, ñami mansoyachi tucushca.

⁸Shina rurashpapash jallutaca, pipash na mansoyachi ushanllu. Jallutaca, huañuchijlla venenohuan jundashna cashpa yapa nali cajpimi, pipash na jarcai ushan.

⁹Chai jalluhuanmi, Taita Diostaca ninanda alicachinchi. Chai jalluhuanllatami, Taita Diosman rijchajta rurashca gentecunatapash, ima llaquipash japishpami ali canman ninajunchi.

¹⁰Chai shimimandallatami bendicianapash, ima llaquipash japishpami ali canman ninapash llujshijun. Ñuca juyashca crijcuna, canguna chashna rimanaca, napacha alichu.

¹¹Shujlla pugyumandaca, ¿mishquilla yacupash, jayaj yacupash llujshi ushanllu?

¹²Ñuca juyashca huauquicuna. ¿Jigos yurapica, aceituna nishcacunaca fucunllachu? ¿Uvas yurapipash, jigosca fucunllachu? Shinallata shujlla pugyumandaca cachi yacundi, mishqui yacundica napacha llujshi ushanllu.

¹³Canguna purapica, aligutapacha yachajushca, ali yuyaita charijcunaca, ¿maijanda tianguichi? Maijambash tiashpaca, aliguta rurashpa ali shunguhuan causajushcata ricuchijuchun.

¹⁴Ashtahuangarin cangunapaj shungupi ninanda fiñarishca llaquilla cashpata, imatapash cangunapaj ali cachunlla ruraj cashpata, ñucami ali yachani nishpaca, na jariyanachu canguichi. Llullashpallapash, na chashna ninachu canguichi.

¹⁵Chai yuyaica, Diosmandaca na shamunllu. Ashtahuangarin chai yuyaica, cai pacha, nali munaimi, diablomi chaitaca yarichijun.

¹⁶Maipimi ninandapacha fiñanajushpa, imatapash paipajlla ali cachun ruranajun. Chaipimi musparinapash, jatun nalita ruranapash tian.

¹⁷Ashtahuangarin jahua pachamanda shamujuj ali yachaica, ashtahuambacha pundaca ima mapapash illaj canatami yarichimun. Chai jipaca, casilla ali causaita, ali shunguta, juyaita, llaquinata, imatapash aliguta ruranatami yarichimun. Na llulla cashpami, na nij tucushpalla causanata yarichimun.

¹⁸Casilla ali causajcunaca, imatapash cashcatapacha rurashpami, tarpushcata tandachinshna casilla aliguta causanajun.