Read Imbabura Highland Quichua 2 PEDRO 3 Bible Online

2 PEDRO 3 - Imbabura Highland Quichua bible

2 PEDRO 3

¹Juyashca crijcuna, cai cartahuanga ña ishcai viajetami, cangunaman escribini. Cai ishcandi cartapimi, mapa illaj cangunapaj yuyaita rijchachinshna aliguta yarichijuni.

²Diospajlla causanajuj, Profetacuna imata villashcatapash, Quishpichij Apunchi Jesús villachun cachashcacuna, pai mandajpi villashcatapash cangunapaj yuyaipi charichunmi yarichijuni.

³Caitara pundaca yachaichi: Tucurimui punllacunapica, paicunapaj munai nalita rurajcuna, asishpa ricuj runacunami shamunga.

⁴Chaicunaca, cashnami ninga: “Cristo tigramushami nishcapash, ¿maita pactanyari? Taitacuna huañushca punllamandapacha imapash chashnallata tiajunllami. Shinallata tucui ima tiachumbash Dios churashca punllamandapacha cunangaman chashnallatami” ninajungami.

⁵Pundallatami jahua pachatapash, cai pachatapash Taita Diosca, shimihuan rimashpalla rurashca. Chaitaca, paicunapaj munaillatami na imatapash yachan. Alpaca, yacumandami llujshimushca, chaicunaca yacumandallami tian.

⁶Shinamandami ñaupa punllacunapica, cai pachapi ima tiashcapash, yacupi huashajushpa tucurishca.

⁷Ashtahuangarin cunambi tiajuj cai pachapash, jahua pachapash, Dios tiachun nishca punllacamanllami tianajun. Chaicunataca, pai rimashpalla ninahuan tucuchingapajmi, paita na manllaj runacunandi, Dios ricuchishpa llaquichina punllacaman alichishca tianajun.

⁸Juyashca crijcuna, caitaca yachanapachami canguichi: Jatun Diospaca, shuj punllallami huaranga huatashnalla, huaranga huataca shuj punllashnallami.

⁹Huaquingunaca: “Apunchi Jesusca, na ucha shamunllu” ninajunmi. Shina cajpipash pai tigramushami nishcataca, uchami pactachinga. Ashtahuangarin shujllapash ama chingaita chingagrichunmi, na ñapash fiñarishpa, ñucanchita llaquimandalla nara shamun. Ninanda llaquirishpa, tucuicuna Diospajman tigrarichunmi shuyajun.

¹⁰Ashtahuangarin tuta shuhua shamunshnami, Apunchi Jesusca cungashcapi shamunga. Chai punllapimi jahua pachaca, ninanda culunlla cuyushpa, tucui ima tiashcapash rupashpa tucuringa. Cai pachapash, chaipi tucui tiashcacunandimi rupachi tucunga.

¹¹Chashna tucui ima tiashcatapash tucuchina cajpimi, ¡Taita Diostalla tucui shunguhuan yariashpa, paipajlla causana canguichi!

¹²¡Taita Dios shamuna punlla ucha chayamuchun yashpami, chapariana canguichi! Chai punllapimi, jahua pachatapash ninahuan rupachishpa tucuchinga. Shinallata tucui ima tiashcacunapash, rupashpami yacuyanga.

¹³Ashtahuangarin ñucanchica, jahua pachatapash, cai pachatapash mushujtami rurasha nishcatami shuyanajunchi. Chaipimi, imatapash cashcatapacha ruranaca causajun.

¹⁴Juyashca crijcuna, shinamandami cangunaca chashna tucunacunata shuyashpa, imata cashpapash ucha rurana canguichi. Na mapayashca, na juchachi tucushpa, casilla ali causaita charijta Dios japij shamunatami yariana canguichi.

¹⁵Pitapash quishpichingapaj munashpami, ñucanchi Apunchi Jesusca, nara shamushpa shuyajun. Chaitaca yachanami canguichi. Shina cajpimi, ñucanchi juyashca huauqui Pablopash, Dios imashna paiman alipacha yachachishcashnallata, cangunaman escribishca.

¹⁶Pabloca, pai escribishca cartacunapica, caicunamandaca ashamandallami na tucuilla cartacunapi yachachishca. Chai carta puracunapi huaquingunataca, na yachai ushanallami tian. Chaicunatapash, Dios escribichishca shuj Shimicunatapash, chaira yachajuj na ali crijcunaca, pandatami yachachinajun. Shina cashpami, chingaita chingagringa.

¹⁷Juyashca crijcuna, shinamandami canguna pundata ña yachashcamandaca, aligutapacha cuidarina canguichi. Nalita rurajcuna pandata yachachijpira canguna shinllita catinajushcataca saquinguichiman.

¹⁸Ashtahuangarin viñanshnami Diospaj ninan juyaimanda, ñucanchita Quishpichij, Apunchi Jesucristomanda ashtahuan yachashpa catina canguichi. Paitaca cunambash, causaita causaicamambash punchapambami cangui ninami canchi. Shina cachun.