Read Imbabura Highland Quichua JUECES 21 Bible Online

JUECES 21 - Imbabura Highland Quichua bible

JUECES 21

¹Israel runacunaca, Mizpa shuti pueblopimi cashna nishpa juramentushca carca: “Ñucanchi puramandaca, maijanllapash ñucanchi ushicunataca, Benjamín aillu runacunapaj huarmi cachunga, na cushunllu” nishcami carca.

²Gentecunaca, Taita Diospaj huasiman shamushpami, Taita Diospaj ñaupajpi ninanda caparishpa tutayangacaman huacashpa, cashna ninajurca:

³“Israelcunata Mandaj Taita Dioslla. Israel puracunapaj shuj aillu illaj quedangapaca, ¿imashpata ñucanchi Israel purapica, cashna tucushcayari?” ninajurcami.

⁴Chai cayandi punllapimi gentecunaca, tutamandata jatarishpa, chaipillata shuj altarta ruranajurca. Chai jipami, Diosman animalcunata cushpa tucuillata rupachinajurca. Shinallata Dioshuan ali cangapaj shuj caranacunatapashmi caranajurca.

⁵Chai jipami israelcunaca, cashna ninajurca: “Tucui Israel aillu puramandaca, ¿maijan ailluta Mandaj Diospaj ñaupajpi tandanajungapaj, na vichai shamushca? Mizpa shuti puebloman, Mandaj Diospajman maijambash na vichai shamujpica: ‘Huañuchishumbacha’ nishpami, alipacha juramenturcanchi” ninajurcami.

⁶Shinallata tucuilla israelcunami, paicunapaj huauqui Benjamín aillumandaca, ninanda llaquirishpa cashna ninajurca: “Cunanga, Israel puramandaca, shuj aillumari anchuchi tucushca.

⁷Ñucanchica, Mandaj Diospaj shutipimi, cashna nishpa juramenturcanchi: ‘Benjamín aillu runacunapaj huarmi cachunga, ñucanchi ushicunataca na cushunllu’ nircanchimi. Chai huaquin puchushca runacunataca, ¿maijan huarmicunahuanshi cazarachishun?” ninajurcami.

⁸Cashnatapashmi ninajurca: “Ñucanchi Israel aillu puramandaca, ¿maijan aillupash na shamushpa quedashcachu?” nishpami tapunajurca. Shina tapushpami, Galaad llactapi tiaj Jabes shuti pueblopi causajcunamandaca, shujllapash na shamushcata tarirca.

⁹Tucuicunata cuentajpica, Galaad llactapi tiaj chai Jabes shuti pueblopi causajcunaca, shujllapash na ricurircachu.

¹⁰Chaimandami chai tandanajushca gentecunaca, chunga ishcai huaranga ashtahuan shinlli runacunata cashna nishpa cacharca: “Galaad llactapi tiaj Jabes shuti pueblopi causajcunataca, huarmicunandi, huahuacunandi, espadahuan chugrichishpa huañuchigrichi.

¹¹Ashtahuangarin cashnami rurana canguichi: Tucuilla jaricunatapash, jarihuan ña tacarishca tucuilla huarmicunatapash huañuchina canguichi” ninajurcami.

¹²Galaad llacta Jabes shuti pueblopi causanajuj puramandaca, jarihuan nara tacarishca chuscu patsaj cuitsacunatami tandachinajurca. Paicunataca, Canaán llactapi carpacunata shayachishca tianajuj Silo shuti pueblomanmi pushamunajurca.

¹³Chai jipami, tandanajushca tucui israelcunaca, Rimón shuti jaca rumi ladopi tianajuj Benjamín aillupaj miraicunahuan parlachun cacharca. Paicunataca, casilla aligutami pusharca.

¹⁴Shina cachajpimi, Benjamín aillu runacunaca, israelcunapajman tigramurca. Paicunataca, Galaad llacta Jabes shuti pueblopi causajcunata huañuchishca puramanda pushamushca huarmicunahuanmi cazarachirca. Ashtahuangarin huarmicunaca, tucuicunahuan cazarachingapaca na pactarcachu.

¹⁵Israel aillu puramandaca, patata t'uninshna Mandaj Dios anchuchishcamandami, israelcunaca Benjamín ailluta ninanda llaquinajurca.

¹⁶Shinamandami, tandanajushca puramanda mandaj rucucunaca, cashna ninajurca: “Cunanga, chai aillu puramanda puchushca runacunataca, ¿maijan huarmicunahuanshi cazarachishun? Benjamín aillu huarmicunaca, huañuchi tucushcamari” ninajurcami.

¹⁷Cashnatapashmi ninajurca: “Israel aillu puramanda shuj aillullapash ama chingachunga, Benjamín aillu puramanda puchushca cai runacunallapash, alpata japishpami ali canman.

¹⁸Shina cashpapash ñucanchi ushicunataca, napacha paicunahuan cazarachi ushashunllu. Israelcunaca: ‘Benjamín aillu runacunahuan maijambash cazarachishpaca, jatun llaquita apachun’ nishpami juramenturcanchi.

¹⁹Cunanga uyaichi. Silo shuti pueblopimi, Mandaj Diosman jatun fiestata huatapi huatapi ruran. Chai puebloca, Bet-el shuti pueblo janaj ladomanmi. Bet-el shuti pueblomanda, Siquem shuti puebloman rina ñanmandaca, indi huashajuj ladomanmi. Shinallata Lebona shuti pueblomandaca, urai ladomanmi” ninajurcami.

²⁰Chashna ninajushpami, Benjamín aillupaj miraicunataca, cashna nishpa mandanajurca: “Uvas chagracunapi pacalla chapagrichi.

²¹Chaipica, Silo shuti pueblopi causajcunapaj ushicuna tandanajushca bailangapaj llujshinajujta, ali ricurianguichi. Ña llujshijpica, pacajushpa tianajushcamanda llujshishpa, tucuicuna chai cuitsacunata, cangunapaj cachun shuj shuj shuhuashpa, canguna causanajuj Benjamín llactaman tigranguichilla.

²²Canguna shuhuashcamanda, chai cuitsacunapaj taitacuna, na cashpaca turicuna ñucanchita imatapash nij shamujpica, cashnami nishun: ‘Paicunahuan cazarachun saquipaichilla. Ñucanchimi, jatun macanajuiman rishpapash, huarmicunataca na tucuillaman apamushcanchi. Ashtahuangarin paicunapaj huarmi cachunga canguna cushca cashpachu, cangunaca juchachi tucunguichiyari’ nishunmi” ninajurcami.

²³Shina nijpimi, Benjamín aillupaj miraicunaca, paicuna mashna cashcashnallata, chai pueblopi danzangapaj llujshishca cuitsacunataca, shuj shuj shuhuashpa, paicunapaj llactaman tigranajurca. Chai jipami, paicunapaj pueblocunata alichishpa, chaipillata causai callarirca.

²⁴Shinallata caishuj israelcunaca, tucuicunami chaimandaca paicunapaj aillu purapajman, paicunapaj familiacunapajman rinajurca. Chaimanda llujshishpaca, tucuicunami paicunapaj alpacunaman rinajurca.

²⁵Chai punllacunapica, Israel llactapica jatun mandaj na tiarcachu. Chaimandami, tucuicuna paicuna munashcata rurashpa causanajurca.