Read Imbabura Highland Quichua SANTIAGO 4 Bible Online

SANTIAGO 4 - Imbabura Highland Quichua bible

SANTIAGO 4

¹Canguna purallata, ninanda macanajushpa, fiñanajushpa causanaca, ¿maimandata shamun? ¿Nachu nali munaicunatara cangunapaj cuerpopi charishpa, chashnaca causanajunguichi?

²Ninandapacha imata munashpapash, na tari ushashcami canguichi. Shujcunapajta ñucapaj cashcanman yashpa, chaitalla ninanda yariashpami huañuchishpapash, napacha tari ushanguichi. Ninanda fiñashpa macanajushpapash, Diosta na mañashcamandami, imata munashpapash na charinguichi.

³Nalita ruranapi cushijushpa tucuchingapajllami mañanguichi. Shinamandami, maijambash na japinguichi.

⁴¡Cangunaca, huainayashpalla causajpaj almatashnami charinguichi! Cai pachapi imapash tiajcunatalla munajcunaca, Taita Diostamari fiñashpa causanajun. ¿Chaitaca nachu yachanguichi? Cai pachapi imapash tiajcunatalla munashpaca, Taita Diostami na ricunayachishpa causanajun.

⁵“Ñucanchi shungupi causachun Dios caramushca Espirituca, paipajlla causachunmi munan” nishpami, Dios escribichishca Shimipica villajun. Shina nijujtaca, ¿yanga nijujtachu yanguichi?

⁶Ashtahuangarin ñucanchitaca, Taita Diosca ninandami juyajun. Shinamandami Diospaj Shimipica, cashna nijun: “Taita Diosca, jatun tucushpa jariyashcacunahuanga, shinllitami macanajujun. Ashtahuangarin na jariyashpa causajcunataca, ninandami juyajun” nijunmi.

⁷Taita Diostalla cazushpa causashpa, diablohuanga shinllita macanajuichi. Chashna causajpimi, cangunamandaca diabloca anchuringa.

⁸Taita Diospajman quimirichi. Shina quimirijpica, paipash cangunapajman quimiringami. Juchata rurashpa causajcuna, cangunaca maquita maillanshnami chaitaca saquina canguichi. Ishcai yuyaihuan causajcuna, cangunapaj shungutapash mapa illajtashna ruraichi.

⁹Ninanda llaquirishpa, aij nishpa huacaichi. Asinataca saquishpa huacaichi. Cushijunatapash saquishpa, llaqui llaqui tucuichi.

¹⁰Jatun Diospaj ñaupajpica, pingai tucushpa urai cumurichi. Shina rurajpimi, cangunataca jatunyachinga.

¹¹Huauquicuna, na caishujmanda chaishujmanda nalicachirishpa rimarinachu canguichi. Crij puracuna fiñashpa nalicachirishpa, shuj crijta juchachishpaca, Dios mandashcata nalicachishpa fiñashpami, chai mandashcatapash nalipi churan. Can chai mandashcatapash nalipi churajushpaca, chai mandashcataca na cazujushpami, canra juez tucujungui.

¹²Shujlla Diosmi, mandashca shimicunataca curca. Paillatami quishpichitapash, na cashpaca chingachitapash ushan. Shina cajpica, imatalla rurashcata shujta can juchachingapaca, ¿pita canguiyari?

¹³“¡Cunan cashpa, caya cashpapash, shuj huatacaman randishpa, jatushpa culquita mirachingapaj cai llactaman, chai llactaman jacuchi” nishpa purijcuna, cunan uyahuaichi!

¹⁴Caya punlla ima tucunatapash, napacha yachashpami causanguichi. ¿Ñucanchipaj causaica imatayari? Ashatalla fuyu ricurishpa, ñapash tucurinashnami causanajunchi.

¹⁵Chashna ningapaj randica: “Jatun Dios munajpica, causanajushunmi. Shina cajpimi, imatapash cashna chashna rurashunchi” nina canguichi.

¹⁶Ashtahuangarin cunanga, jariyashpa jatun tucushpamari, imata cashpapash parlanajunguichi. Chashna jariyashpa imatapash rimanaca nalichu.

¹⁷Aliguta ruranata yachashpapash na rurajpica, paipaca juchami tucun.