Read Imbabura Highland Quichua 1 JUAN 5 Bible Online

1 JUAN 5 - Imbabura Highland Quichua bible

1 JUAN 5

¹Jesusta, Quishpichij Cristo cajta tucui crijcunaca, Taita Diospajlla huacharishca huahuacunami tucushca. Maijan cashpapash taitata juyajushpaca, chai taitapaj huahuacunatapashmi juyan.

²Taita Diosta juyanajushcataca, pai mandashca shimicunata pactachinajushpa, paipaj huahua purapipash juyarinajushpami ricuchinajunchi.

³Taita Dios mandashca shimicunata pactachishpa causanajushpallami, paita juyanajushcataca yachanchi. Pai mandashca shimicunaca, pactachi ushanallami.

⁴Shinamandami, Taita Diospajlla huacharishca huahuacuna tucushpaca, cai pachapi ima nali tiajtapash, tucuita mishanchi. Jesusta crijpimi, cai pachapi ima nali tiajtapash mishachunga, ñucanchiman ushaita caramujun.

⁵Cai pachapi imapash nali tiajtaca, ¿pita mishai ushan? Maijambash: “Jesusca, Taita Diospaj Churimi” nishpa crijllami mishai ushan.

⁶Jesucristo shamushpaca, yacupimi bautizarirca. Shinallata yahuarta jichashpami huañurca. Pai shamushcataca, na yaculla ricuchircachu. Ashtahuangarin yacupash, yahuarpashmi ricuchirca. Chaitaca, Diospaj Espiritupash villajunmi. Diospaj Espirituca, na llullanllu.

⁷Chaita ricushpa villajcunaca, quimsandimi jahua pachapi tian: Taitapash, Shimi shutipash, Diospaj jucha illaj Espiritupashmi tian. Paicunaca quimsa cashpapash, shujllami.

⁸Cai pachapipash, shinallata quimsa villajcunami tian: Diospaj Espiritupash, yacupash, yahuarpash. Chai quimsandimi, chaimandallata villanajun.

⁹Runacuna ricushpa villashcatapash crinchimi. Shina cashpami, Taita Dios villashcataca ashtahuan crina canchi. Taita Diosca, paipaj Churimandami cashna nishpa villarca:

¹⁰Taita Diospaj Churita pipash crishpaca, paipaj shungupimi shuj villajta charin. Ashtahuangarin Taita Diosta na crishpaca, paipaj Churimanda Taita Dios villashcatapash, na crinllu. Shina cashpami Taita Diostaca, llullapi churan.

¹¹Taita Diosca, cashna nishpami villajun: Causaita causanataca, Taita Diosmi ñucanchiman caramushca. Chai causaitaca, paipaj Churimandallami caramushca.

¹²Diospaj Churihuan shujlla tucushpa causanajujllami, chai causaitaca charin. Taita Diospaj Churihuan na shujlla tucushpaca, pipash chai causaitaca na charinllu.

¹³Taita Diospaj Churita crishcamanda, causaita causanata charishcata aliguta yachachunmi, caicunataca escribini. Shinallata Taita Diospaj Churipaj shutita crishpa catichunmi escribini.

¹⁴Pai munashcashna ñucanchi imaguta mañajujtapash, Diosca uyanllami. Chaita yachashpami, paita crishpa cushijunchi.

¹⁵Ñucanchi imaguta mañajpipash, Dios uyajuj cashcataca yachanchimi. Chaimandami imaguta ñucanchi mañashpapash, Dios caramujujtaca ña yachanchi.

¹⁶Maijan crij cashpapash, na huañuiman apajuj juchata rurajujta ricushpaca, paimanda Diosta mañachun ninimi. Shina mañajpimi Taita Diosca, paiman causaita caranga. Huañuiman na apajuj juchata rurajcunamandami, shina mañachun nini. Huañuiman apajuj juchapash tianmi. Chai juchata rurajcunamandaca, na mañanachu canguichi ninimi.

¹⁷Imatapash cashcatapacha na ruranaca, juchami. Shina cajpipash, na huañuiman apajuj juchapash tianmi.

¹⁸Maijambash Taita Diospajlla huacharishca huahuacuna tucushpaca, juchata na ashtahuan rurashpa causajtami yachanchi. Paitaca, Taita Diospaj Churi cuidajujpimi, diabloca napacha tacari ushan.

¹⁹Ñucanchica, Taita Diospajllami causanajunchi. Ashtahuangarin cai pachapajtalla rurashpa causajcunataca, diablomi tucuicunata mandajun. Chashna cajtaca yachanchimi.

²⁰Shinallata Taita Diospaj Churi shamushcatapash yachanchimi. Paimi, na llullaj Diosta ñucanchi rijsichun yachachirca. Shinamandami na llullaj Dioshuambash, paipaj Churi Jesucristohuambash, shujlla tucushpa causanajunchi. Paica, na llullaj Dios cashpami, causaita causagrinataca ñucanchiman caramujun.

²¹Juyashca huahuacuna, yanga dioscunamandapash anchurinami canguichi nipanimi. Shina cachun.