Read Imbabura Highland Quichua 1 JUAN 4 Bible Online

1 JUAN 4 - Imbabura Highland Quichua bible

1 JUAN 4

¹Juyashca crijcuna, espirituta charinchimi nishpa villajcunataca, na tucuicunata crinallachu canguichi. Ashtahuangarin Taita Diospaj Espirituta charijta, na charijtapash, alipacha rijsinarami canguichi. Cai pachapica, llullashpa villajcunaca, ashtacacunami purinajun.

²Taita Diospaj Espíritu yarichijpi villajcunaca: “Jesucristoca, runa aichayu tucushpami shamurca” ninajunmi. Chashna nishpa villajpillami, Taita Diospaj cajtaca, yachai ushanguichi.

³“Jesucristoca, na runa aichayu tucushpa shamushcachu” nishpa villajcunaca, napacha Taita Diospajchu. Ashtahuangarin Cristota fiñaj runapaj espíritu yuyaita cujpimi, chashna villanajun. Chashnacuna shamunajujtaca, cangunallata uyashcanguichimi. Cunanga, ñamari cai pachapi purinajun.

⁴Juyashca huahuacuna, cangunaca Taita Diospaj cashpami, paicunataca mishai ushashcanguichi. Cangunapi causajuj Diosca, cai pachapajtalla rurachishpa mandajuj diablota yali ushaita charijpimi, chashna mishashcanguichi.

⁵Chaicunaca, cai pachamandallami. Shinamandami, cai pachapi imapash tiajmandalla villanajun. Paicunataca, cai pachapajtalla rurashpa causajcunallami uyan.

⁶Ñucanchica, Taita Diospajmi canchi. Taita Diosta maijambash rijsishpaca, ñucanchi villajujta uyanmi. Na Taita Diospaj cashpaca, ñucanchi villajujtaca na uyanayachinllu. Shinamandami, Diospaj Espíritu yuyaita cujpi na llullashpa villajtapash, pandachishpa villachijuj espirituta charijtapash yachanchi.

⁷Juyashca crijcuna, caishujhuan chaishujhuan ninanda juyarishpa causashunchi. Juyarishpa tucui causanaca, Taita Diospajmi. Juyarishpa causajcunaca tucuillami, Taita Diospajlla huacharishca huahuacuna tucushca. Paicunaca, Taita Diostapash rijsinmi.

⁸Na juyashpa causashpaca, Taita Diostaca na rijsinllu. Taita Diosca, ninandapacha juyajmi.

⁹Causaita causagrinata ñucanchi japigrichunmi Taita Diosca, paipaj shujlla Churita cai pachaman cachamushpa, ñucanchita juyajushcata ricuchirca.

¹⁰Ñucanchica, Taita Diosta na juyashpami causarcanchi. Ashtahuangarin pairami ñucanchita juyarca. Paillatami, paipaj Churita ñucanchi juchacunata anchuchingapaj huañuchun cachamurca. Shina cachamushpami, ñucanchita juyajushcataca ricuchijun.

¹¹Juyashca crijcuna, ñucanchitaca Taita Diosmi ninanda juyajushca. Shinamandami ñucanchipash, caishujhuan chaishujhuan ninanda juyarishpa causana canchi.

¹²Taita Diosca, pipaj ñavipipash ima horapash na ricurishcachu. Ashtahuangarin caishujhuan chaishujhuan juyarishpallami, Taita Dios ñucanchi shungupi causajujtaca yachanchi. Shina causajpimi Diospaj juyaica, ashtahuan ashtahuan ñucanchipi aliguta ricuriajun.

¹³Dios paipaj Espirituta ñucanchiman cujpimi, Dioshuan ñucanchica causajushcata, paipash ñucanchi shungupi causajujtaca yachanchi.

¹⁴Taita Diosca, cai pachapi causajcunata Quishpichij cachunmi, paipaj Churitaca cachamurca. Chaitaca, ñucanchillata ricushcapacha cashpami villanajunchi.

¹⁵“Jesusca, Taita Diospaj Churimi” nishpa, tucui villajcunapaj shungupillami, Taita Diosca causajun. Paicunapash, Taita Dioshuanmi causanajun.

¹⁶Taita Dios ñucanchita juyajujtaca yachanchimi. Taita Diosca, ñucanchita ninandapacha juyajujtami crishcanchi. Taita Diosca juyajpachami. Maijambash juyaita charishpaca, Taita Dioshuan shujlla tucushpami causajun, Taita Diospash paipaj shungupimi causan.

¹⁷Aligutapacha juyarishpa causashpallami, gentecuna imata rurashpa causashcata Cristo ricuchijui punllapica, na manllashpa cushijushun. Ñucanchipash cai pachapica, Jesucristo causajunshnami causanajunchi.

¹⁸Dios juyajpi causajcunaca, imatapash na manllanllu. Ñucanchi ama manllashpa causachunmi, paica ninandapacha juyajun. Manllashpa causajushpaca, llaquichi tucunatami charin. Maijambash manllaihuan cashpaca, juyaita nara aligutapacha charishcachu.

¹⁹Diosra ñucanchita juyajujpimi, ñucanchipash paitaca juyanchi.

²⁰“Taita Diosta juyanimi” nijushpapash, shuj crijta millanayachishpaca, llullajunmi. Chai crijta ñavihuan ricujushpapash, na juyashpaca, ñavipi na ricurij Taita Diostacarin, ¿imashnata juyai ushangayari?

²¹“Taita Diosta juyaj cashpaca, shuj crijtapash juyanguichi” nishpami, Cristoca ñucanchita mandarca.