Read Imbabura Highland Quichua JUECES 15 Bible Online

JUECES 15 - Imbabura Highland Quichua bible

JUECES 15

¹Shina tucushcamanda huaquin huatacuna jipami, cashna tucurca: Trigota cozechana punllacuna cajpimi Sansón runaca, paipaj huarmita ricungapaj, shuj maltun chivota apashpa rishpa: —Ñuca huarmita ricungapaj, ucuman yaicupasha— nirca. Ashtahuangarin paipaj huarmipaj taitaca, ucuman yaicuchunga na saquircachu.

²Chai huarmipaj taitaca, cashnami nirca: —Na ricunayachinllu yashpami, cambaj cumbamanllata curcani. Ashtahuangarin paipaj jipa ñañaca, ¿nachu paitapash yali juyaillagu? Paipaj randica, jipa ñañata japilla— nircami.

³Shina nijpimi Sansón runaca, cashna nirca: —Cunanga, can filisteocunata llaquichishpa nalita rurashpaca, na juchachi tucunata charinichu— nircami.

⁴Chaimanda Sansón runa rishpami, quimsa patsaj atujcunata japishpa, ishcai ishcai chupapura tinguishpa huatarca. Shina huatashca chupacunapimi, michun caspicunata japishpa huatarca.

⁵Chai jipami, michun caspicunapi ninata japichishpa atujcunataca, filisteocuna tarpushca pambacunapi cacharirca. Chashna cacharijpimi, cozechashpa mundunashca granocunata, shayanajuj chagracunata, uvas chagracunata, olivos yuracunatapash, tucuillata rupachirca.

⁶Chaimandami filisteocunaca: —¿Pita cashna rurashca?— nishpa tapunajurca. Shina tapunajujpimi, cashna nishpa tigrachinajurca: —Timnat shuti pueblopi causajuj runapaj masha Sansonmi, chashna rurashca. Paipaj huarmita quichushpa, paipaj cumbamanllata cushcamandami, cashna rurashca— ninajurcami. Chaita villajpi filisteocuna shamushpami chai huarmitaca, paipaj taitandi rupachirca.

⁷Chaimandami Sansón runaca, cashna nirca: —Canguna chashna rurashcamandaca, ñucapash cangunataca chashnallatami rurasha nishpami juramentuni. Chai jipaca saquishallami— nircami.

⁸Sansón runaca, cinturascunata, changa tullucunata faquishpami, ashtacacunata huañuchirca. Chai jipaca, Etam shuti jaca rumicunapi tiaj utujuman urai rishpami, chaipi causajurca. Sansón shuti runaca, filisteocunataca Lehi shuti lomapimi mishashca

⁹Filisteocunaca, Judá aillupaj llactaman vichai shamushpami, Lehi shuti tucui lomapi carpacunata shayachishpa tianajurca.

¹⁰Chaimandami Judá aillu runacunaca, filisteocunataca cashna ninajurca: —¿Imashpata ñucanchihuan macanajungapaj, vichai shamunguichi?— nijpimi filisteocunaca, cashna nishpa tigrachinajurca: —Sansón runata japingapajmi, vichai shamunchi. Paitaca, ñucanchita llaquichishcashnallatami llaquichishun— ninajurcami.

¹¹Shina nijpimi, Judá aillu puramanda quimsa huaranga runacunaca, Etam shuti jaca rumicunapi tiaj utujuman rishpa, Sansón runataca cashna ninajurca: —Filisteocuna ñucanchita mandashpa charinajujtaca, ¿nachu yachangui? ¿Imashpata ñucanchitaca cashna llaquipi churangui?— ninajurcami. Shina nijpimi, Sansón runaca: —Ñucaca, paicuna ñucata imashna rurashcashnallatami rurarcani— nishpa tigrachirca.

¹²Shina nijpimi paicunaca: —Ñucanchica, canda japishpa, filisteocunapaj maquipi churangapajmi shamunchi— ninajurca. Shina nijpimi, Sansón runaca: —Ñucataca, napacha huañuchishunllu nishpa juramentuhuaichi— nishpa tigrachirca.

¹³Shina nijpimi paicunaca, cashna nishpa tigrachirca: —Na huañuchishunga, canda japishpa paicunapaj maquipi churangapajllami shamunchi. Ashtahuangarin candaca, napacha huañuchishunllu— nishpami, ishcai mushuj huascacunahuan huatanajurca. Shina huatashpami, pacajushpa tiajushca utujumanda llujchishpa pushanajurca.

¹⁴Sansón runata pushashpa, Lehi shuti lomaman ña chayajpimi, filisteocunaca caparishpa tuparingapaj llujshimurca. Ashtahuangarin Mandaj Diospaj Espíritu Sansón runapajman shamujpimi, paipaj maquita huatashca huascacunaca, lino pucha rupashpa fitirinshna fitirishpa urmarca.

¹⁵Chaipica, burropaj quijadas nara ali chaquishcatami tarirca. Chai quijadasta japishpami, huaranga filisteocunata huañuchirca.

¹⁶Chai jipami Sansón runaca, cashna nirca: “Shuj burropaj quijadashuanmi shuj mundunda, ishcai mundunda huañuchircani. Shuj burropaj quijadashuanmi, huaranga runacunata huañuchircani” nircami.

¹⁷Chashna nishpallami, paipaj maquipi charijuj tullutaca shitarca. Chai pambataca, Ramat-lehi shutitami shutichirca.

¹⁸Sansón runaca, ninanda yacunayachishpami, Mandaj Diosta caparishpa mañashpa cashna nirca: “Cai jatun quishpirinataca, canda servij ñucapaj maquihuanmi quishpichircangui. Shina cashpapash cunanga, ¿yacunayaimanda huañushpachu, circuncisión nishcata na rurashcacunapaj maquipi japi tucusha?” nircami.

¹⁹Chashna mañajpimi Taita Diosca, Lehi shuti pugru pambapi alpata pascarca. Chaimanda llujshimujuj yacuta ufiashpami, Sansón runaca cutin shinlli tucushpa ushaita japirca. Chaimandami chai pushtutaca, En-hacore shutita shutichirca. Chaica, cunangaman Lehi shuti pugru pambapillatami.

²⁰Sansón runaca, filisteocuna llaquichijui punllacunapica, ishcai chunga huatacunatami, israelcunataca mandajurca. Sansón shuti runaca, Gaza shuti pueblomanmi rishca