Read Imbabura Highland Quichua JUECES 20 Bible Online

JUECES 20 - Imbabura Highland Quichua bible

JUECES 20

¹Tucui israelcunami, Dan shuti pueblomandaca Beerseba shuti pueblocaman, Galaad shuti llactapi tucui causajcunandi, Mandaj Diospaj ñaupajpi shujllashnalla tucushpa, Mizpa shuti pueblopi tandanajurca.

²Taita Dios agllashca gentecunapaj tandanajuipica, tucui Israel aillu gentecunata mandajcunapashmi, chaipi tandanajushca ricurirca. Chaipica, espadahuan macanajunata ali yachaj, chaquilla purij, chuscu patsaj huaranga runacunami tandanajushca carca.

³Benjamín aillupaj miraicunaca, israelcuna Mizpa shuti puebloman vichai rishcatami yacharca. Israelcunaca: —Imashnata cai jatun nalitaca rurashcayari. Villaichiyari— ninajurcami.

⁴Shina ninajujpimi, chai huañushca huarmipaj cusa levita runaca, cashna nijurca: —Ñucaca, Benjamín aillupura Gabaa shuti puebloman chayashpami, ñuca caishuj huarmindi, chaipi pacaringapaj rircanchi.

⁵Chai Gabaa shuti pueblopi causajcunaca, ñucata llaquichingapaj jatarishpami ña tutayajpica, ñucata huañuchina yuyaihuan ñucanchi tiajuj huasi muyundipi shayarirca. Shinamandami llaquichishpa pingaichijpi, ñuca caishuj huarmica huañurca.

⁶Chaimandami, ñucapaj caishuj huarmitaca japishpa, asha asha fitishpa, israelcuna causanajuj tucui Israel llactaman cacharcani. Israel llactapi nalita rurashpa huañuchishcamandami, chashna cacharcani.

⁷Ricuichi, tucui cangunami, Israel aillucuna canguichi. Shina cashcamanda, canguna imashna yarinajushpapash ali yuyaita cuichilla— nijurcami.

⁸Shina nijpimi, tucuicuna shujllashnalla jatarishpa, cashna ninajurca: —Ñucanchi puramandaca, maijambash na paipaj carpaman ringachu. Ñucanchi puramandaca, maijanllapash na paipaj huasiman tigrangachu.

⁹Ashtahuangarin cunanga, Gabaa shuti pueblopi causajcunahuan macanajungapaca, cashnami rurashun: Paicunahuan macanajungapaca, suerteta rurashpami vichai rishunchi.

¹⁰Tucui Israel aillu puramandaca, patsajmanda chunga runacunata agllashunchi. Huarangamandaca patsajta, chunga huarangamandaca, shuj huarangata agllashpa, gentecunaman micunacunata apamuchun cachashunchi. Caishujcunaca, Benjamín llactapi tiaj Gabaa shuti pueblopi causajcunapajman rishpa, ñucanchi Israel puracunapi, tucui nalicunata rurashcashnallata paicunatapash llaquichishunchi— ninajurcami.

¹¹Shina nishpaca, tucui israelcunami Gabaa shuti pueblopi causajcunahuan macanajungapaj, shujllashnalla tucushpa huatarishcashna tandanajurca.

¹²Chaimandami Israel aillucunaca, Benjamín aillu runacuna causanajuj tucui llactapi, cashna nichun runacunata cacharca: “Canguna puramandaca, ¿imashpata cashna nalita rurarcanguichi?

¹³Shina cashcamanda cunanga, cai Gabaa shuti pueblopi causanajuj nalita ruraj chai runacunata huañuchingapaj, ñucanchiman cuhuaichi. Shina huañuchishpami, chai jatun nalitaca cai Israel llactamanda chingachishun” nichunmi cacharca. Ashtahuangarin Benjamín aillu runacunaca, paicunapaj huauqui israelcuna chashna nishcataca na uyanayachircachu.

¹⁴Ashtahuangarin Benjamín aillu runacunaca, israelcunahuan macanajungapajmi, Gabaa shuti pueblo muyundipi tiaj pueblocunamanda tandanajurca.

¹⁵Chai punllapica Benjamín aillu runacunataca, espadahuan macanajunata ali yachaj, ishcai chunga sucta huaranga runacunatami, tucuilla pueblocunamanda cuentashca carca. Gabaa shuti pueblopi causanajuj, canchis patsaj agllashca runacunataca, na cuentashcachu carca.

¹⁶Chai tucui runacunamandaca, imata cashpapash lluqui maquihuanlla ruraj, canchis patsaj runacunatami agllashca carca. Paicunaca, huaracahuan rumita shitanata alipacha yachashpami, shuj ajchapi chayachingapaj rumita shitashpapash, na pandan carca.

