Read Imbabura Highland Quichua 2 PEDRO 1 Bible Online

2 PEDRO 1 - Imbabura Highland Quichua bible

2 PEDRO 1

¹Jesucristo villachun cachashca, paita servij Simón Pedromi cani. Imatapash cashcatapacha ruraj ñucanchi Dios Quishpichij Jesucristomandami, juyailla crinataca ñucanchishnallata japircanguichi. Shina cajpimi, cangunaman escribini.

²Taita Diostapash, ñucanchi Apunchi Jesustapash aliguta rijsishcamandaca, ninan juyaitapash, casilla ali causaigutapash, cangunapi ashtahuan mirachijuchunmi munani.

³Causaipaj tucui ima ali canatapash, llaquishpa causanatapash, ninan ushaita charij Diosmi ñucanchiman caramurca. Chaitaca, pai punchapambagu cashpa, alicachi tucushca cashpa, ñucanchita cayajpi paita rijsishcamandami, shina caramurca.

⁴Chaicunata caramushpami Diosca, imatapash juyailla ninandami carasha nishcata pactachirca. Cai pachapica, nalita munashcamandami ima huaglicunapash tian. Chai huaglicunata saquishpa, Diosman rijchaj canata japigrichunmi, chashna ricuchirca.

⁵Shinamandami canguna ña crij cashcamandaca, ashtahuan tucuipi ali cana canguichi. Shina tucuipi ali cashpami, yachajunataca ashtahuan yariana canguichi.

⁶Shina yachajushpami, nali munaicunataca cangunallata saquina canguichi. Nali munaicunata cangunallata saquishpami, na ñapash fiñarishpa causana canguichi. Shina na ñapash fiñarishpa causashpami, Diosta yariashpa causana canguichi.

⁷Diosta yariashpa causashpami, crij purapash juyarishpa causana canguichi. Shina huauqui purashna juyarishpa causajpimi, juyaica tian.

⁸Chashna causana cangunapi tiajpica, ñucanchi Apunchi Jesucristota rijsishcamandaca, grano fucujunshnami na quillanayachishpa, ashtahuan yachajunguichi.

⁹Ashtahuangarin chashna causanata na charishpaca, caruta ricuita na ushaj runashnami causan. Pai punda rurashca juchacunata anchuchishcatapash cungashpami, ñausashna causan.

¹⁰Huauquicuna, panicuna, chaimandami cangunata Dios cayashpa agllashcata yariajlla causashpa, ashtahuan shinlli tucuna canguichi. Caicunata pactachishpa causashpami, ima horapash na urmashpa causanguichi.

¹¹Shina causajpimi, ñucanchita Mandaj, Quishpichij Jesucristo causaita causaicaman mandajuj llactaman yaicuchun saquinga. Paica na jarcashpa, cushijuihuanmi yaicuchun saquinga.

¹²Chaimandami, na llullashpa villajuj shimitaca canguna ña yachashpa, ali shinllicuna cajpipash, cutin cutin caicunata yarichijunataca na saquisha.

¹³Causajushpallata cangunata shinllita tacurishpa rijchachijunshna yarichijushpaca, imatapash cashcatapachami rurajuni yanimi.

¹⁴Ñucanchi Apunchi Jesucristo, ñuca ñalla huañunata villajpi yachashpami, caicunataca yarichijuni.

¹⁵Ñuca huañushca jipapash, cai villashcataca ama cungashpa yarianajuchunmi, tucui shunguhuan ucha yarichijuni.

¹⁶Ñucanchi Apunchi Jesucristo ninan ushaihuan shamunataca, na yanga runacuna umachishca parlocunata catishpalla yacharcanchichu. Ashtahuangarin mandana ushaita pai charijta, ñucanchi ñavihuambacha ricushpami yacharcanchi.

¹⁷“Caimi, ñuca juyashca Churigu. Paimandami, ninanda cushijuni” nishpami, Taita Diosca juyailla punchapamba chaupimanda rimarca. Paita ninanda alicachishpami, punchapambagumi cangui nirca.

¹⁸Jahua pachamanda chashna rimamujtaca, Diospajlla urcu jahuapi Jesushuan cashpami uyarcanchi.

¹⁹Profetacuna villashca Shimitapash charinchimi. Chai Shimimi yanata micha punchayachinshna, aliguta villajun. Punllayajujpi llujshimuj luzeroshna, cangunapaj shungu punchayachun, chai Shimita uyashpaca, aligutami ruranajunguichi.

²⁰Caitarami punda yachajuna canguichi: Dios escribichishca Shimipi Dios villashcacuna imata nijujtaca, pipash na paillata yachai ushangachu.

²¹Dios villashcataca, ima horallapash na gentepaj munailla villashcachu. Ashtahuangarin Taita Diospajlla causanajuj runacuna cashpami, Diospaj jucha illaj Espíritu yarichijpi villanajushca.