Read Imbabura Highland Quichua 1 PEDRO 1 Bible Online

1 PEDRO 1 - Imbabura Highland Quichua bible

1 PEDRO 1

¹Jesucristo villachun cachashca Pedromi cani. Llactamanda llujchishpa cachai tucushpa, caita chaita rishpa Ponto, Galacia, Capadocia, Asia, Bitinia shuti llactacunapi causanajuj crijcunamanmi, caitaca escribini.

²Cangunaca, Taita Dios munashcashna, pundamandapacha agllai tucushcacunami canguichi. Diosta cazushpa, Jesucristopaj yahuarhuan maillashca cachunmi, paipaj Espirituhuan jucha illaj causanata carashpa agllashca. Diospaj ninan juyaitapash, casilla ali causaigutapash, cangunapi ashtahuan mirachijuchunmi munani.

³Ñucanchi Apunchi Jesucristopaj Taita Diosca, aligumari cangui ni tucushca cachun. Paica, huañushcacunapaj chaupimanda Jesucristota causachishpami, ñucanchitaca pai ninanda llaquijunshnallata, causaita causagrinata shuyachun, mushujta huacharishpa causanajuchun rurarca.

⁴Cangunaman carangapaj jahua pachapi alichishca tiajujta japigrichunmi, chashna rurarca. Chai caranaca, na ismunalla na mapayanalla na tucurinallachu.

⁵Taita Diosca, paita crishcamandami, paipaj ushaihuan cangunataca alichishpa charijun. Pai quishpichishcata alichishpa charijushcataca, tucurimui punllapi ricuchishpa carajpimi, japinguichi.

⁶Chaita yarishpami, cunambi ashacamanlla ima llaquicunata apanapacha cajpipash, shuj shuj llaquicunata apashpa, ninanda cushijunajunguichi.

⁷Canguna crishcapash ashtahuan ali orotapash yali juyaillagu cajpimi, chashna cushijunguichi. Chai orotaca, tucurinalla cajpipash ninapi rupachishpami, ali oro cajta ricun. Jesucristo shamushpami, chashna crishpa causanajujta japij shamushpami, alicachishpa, cushijushpa, ninanda alicachinga.

⁸Jesucristotaca, na ricushca cashpapash, ninandami juyanguichi. Cunambi na ricushpapash, paita crishpa juyailla na villai ushanalla, jatun cushijuita charishpami cushijushpa causanajunguichi.

⁹Jesusta crishcamanda, cangunapaj alma quishpirinata charishpami cushijunajunguichi.

¹⁰Dios ima nishcata villajcunaca, imashna Dios cangunata ninanda juyashpa quishpichinata yachangapajmi, aliguta tapunajushca. Shina yachashpami, cai quishpirinamandaca paicunallata villanajushca.

¹¹Paicunapaj shungupi causajuj Cristopaj Espíritu chashna yarichijujtaca, maijan runapi, ima punllacunapi chashna tucunata aligutapacha ricushpa yachashpami villanajushca. Chai Espiritumi, Cristo ninan llaquicunata apanata, chai jipa ninanda alicachi tucunataca, chai punllacuna nara pactajpillata villanajushca.

¹²Diosca, chai villajcunamanmi paicuna villanajushca shimicunaca, na paicunapaj cashpa, ashtahuangarin ñucanchiman aliguta alichijushcata ricuchishca. Chaitaca, jahua pachamanda cachamushca Diospaj jucha illaj Espíritu yarichijpimi, quishpirinamanda villajcunaca cunan punllacunapi cangunaman villanajun. Chaitaca, angelcunapash ninandami ricungapaj munan.

¹³Shina cajpimi cinturasta chumbilirinshna, ali yuyaihuambacha causana canguichi. Imata rurashpapash, aligutapacha rurashpa causaichi. Jesucristo tigramujpi cangunata ninanda juyashpa caranataca, tucui shunguhuan yariashpa shuyaichi.

¹⁴Ali cazuj huahuacuna cashcamandami, Diosta nara rijsimanda, imatapash nalita munashpa punda rurashcashnaca, na ashtahuan rurana canguichi.

¹⁵Ashtahuangarin cangunata agllaj Diosca, jucha illajmi. Shina cajpimi, cangunapash tucui causaipi jucha illaj causana canguichi.

¹⁶Escribishcapica cashnami nijun: “Ñucaca, jucha illajmi cani. Shinamandami cangunapash, jucha illaj causana canguichi” nijunmi.

¹⁷Diostaca: “Taitami cangui” nishpa mañajushpapash, cai pachapi llactan llactan purishpa causanajushpaca, ima horapash paitallami manllana canguichi. Paica, na shujtalla agllashpaca, imatapash rurashcata ricujunllu. Ashtahuangarin tucuicunatami, imata rurashpa causashcatapash ricujun.

¹⁸Yanga, nali causaimanda quishpichi tucushcataca yachanguichimi. Chai causaitaca, cangunapaj taitacunamandami chasquircanguichi. Tucurinalla orohuan, culquihuanga na quishpichi tucushcachu canguichi.

¹⁹Ashtahuangarin Cristopaj juyailla yahuarguhuanmi, cangunataca quishpichirca. Paica na mapayashca, imapash na tucushca llamagushnami carca.

²⁰Paitaca, Diosca cai pachata nara rurashpallatami, huañuchun churashca carca. Shina cajpipash cunan cai tucurimui huatacunapimi, cangunata juyaimanda Cristoca shamurca.

²¹Paimandami, Taita Diostaca cringuichi. Canguna Taita Diosta crishpa paita yariashpa, cushijuihuan shuyashpa causachunmi Cristotaca, huañushcacunapaj chaupimanda causachirca. Shina causachishpami, punchapambagu causanata paiman curca.

²²Diospaj Espíritu yarichijujpimi, na llullashpa villajuj Shimita cazushpa, cangunapaj almatapash ña mapa illajta rurashcanguichi. Chashna rurashpami, na nij tucushpalla, crij purapash huauqui purashna juyarishpa causanajunguichi. Shinamandami cunanga, ima nalitapash na yarishpa, tucui shunguhuambacha caishuj chaishuj juyarishpa causanajunguichi.

²³Cangunaca, huañunalla taitamandaca na cutin huacharishcachu canguichi. Ashtahuangarin causaita causaicaman na tucurishpa, causajujlla Taita Diospaj Shimimandami cutin huacharishcanguichi.

²⁴Chai Shimipica, cashnami nijun: “Tucui gentecunami jihuashna. Paicuna juyaillagu cashcapash, jihua sisashnallami. Jihua chaquijpica, sisapash urmanllami.

²⁵Ashtahuangarin Jatun Diospaj Shimica, causaita causaicaman tiajunllami” nijunmi. Cai shimicunatami, ali villaita cangunaman villanajushpaca villashca.