Read Imbabura Highland Quichua 1 JUAN 2 Bible Online

1 JUAN 2 - Imbabura Highland Quichua bible

1 JUAN 2

¹Ñuca juyashca huahuacuna, canguna ama ashtahuan juchata rurashpa causachunmi, cai shimicunataca villanajunchi. Ashtahuangarin juchata maijambash rurashca cashpaca, Taitahuan ñucanchimanda rimajtami charinchi. Paica, imatapash cashcatapacha ruraj Jesucristomi.

²Paimi, ñucanchipaj juchacunata anchuchingapaj huañurca. Na ñucanchipaj juchacunatalla anchuchingapaj huañurcachu. Ashtahuangarin cai pachapi causanajuj tucuilla gentecunapaj juchacunatapash, anchuchingapajmi huañurca.

³Dios mandashca shimicunata cazushpallami, paita ñucanchi rijsishcataca yachanchi.

⁴Maijan cashpapash: “Diosta rijsinipachami” nijushpapash, mandashca shimicunata na cazushpaca, paica llullapachami. Shinamandami, na llullashpa villajuj Shimitapash na paipi charin.

⁵Ashtahuangarin Diospaj Shimita maijambash alipacha cazujushpaca, Taita Diostami tucui shunguhuan aligutapacha ninanda juyajun. Shina juyashpallami ñucanchica, ima pandatapash na rurashpa paihuan shujlla tucushcata yachanchi.

⁶“Dioshuan shujlla tucushcami cani” nijushpaca, Jesucristo causashcashna causachun ninimi.

⁷Huauquicuna, panicuna, cangunaman nara mandashca mushujtaca, na escribimunichu. Ashtahuangarin canguna cri callarishca punllamandapacha yachashca, punda mandashcatami escribimuni. Cai punda mandashca shimita villajujtaca, cri callarimandapachami uyarcanguichi.

⁸Shina cajpipash, mushuj mandashcatami cangunaman escribimunchi. Cai mandashca na llulla shimitaca, Jesucristomi ricuchijun. Cangunapash, chashnallatami ricuchinguichi. Yana yanapi causana tucurishpa yalijujpimi, michapacha ña punchayachij shamun.

⁹“Ña michapimi causajuni” nijushpapash, shuj crijtallata millanayachishpaca, yana yana tutapishnami causajun.

¹⁰Crij purata juyajushpallami, michapica causajun. Paica, shujcuna pandarichun imatapash nalitaca na ruranllu.

¹¹Ashtahuangarin crijtallata millanayachishpami, yana yana tutapishna causajun. Yana yana tutapishna causashpami, paillata imata rurajujtapash na yachan. Yana yana tutallata ñausatashna charijpimi, chashna na yachan.

¹²Juyashca huahuacuna, cangunapaj juchacunataca Jesucristopaj shutipimi anchuchirca. Shinamandami caitaca, cangunaman escribimuni.

¹³Callaripillata causajuj Diosta rijsijpimi, can taitacunaman caitaca escribimuni. Chairalla viñaicuna, cangunaca diablota mishashcacuna cajpimi, caitaca escribimuni. Juyashca huahuacuna, cangunaca Taitata rijsijpimi, caitaca escribimuni.

¹⁴Callaripillata ña causajuj Diosta ña rijsijpimi, can taitacunaman caitaca escribimuni. Chairalla viñaicuna, cangunaca alipacha catishpa, Diospaj Shimitapash shungupi alichishpa, diablota mishashca cajpimi, caitaca escribimuni.

¹⁵Cai pachata, cai pachapi ima tiajtapash, na juyanachu canguichi. Pipash cai pachatara juyashpaca, Taita Diospaj juyaica na paipi causajunllu.

¹⁶Cai pachapi tucui imalla tiashcapash, quiquin munaipajlla, imatapash ricushcandi munangapajlla, yangata jariyashpa causanallami tian. Chaicunataca, na Taita Dios yarichijunllu. Ashtahuangarin cai pachami, chashna yarichijun.

¹⁷Cai pachaca, tucui imapash nali munaicunandimi tucurijun. Ashtahuangarin Taita Dios munashcata rurajcunaca, causaitami causanga.

¹⁸Juyashca huahuacuna, ñamari tucurimui punllacunaca pactamujun. “Cristota fiñaj runa shamungami” nishcataca, ñami uyarcanguichi. Shina nishcashna Cristota fiñaj runacunaca, cunambica ñami taucacuna ñucanchi puramanda llujshirca.

¹⁹Paicunaca, napacha ñucanchipura cashpami, ñucanchi puramandallata llujshirca. Ñucanchipura cashpaca, ñucanchihuanllata catinajunmanmi carca. Ashtahuangarin na tucuilla ñucanchipura cashcata ricuchingapajmi llujshinajurca.

²⁰Ashtahuangarin cangunaca, aceiteta talishpa javijpishnami, Diospaj jucha illaj Espirituta charinguichi. Shina charishpami, imatapash tucuita yachanguichi.

²¹Na llullashpa villajuj Shimita na yachashcashna canguna causanajushcamandaca, na escribinichu. Ashtahuangarin yachajpipachami escribini. Na llullashpa villajuj Shimimandaca, ima llullapash na llujshinllu.

²²¿Maijanda llullapacha canga? Jesusca, Quishpichij Cristo cajta na crijmi llullapacha. Chaimi, Cristota fiñaj runa cashpa Taitapash, Churipash na tianllu nin.

²³Maijambash: “Jesusca, na Diospaj Churichu” nishpa nalicachishpaca Taita Diostaca, na shungupi charinllu. “Jesusca, Diospaj Churimi” nijushpaca, Taitatapashmi shungupi charin.

²⁴Canguna cri callarishca punllamandapacha imata villajta uyashcataca, cangunapaj shungupimi alichina canguichi. Cri callarimandapacha imata uyashcatapash cangunapaj shungupi alichinajushpaca, Taita Dioshuambash, paipaj Churihuambash shujlla tucushcami canguichi.

²⁵Cristoca, causaita causagrinata carashapachami nijurcami.

²⁶Llullashpa pandachijcuna cangunata ama pandachinajuchunmi, caitaca escribimuni.

²⁷Ashtahuangarin aceiteta talishpa javinshna, Diospaj Espirituta Cristo carajpi canguna chasquijpimi, cangunapi causajun. Shina cashpami, pitapash na yachachihuai ninguichi. Diospaj Espirituca, na llullashpami, imatapash tucuita aliguta yachachijun. Pai yachachijushcashnallatami, Cristohuan shujlla tucushpa catinajunguichilla.

²⁸Cunanga, juyashca huahuacuna, cangunaca Cristohuan shujlla cashpami, catinajunalla canguichi. Shina catishpami, paita yariajlla shuyashpa, pai tigramushpa ricurijpica, paipaj ñaupajmandaca na pingai tucushpa anchurishunchi.

²⁹Cristotaca, imatapash cashcatapacha ruraj cajta yachanguichimi. Shinallata imatapash cashcatapacha rurajcunaca, tucuicunami Diospajlla huacharishca huahuacuna tucushca. Chaitapash yachanami canguichi.