Read Imbabura Highland Quichua JUECES 2 Bible Online

JUECES 2 - Imbabura Highland Quichua bible

JUECES 2

¹Mandaj Diospaj angelca, Gilgal shuti pueblomanda, Boquim shuti puebloman vichai rishpami, cashna nijurca: “Ñucami cangunataca, Egiptomanda llujchimushpa, cangunapaj ñaupa taitacunaman carashami nishpa juramentushca cai llactaman pushamurcani. Ñucaca cashnami nircani: ‘Cangunahuan ari nishcataca, napacha yangapi churashachu.

²Cangunaca, cai llactapi causajcunahuanllami imatapash na ari nina canguichi. Paicunapaj altarcunataca, tucuillatami urmachina canguichi’ nircanimi. Ashtahuangarin cangunaca, ñuca nishcataca na cazushpami causarcanguichi. ¿Imashpata chashna rurarcanguichi?

³Shinamandami, ñucapash cashna nijuni: ‘Cai llactapi causajcunataca, cangunapaj ñaupajmanda na llujchishpa cachashachu. Ashtahuangarin cangunapaj huashapi astina angushnami canga. Paicunapaj dioscunapash, cangunata nitijachinshna pandachingapajmi canga’ nijunimi” nijurcami.

⁴Mandaj Diospaj ángel, tucui israelcunaman shina villajpimi, tucui gentecuna caparishpa huacanajurca.

⁵Shinamandami, chai pushtutaca, Boquim nishpa shutichirca. Chaipimi animalcunata, Mandaj Diosman cushpa huañuchinajurca.

⁶Josueca, ñami gentecunataca cayacaman nishpa cachashca carca. Israelcunapash, ñami paicuna japina llactacunata japingapaj rishca carca.

⁷Josué causajui tucui huatacunapi, Josuepaj randi mandaj rucucuna mandanajuj tucui huatacunapipashmi, israelcunaca Mandaj Diosta servinajushca carca. Chai rucucunami, jatun ruranacunata israelcunaman Mandaj Dios rurashcata ricushca carca.

⁸Mandaj Diosta servij Josueca, patsaj chunga huatacunata charishpami huañurca. Paica, Nun shuti runapaj churimi carca.

⁹Pai huañujpica, Efraín shuti urcupi tiaj Timnat-sera shuti pueblopimi, paipaj alpapi pambarca. Chai puebloca, Gaas shuti urcu janaj ladomanmi.

¹⁰Tucui chai miraicunapash huañushpami, paicunapaj ñaupa taitacunahuan tandanajugrirca. Chaipaj jipaca, Mandaj Diostapash na rijsij, israelcunamanda imatalla Dios rurashcatapash, na yachaj shuj miraicunami mirarca.

¹¹Chai jipami israelcunaca, Baal shuti dioscunata servishpa, Mandaj Diospaj ñaupajpi nalita ruranajurca.

¹²Paicunapaj ñaupa taitacunata Egipto llactamanda llujchimushca Mandaj Taita Diosta saquishpami, shuj dioscunatara catinajurca. Paicunapaj muyundi llactacunapi causajcunapaj dioscunatara ninanda alicachishpami, Mandaj Diostaca ninanda fiñachinajurca.

¹³Paicunaca, Mandaj Diosta saquishpami Baal, Astarot shuti dioscunatara ninanda alicachinajurca.

¹⁴Chaimandami Mandaj Diosca, nina japirinshna israelcunahuan fiñarishpa, shuhuacunapaj maquipi churarca. Paicunami, tucui ima charishcacunata quichushpa aparca. Shinallata paicunapaj muyundi llactacunapi causanajuj, paicunata fiñajcunapaj maquipipashmi churarca. Israelcunaca, paicunata fiñajcunahuan macanajuitaca, na usharcachu.

¹⁵Paicuna maiman llujshijpipash, paicunata fiñashpami, Mandaj Diosca paipaj maquihuan llaquichijurca. Mandaj Dios imashna villashcashnallata, Mandaj Dios juramentushpa villashcashnallatami llaquichijurca. Shinamandami israelcunaca, jatun llaquita apanajurca.

¹⁶Shina cashpapash Mandaj Diosca, paicuna ima charishcacunata apajcunapaj maquimanda cacharichingapajmi, juezcunata churarca.

¹⁷Ashtahuangarin pai churashca juezcunatapash, na cazushpami israelcunaca, shuj dioscunatara catishpa ninanda alicachishpa causanajurca. Paicunapaj ñaupa taitacuna, Mandaj Dios mandashcacunata cazushpa causanajushca ñanmandaca ñapashmi anchurinajurca. Na paicunapaj ñaupa taitacunashna causanajurcachu.

¹⁸Mandaj Diosca, israelcunata pushachun juezcunata mandashpaca, Mandaj Diosca chai juezcunahuanmi carca. Chaimandami, juezcuna causajui tucui huatacunapica, paicunata fiñajcunapaj maquimanda cacharichirca. Llaquichishpa charijcuna ninanda llaquichijpi aij nishpa causanajujpimi, Mandaj Diosca ninandapacha llaquirirca.

¹⁹Ashtahuangarin shuj juez huañujpica, cashnami tucun carca: Paicunaca, huashaman tigrashpami, shuj dioscunata servingapaj catishpa, paicunapaj ñaupa taitacunatapash yali huaglicunata ruranajurca. Chai dioscunapaj ñaupajpimi cungurishpa mañanajun carca. Chashna rurashpa yacharishca cashpami, nalita ruranatapash na saquinajurca.

²⁰Chaimandami Mandaj Diosca, israelcunahuan nina japirinshna fiñarishpa, cashna nirca: “Cai gentecunaca, paicunapaj taitacunaman ari ninajushpa ñuca cushca mandashcatapash na cazushpami, ñuca rimashcacunatapash na cazunajun.

²¹Chashna rurashcamandaca Josué huañushpa, cai llactamanda na llujchishpa cachai ushashca gentecunataca, ñucapash cangunapaj ñaupajmanda na ashtahuan llujchishpa cachagrinichu” nircami.

²²Mandaj Diosca, israelcunataca paicunapaj taitacunashnalla, paita cazungapaj munajta, na munajtapash ricungapajmi, chai llactapi causanajuj runacunataca, na llujchishpa cacharca.

²³Shinamandami Mandaj Diosca, chai llactapi causanajuj gentecunataca na tucuilla llujchishpa cacharca. Chai gentecunataca, Josuepaj maquipipash na churarcachu.