Read Imbabura Highland Quichua SANTIAGO 5 Bible Online

SANTIAGO 5 - Imbabura Highland Quichua bible

SANTIAGO 5

¹¡Ninan charijcuna, cunanga uyahuaichiyari! Jatun llaquicuna cangunata japij shamunamandaca, caparishpa huacaichiyari.

²Canguna ninanda charishcacunapash, ñamari ismushca. Cangunapaj churajunatapash, polilla jurucuna micushcamari.

³Canguna orota, culquita charishcapash, ñamari jirrumbrashca. Chai jirrumbrashcami, canguna nali cajtaca ricuchimunga. Chaillatami, cangunapaj cuerpotapash, ninashna rupachishpa tucuchinga. Cai tucurimui punllacunapi ninanda charingapajmi, imapash ninan valishcacunata tandachishcanguichi.

⁴Uyahuaichi, cangunapaj chagracunata tandachijcunaca, canguna umashpa, na culquita cushcamandami caparinajun. Shinamandami, cangunapaj granota tandachijcuna caparinajujca, tucuita mandaj Jatun Diospaj rinriman uyarishca.

⁵Cai pachapica, imamandapash na jarcarishpa, nalita ruranapi cushijushpami causanajunguichi. Huañuchina punllapishnami, cangunapaj shungupi racuyashcanguichi.

⁶Imatapash cashcatapacha rurajtami, huañuchi tucunapachami ninajunguichi. Paitaca, huañunapachami cangui nijpipash na mitsarijpimi, cangunaca huañuchircanguichi.

⁷Chashnamandami huauquicuna, panicuna, Apunchi Jesús shamungacaman, na ñapash fiñarishpa shuyana canguichi. Tarpuj runata ricushpa yaringuichi: Paica, juyailla granoguta japingapaca, punda tamia, jipa tamia shamushpa fucuchingacamanmi, na ñapash fiñarishpa shuyajunlla.

⁸Shinallatami cangunapash na ñapash fiñarishpa, cangunapaj shungutapash shinllichishpa causana canguichi. Apunchi Jesús tigramuna punllapash, ñami chayamujun.

⁹Huauquicuna, panicuna, cangunata Dios ama llaquichijuchunmi, shujmanda shujmanda na fiñanajushpa, imatapash na nirinajuna canguichi. Uyaichi, juezca pungu ñaupajpimi shayajun.

¹⁰Ñuca juyashca huauquicuna, panicuna, Jatun Diospaj shutipi, pai ima nishcata villajcunaca llaquichi tucushpapash, na ñapash fiñarishpami causanajushca. Paicunashnallatami, cangunapash causana canguichi.

¹¹Ricuichi, llaquita apajcunaca, ninanda cushijushcatami yachanchi. Job shuti runaguca, na ñapash fiñarishpa causashcataca uyashcanguichimi. Chai jipaca, paiman Jatun Dios carashcatapashmi yachanguichi. Jatun Diosca ninanda llaquishpa, juyaj cajtami ricuchijun.

¹²Ñuca juyashca huauquicuna, panicuna, tucuimanda yalica imamandapash na: “Jahua pacha, cai pacha” nishpa juramentunachu canguichi. Ashtahuangarin cangunata Dios ama ninanda llaquichijuchunmi, imatapash: “Ari” nina cajpica, “Ari” nina canguichi. Shinallata: “Na” nina cajpica: “Na” ninami canguichi.

¹³¿Maijambash canguna purapi llaquilla causajuj tianllu? Diosta mañaichi. Maijambash cushijuihuan causajushpaca, cushijushpa candachun.

¹⁴Canguna purapi maijambash huañujuj tiajpica, tandanajuj crijcunata mandaj rucucunata cayachun. Paicunami, chai huañujujmandaca, Apunchi Jesuspaj shutipi aceiteta talishpa, Diosta mañanga.

¹⁵Alipacha crishpa mañajpimi Apunchi Jesusca, chai huañujujta alichishpa jatarichinga. Ima juchata rurashcatapash, Diosca anchuchingami.

¹⁶Dios alichijuchunmi, imatapash pandata nishpa llaquichishcatapash, shujmanda shujmanda villarina canguichi. Shinallata caishujmanda chaishujmandami, Diosta mañana canguichi. Imatapash cashcatapacha ruraj runa mañajpica, pactachingapachami.

¹⁷Eliaspash, munaicunata charij ñucanchishnallata runami cashca. Shina cashpapash ama tamiachun, Diosta ninandapacha mañajpica, quimsa huata chaupicamanmi cai pachamanga na tamiamushca.

¹⁸Tamiachimupai nishpa mañajpica, Diosca cutinmi tamiachishca. Shina tamiajpimi, alpapica cutin imagupash fucushca.

¹⁹Huauquicuna, panicuna, na llullashpa villajuj Shimita cungashpa, maijambash canguna purapi pandashpa causaj tiajpica, Diospajman tigrarichun aliguta villanguichi.

²⁰Shina villajpimi, pandashpa causaj juchata rurajpaj almagutaca, huañugrinamanda quishpichinguichi. Shinallata chai tucui juchacunatapashmi anchuchinga. Chaitaca yachanguichimi.