¹⁷Benjamín aillu runacunata na cuentajpipash, caishuj Israel aillu runacunaca, espadahuan macanajuj, chuscu patsaj huaranga soldadocunami carca. Tucui paicunami, macanajunata ali yachajcuna carca.

¹⁸Chai jipaca, israelcuna jatarishpaca, Taita Diospaj huasiman vichai rishpami, Taita Diosta cashna nishpa tapunajurca: “¿Benjamín ailluhuan macanajungapaca, ñucanchi puramandaca, ¿maijan ailluta pundaca vichai rina canchi?” ninajurcami. Shina nijpimi, Mandaj Diosca: “Judá aillurami macanajugrina” nishpa tigrachirca.

¹⁹Shina nijpimi, israelcunaca tutamandata jatarishpa, Gabaa shuti pueblopi causajcunahuan macanajungapaj rinajurca.

²⁰Shinami israelcunaca, Benjamín ailluhuan macanajungapaj llujshirca. Shina llujshishpami israelcunaca, Gabaa shuti pueblo ladollapi macanajungapaj alichirinajurca.

²¹Ashtahuangarin Benjamín aillu runacuna, Gabaa shuti pueblomanda llujshishpa macanajushpami, ishcai chunga ishcai huaranga Israel runacunata, chai punllapica huañuchishpa alpapi urmachirca.

²²Shina cajpipash Israel runacunaca, cutinllata shinlli tucushpami, punda punlla macanajungapaj alichirishca pambapillata cutin macanajungapaj alichirinajurca.

²³Israelcuna vichai rishpami, Mandaj Diospaj ñaupajpi tutayangacaman huacashpa, Mandaj Diostaca cashna nishpa tapunajurca: “¿Ñucanchi huauqui Benjamín ailluhuanga, cutinllu macanajugrishun?” ninajurcami. Shina nijpimi, Mandaj Diosca: “Paicunahuan macanajungapaj vichai richilla” nishpa tigrachirca.

²⁴Shinamandami israelcunaca, Benjamín ailluhuanga, cayandi punllapash cutin macanajugrirca.

²⁵Chai cayandi punllapash Benjamín aillu runacunaca, Gabaa shuti pueblomanda llujshishpami, israelcunahuan macanajurca. Chaipimi, chunga pusaj huaranga israelcunata huañuchishpa, alpapi urmachirca. Chai huañuj runacunaca, tucuicunami espadahuan macanajunata ali yachajcuna carca.

²⁶Chaimandami, tucui israelcunapash, tucui soldadocunapash, Taita Diospaj huasiman vichai shamunajurca. Chaipimi, Mandaj Diospaj ñaupajpi tiarishpa, chai punllapica na micushpa tutayangacaman huacanajurca. Shinallata animalcunata cushpa tucuillata rupachishpami, Mandaj Dioshuan ali cangapajpash, shuj caranacunata caranajurca.

²⁷Israelcunaca, cutinmi Mandaj Diosta tapunajurca. (Taita Dioshuan ari ninajushpa escribishcata alichina arcami, chai punllacunaca chaipi carca.

²⁸Chai punllacunapica, Aaronbaj churi Eleazar shuti runapaj churi Finees shuti curami, chai arcapaj ñaupajpi Taita Diospajta rurajurca). Chaipimi israelcunaca, Mandaj Diostaca cashna nishpa tapunajurca: “Ñucanchi huauqui Benjamín ailluhuanga, ¿cutinllu macanajugrishun, na cashpaca saquinallachu capanchi?” ninajurcami. Shina nijpimi, Mandaj Diosca: “Macanajugrichilla, ñucami cayapaca cangunapaj maquipi churasha” nirca.

²⁹Shina nijpimi israelcunaca, Gabaa shuti pueblo muyundipi pacalla chapajcunata churarca.

³⁰Ña quimsa punlla tucujpimi israelcunaca, Benjamín aillupaj miraicunahuan macanajungapaj vichai rirca. Chaipimi paicunaca, Gabaa shuti pueblo chimba purapi punda punllacunashnallata macanajungapaj alichirinajurca.

³¹Benjamín aillupaj miraicunaca, israelcunahuan tuparingapaj llujshishpami, Gabaa shuti pueblomanda caruyanajurca. Chaipimi, huaquin gentecunata chugrichishpa, pundashnallata israelcunataca ñangunapi huañuchi callarirca. Chai ñangunamanda shujca, Bet-el shuti puebloman rina ñanmi, shujca pambacunata yalishpa, Gabaa shuti puebloman rina ñanmi. Chaipipash, quimsa chungashna runacunatami huañuchirca.

³²Chashna huañuchishpami, Benjamín aillupaj miraicunaca: “Pundashnallatami, ñucanchi ñaupajpi mishai tucunajun” ninajurcami. Ashtahuangarin israelcunaca, cashnami ninajurca: “Paicunata pueblomanda ashtahuan caruyachingapaca, ñangunacaman pacajungapaj calpashunchi” ninajurcami.

