Read Imbabura Highland Quichua JUECES 12 Bible Online

JUECES 12 - Imbabura Highland Quichua bible

JUECES 12

¹Shinamandami Efraín aillu runacunaca, tandanajushpa jahua ladoman yalishpa, Jefté runataca cashna ninajurca: —Amonitacunahuan macanajugrishpaca, ¿imashpata ñucanchitaca, canhuan richun na cayarcangui? Chaimandami cambaj huasitapash, candapash rupachigrinchi— ninajurcami.

²Shina nijpimi Jefté runaca, cashna nishpa tigrachirca: —Ñucapash, ñuca llactapi causajcunapash, amonitacunahuan jatun fiñanajuita charishpallatami, cangunataca cayachun cacharcani. Ashtahuangarin cangunaca, chai runacunapaj maquimanda na mitsaj shamushpami purinajurcanguichi.

³Ñucanchita mitsangapaj canguna na shamujta ricushpami, huañunatapash na manllashpa, amonitacunahuan macanajungapaj chimbarcani. Paicunataca, Mandaj Diosmi ñuca maquipi churarca. ¿Imashpata cunanga, ñucata fiñashpa ñucahuan macanajungapaj vichai shamunguichi?— nircami.

⁴Shina nishpami Jefté runaca, Galaad llactapi causanajuj tucui runacunata tandachishpa, Efraín ailluhuan macanajurca. Galaad llactapi causajcunami, Efraín aillutaca misharca. Paicunaca, cashnami nishca carca: “Cai Galaad llactapi causanajuj cangunaca, Efraín aillu puramanda pacajushpa shamushpami, ñucanchi Efraín llactapaj, Manasés llactapaj chaupipi causanajunguichi” nishcami carca.

⁵Galaad llactapi causajcunaca, Efraín aillutaca, Jordán yacuta chimbai ushanallacunapimi chapanajurca. Chaipimi cashna tucurca: Efraín aillu puramanda pacajushpa shamujcuna: “Chimba ladoman yalingapajmi munani” nijpica: “¿Efraín aillu purachu cangui?” nishpami, Galaad llacta runacunaca tapunajurca. Shina tapujpi: “Na chai purachu cani” nijpica:

⁶“Shina cashpaca cunanga: ‘Shibolet’ ni” ninajurcami. Chai shimita na ni ushashpa: “Sibolet” nijpica, japishpami Jordán yacuta chimbai ushanalla manñapillata cungata muchushpa huañuchinajurca. Chaimandami Efraín aillu puracunaca, chuscu chunga ishcai huaranga runacuna huañunajurca.

⁷Jefté runaca, sucta huatatami israelcunataca mandajurca. Galaad llactamanda Jefté runa huañujpica, Galaad llactapi tiaj paipaj pueblopillatami pambarca. Ibzán, Elón, Abdón shuti runacunaca, Israel llacta juezcunami cashca

⁸Jefté runapaj jipaca, Belén pueblopi causajuj Ibzán shuti runami, israelcunataca mandajurca.

⁹Paica, quimsa chunga churicunata, quimsa chunga ushicunatami charirca. Chai ushicunataca, shuj llacta gentecunahuanmi cazarachirca. Paipaj chunga quimsa churicunatapash, shuj llactapi causajcunapaj ushicunahuanmi cazarachirca. Chai Ibzán shuti runaca, canchis huatatami israelcunataca mandajurca.

¹⁰Ibzán shuti runa huañujpica, Belén pueblopillatami pambarca.

¹¹Paipaj jipaca, Zabulón aillupura Elón shuti runami israelcunataca, chunga huatata mandajurca.

¹²Zabulón llactamanda Elón shuti runa huañujpica, Zabulón llactapi Ajalón shuti pueblopimi pambarca.

¹³Paipaj jipaca, Piratón shuti pueblopi causajuj Hilel shuti runapaj churi Abdón shuti runami, israelcunataca mandajurca.

¹⁴Paica, chuscu chunga churicunata, quimsa chunga nietocunatami charirca. Paicuna tiarishpa puringapaca, canchis chunga burrocunatami charirca. Abdón shuti runaca, pusaj huatatami israelcunataca mandajurca.

¹⁵Piratón shuti pueblomanda Hilel shuti runapaj churi Abdón shuti runa huañujpica, Piratón shuti paipaj pueblopillatami pambarca. Chai puebloca, Efraín llactapi amalecitacuna causanajuj urcupimi. Sansón shuti runa huacharishcatami villajun