Read Imbabura Highland Quichua 1 JUAN 3 Bible Online

1 JUAN 3 - Imbabura Highland Quichua bible

1 JUAN 3

¹Ricuichi, Taita Diosca ñucanchita ninandapacha juyashpami ñucanchitaca: “Ñuca huahuacunami canguichi” nirca. Shina cajpimi, cai pachapajtalla rurashpa causajcunaca, Diosta na rijsimanda, ñucanchi paipajlla cajtapash na rijsin.

²Juyashca crijcuna, cunanga ñami Taita Diospaj huahuacuna canchi. Tucurimui punllapi ñucanchi imashna canatapash, nara ricuchimunllu. Ashtahuangarin Cristo ricurimujpimi, paishnallapacha cashun. Paitapash imashnapacha cajtami ricushun.

³Cristoca, jucha illajmi. Shina cajpimi, paita ricungapaj shuyajcunapash, tucuilla paishnalla jucha illaj causangapaj aliguta yariashpa causanajun.

⁴Juchata rurashpa tucui causajcunaca, Dios mandashca shimitami na cazunajun. Pai mandashcata na cazushpaca, juchatami ruranajun.

⁵Cristoca, ñucanchipaj juchacunata anchuchingapajmi shamurca. Paica, jucha illaj cajtaca yachanguichimi.

⁶Maijambash paihuan shujlla tucushpaca, na ashtahuan juchata rurashpa causanllu. Juchata rurashpa maijambash causashpaca, Diostaca nara ricushcachu, nara rijsishcachu.

⁷Juyashca huahuacuna, cangunataca pactara pipash pandachinman. Imatapash cashcatapacha rurashpa causajca, Cristoshnallata imatapash cashcatapacha rurajmi.

⁸Juchata rurashpa causajcunaca, tucuillami diablopaj. Cai pacha callarimandapachami diabloca, juchata rurajun. Taita Diospaj Churica, diablo imata rurajujta tucuchingapajmi shamurca.

⁹Maijan cashpapash Taita Diospajlla huacharishca huahua tucushpaca, Taita Diosllata carashca causaita charishpami, na ashtahuan juchata rurashpa causan. Taita Diospajlla huacharishca huahuapacha tucushca cashpami, juchata rurashpa causaitaca na ushan.

¹⁰Maijanlla Taita Diospaj huahuacuna cajtapash, shinallata diablopaj huahuacuna cajtapash rijsinallami: Maijambash imatapash cashcatapacha na rurajcunapash, crijcunata na juyashpa causajcunapash, napacha Taita Diospaj huahuacunachu.

¹¹“Caishujhuan chaishujhuan juyarishpami causana canchi” nishpa villashcataca, cri callarishca punllallatami uyarcanguichi.

¹²Ñucanchica, Caín shuti runashnaca, na causanachu canchi. Paica, diablopaj cashpami, paipaj huauquitaca huañuchishca. ¿Imamandata paipaj huauquitaca huañuchishcanga? Caín shuti runaca, imatapash nalitalla ruraj cashpami, paipaj huauqui imatapash cashcatapacha rurajujta ricushpaca huañuchishca.

¹³Ñuca juyashca huauquicuna, panicuna, cai pachapajtalla rurashpa causajcuna, cangunata millanayachijpica, na manllarinachu canguichi.

¹⁴Ñucanchica, huañushcashna causanata saquishpami, causaita causagrinaman yalishcanchi. Chaitaca, crij puracuna juyarishpa causashpami yachanchi. Crijcunata maijambash na juyashpaca, huañushcashnami causajun.

¹⁵Shuj crijta millanayachijcunaca, maijan cashpapash genteta huañuchij runashnami. Maijan huañuchijpash, causaita causagrinataca napacha paipaj shungupi charinllu. Chaitaca yachanguichimi.

¹⁶Cristoca, ñucanchimanda huañushpami, imashna juyarinatapash ricuchimurca. Shinallatami ñucanchipash crijcunata juyashpaca, ñucanchi causaita cuna canchi.

¹⁷Maijan cashpapash ninan charij cashpa, imagupash illaj crijta ricuita ricushpaca, paipaj shungupimi ninanda mitsajun. Chashna causajushpaca, ¿imashnata Taita Diospaj juyaitaca charingayari?

¹⁸Ñuca juyashca huahuacuna, ñucanchica na shimillahuan, na rimashcallahuan juyanimi ninachu canchi. Ashtahuangarin imagutapash rurashpami, juyajpacha cashcataca ricuchina canchi.

¹⁹Shina causashpami ñucanchica, na llullaj Diospaj cajta yachanchi. Shina cashpami, paipaj ñaupajpica tucui shunguhuan cushijushpa causanchi.

²⁰Ñucanchi shungullata nalimari cangui nijujpica, Taita Dioscarin ñucanchi shungutaca yalitami yachan. Paica, imatapash tucuitami yachan.

²¹Juyashca crijcuna, ñucanchi shungullata na juchachijpica, Taita Diosta yariajlla cushijushpami causanchi.

²²Dios mandashca shimicunata cazushpami, pai munashcataca rurashpa causanchi. Pai imata munashcatapash rurashpami, paita imaguta mañashpapash, japishpa causanchi.

²³Diosca cashnatami mandarca: Paipaj Churi Jesucristota crichun, caishujhuan chaishujhuan juyarishpa causachunmi mandarca. Pai mandashcashna, juyarishpa causashunchi.

²⁴Taita Dios mandashca shimicunata cazujllami, paihuanga causajun. Shinallata Taita Diospash, paipaj shungupimi causajun. Paillata paipaj Espirituta ñucanchiman carajpimi, ñucanchipaj shungupi Dios causajujta yachanchi.