³³Ña caruyajpimi caishuj israelcunaca, tianajushca pushtumanda jatarishpa, Baal-tamar shuti pueblo ladopi macanajungapaj alichirinajurca. Gabaa shuti pueblopi tiaj michina pambacunapi pacalla chapanajuj israelcunapashmi llujshirca.

³⁴Gabaa shuti pueblopi causajcunahuan macanajungapaca, tucui Israel puramanda agllashca chunga huaranga runacunami shamurca. Chai macanajuica, ashtahuanmi shinlliyajurca. Ashtahuangarin Benjamín aillu runacunaca, ninan llaqui paicunata japigrijujtaca na yacharcachu.

³⁵Israelcunaca, Mandaj Dios mishachijpimi, chai punllapica Benjamín aillu runacunataca, ishcai chunga picha huaranga patsaj soldadocunata huañuchirca. Chai huañuj runacunaca tucuicunami, espadahuan macanajunata ali yachajcuna carca.

³⁶Benjamín aillu runacunaca, mishai tucunajushcatami ricunajurca. Caishuj israelcunaca, Gabaa shuti pueblo huashapi pacalla chapanajuj runacuna macanajushpa mishangallami yashpami, Benjamín aillu runacunahuanga, na macanajushpa anchurinajurca.

³⁷Pacalla chapanajuj runacunaca, Gabaa shuti puebloman cungashcapi ñapash yaicushpa espadahuan chugrichishpami, pueblopi causajcunataca tucuillata huañuchirca.

³⁸Pacalla chapanajuj israelcunahuan, caishuj israelcunahuanga: “Chai pueblomandaca, cushnita vichai cachashpa ricuchinguichi” nishpami, paicunapura ña parlarishcalla carca.

³⁹Benjamín aillu runacunaca, israelcuna tigrashpa calpanajujpimi, catishpa chugrichishpa Israel runacunataca, quimsa chungatashna huañuchirca. Shinamandami, ña cashna ninajurca: “Paicunaca, punda macanajuipishnallatami, ñucanchi ñaupajpi mishai tucushpa urmanajun” ninajurcami.

⁴⁰Ashtahuangarin pueblomandaca, pilarshna cushni vichai llujshi callarijujpimi, Benjamín aillu runacunaca huashaman tigrarishpa ricunajurca. Chai cushnitaca, jahua pachacaman ninanda vichai rijujtami ricunajurca.

⁴¹Chaimandami israelcunaca, paicunahuan macanajungapaj tigrarirca. Ashtahuangarin Benjamín aillu runacunaca, paicunata ninan llaqui japijujta yachashpami, ninanda manllarinajurca.

⁴²Chaimandami israelcunapaj ñaupajmanda tigrarishpaca, jichushca pambaman rina ñanda calpanajurca. Ashtahuangarin israelcunaca, huashata catijcunapash japigrishpa, pueblocunamanda llujshijcunapash tuparishpami, chaupipi churashpa huañuchishpa tucuchirca.

⁴³Chashna muyundi jarcashpami, Benjamín aillu runacunataca, Menúha shuti pueblomandapacha, indi llujshimuj ladoman tiaj Gabaa shuti pueblo muyundi chimba puracaman catishpa huañuchishpa sarunajurca.

⁴⁴Benjamín aillu runacunataca, chunga pusaj huaranga soldadocunatami huañuchirca. Paicunaca, macanajunata ali yachajcunami carca.

⁴⁵Cutin tigrashpami, Rimón shuti jaca rumi ladopi pacajungapaj, jichushca pambata calpanajurca. Paicunatapash, picha huaranga runacunatami ñangunapi huañuchirca. Shinallata Gidom shuti pueblocaman catishpami, chai runacunataca, ishcai huaranga runacunata huañuchirca.

⁴⁶Chai punllapica, Benjamín aillu puramanda tucui huañushcacunaca, espadahuan macanajunata ali yachaj, ishcai chunga picha huaranga runacunami carca. Paicunaca, tucuicunami macanajunata ali yachajcuna carca.

⁴⁷Ashtahuangarin Benjamín aillu puramanda sucta patsaj runacunaca, jichushca pambaman tigrashpami, Rimón shuti jaca rumi ladopi pacajunajurca. Chai Rimón shuti jaca rumi ladopica, chuscu quillatami causanajurca.

⁴⁸Israel runacunaca cutin tigrashpami, Benjamín aillu runacunataca, tucui pueblocunapi causajcunatapash, animalcunatapash, tucui imalla ricurishcata, espadahuan chugrichishpa huañuchirca. Shinallata tucui ricurishca pueblocunatapashmi rupachirca. Benjamín aillu runacunaman huarmicunata cushcatami villajun