Read Imbabura Highland Quichua 1 JUAN 1 Bible Online

1 JUAN 1 - Imbabura Highland Quichua bible

1 JUAN 1

¹Callaripillata ña tiashcata, ñucanchi uyashcata, ñucanchi ñavihuambacha ricushcata, pai causajujta ali ricushpa, ñucanchi maquihuan tacarishcatami villanchi. Paica, causaita caraj Shimimi.

²(Causaita ricuchimujpimi, chai causaitaca ricurcanchi. Shinamandami, causaita causanata ricushcapacha cashpa, cangunaman villanajunchi. Paica Taitahuanmi carca. Shina cashpapash, ñucanchimanmi ricurimurca).

³Ñucanchi ricushcata, ñucanchi uyashcatami, chaitapacha villanajunchi. Cangunapash ñucanchihuan shujlla tucuchunmi, chashna villanajunchi. Ñucanchipash Taita Dioshuan, paipaj Churi Jesucristohuan shujlla tucushcapachami canchi.

⁴Cangunapash, ninanda cushijushpa causachunmi, caitaca escribinchi.

⁵Jesucristo ñucanchiman yachachishca shimicunatami, cangunaman cashna villanajunchi: Taita Diosca, punchapamba micha cajpimi, paipica yana yana tutashnaca na tian.

⁶“Paihuan shujlla tucushcami canchi” nishpapash, yana yana tutapishna causanajushpaca, na llullashpa villajuj Shimitami, na pactachishpa llullanajunchi.

⁷Ashtahuangarin Dios michapi causajunshna, ñucanchipash michapi causanajushpaca, caishujhuan chaishujhuan shujlla tucushcami canchi. Shina cajpimi, paipaj Churi Jesucristopaj yahuarca, ñucanchipaj juchacunataca tucuillata maillan.

⁸“Jucha illajmi canchi” ninajushpaca, quiquinllata umachirishpami, na llullashpa villajuj Shimitapash na ñucanchihuan charinchi.

⁹Ñucanchipaj juchacunata Taita Diosman villajpica, paimi imatapash cashcatapacha rurashpa pactachijlla cashpa, ñucanchipaj juchacunataca anchuchinga. Shinallata ñucanchi imata nalita rurashcatapash, tucuillatami maillanga.

¹⁰“Jucha illajmi canchi” ninajushpaca, Diostami llullapi churanchi. Shinamandami, paipaj Shimitapash na ñucanchipi charinchi.