Read Imbabura Highland Quichua JUECES 3 Bible Online

JUECES 3 - Imbabura Highland Quichua bible

JUECES 3

¹Canaán llactapi tiashca tucui macanajuicunata nara yachashca tucui israelcuna, imashna catinajujta ricungapajmi, Mandaj Diosca shuj llactapi causajcunata saquirca. Chai llactacunaca, caicunami:

²Israelcunapaj jipa miraicuna macanajunata rijsinajuchun, macanajunata punda na yachajushcacunata yachachinajuchunllami chashna saquirca.

³Filisteocunata picha mandajcunata, tucui cananeocunata, Sidón shuti llactapi causajcunata, heveocunatami saquirca. Chai heveocunaca, Baal-hermón shuti urcumanda callarishpa, Hamat shuti puebloman chayana ñangamanmi causanajurca.

⁴Paicunataca, israelcuna imashna cajta ricungapajmi chashna saquirca. Mandaj Diosca, pai mandashcacunata cazuj, na cazunajujtapash yachangapajmi chashna saquirca. Chai mandashcacunataca, paicunapaj ñaupa taitacunaman cuchunmi, Moisespaj maquipi cushca carca.

⁵Chashnami israelcunaca: Cananeo, heteo, amorreo, ferezeo, heveo, jebuseo nishca gentecunapaj chaupipi causanajurca.

⁶Paicunapaj huarmi cachunga, chai runacunapaj ushicunatami japinajurca. Shinallata paicunapaj ushicunatapash, chai runacunapaj churicunahuanmi cazarachinajurca. Chai runacunapaj dioscunatami servinajurca.

⁷Israelcunaca, Mandaj Diospaj ñaupajpi nalita rurashpami causanajurca. Paicunata Mandaj Taita Diosta cungashpami, Baal shuti dioscunata, Asera shuti huarmi diosman rijchajcunata servishpa causanajurca.

⁸Chaimandami Mandaj Diosca, nina japirinshna fiñarishpa israelcunataca, Mesopotamia llactata jatun mandaj Cusan-risataim shuti runapaj maquipi churarca. Israelcunaca pusaj huatatami, Cusan-risataim shuti runata servishpa causanajurca.

⁹Shinamandami israelcunaca, Mandaj Diosta caparishpa mañanajurca. Shina mañajpimi Mandaj Diosca, israelcunaman shuj quishpichijta churashpa quishpichirca. Chai quishpichijca, Caleb shuti runapaj jipa huauqui Cenaz shuti runapaj churi Otoniel shuti runami carca.

¹⁰Otoniel runaca, Diospaj Espíritu paipajman shamujpimi, israelcunapaj juez tucushpa macanajuiman llujshirca. Shina llujshijpimi Mandaj Diosca, Siria llactata jatun mandaj Cusan-risataim shuti runataca, paipaj maquipi churarca. Paimi, Cusan-risataim shuti runataca misharca.

¹¹Chai llactaca, chuscu chunga huatatami, casilla aliguta samajurca. Chai jipami, Cenaz shuti runapaj churi Otonielca huañurca.

¹²Israelcunaca, cutinmi Mandaj Diospaj ñaupajpi nalita ruranajurca. Shinamandami Mandaj Diosca, israelcunata llaquichijuchun Moab llactata jatun mandaj Eglón shuti runaman ushaita curca. Mandaj Diospaj ñaupajpi nalita rurashcamandami, chashna rurarca.

¹³Chai mandajca, amonitacunata, amalecitacunata paihuan tandachishpa shamushpami, israelcunata chugrichishpa huañuchirca. Shina rurashpaca, palmera quirucuna tiaj pueblotami quichurca.

¹⁴Chaimandami israelcunaca, moabitacunata jatun mandaj Eglón shuti runataca, chunga pusaj huatacaman servishpa causanajurca.

¹⁵Shinamandami israelcunaca, Mandaj Diosta caparishpa mañanajurca. Shina mañajpimi Mandaj Diosca, shuj quishpichijta churarca. Paica, Gera shuti runapaj churi Aod shutimi carca. Gera shuti runaca, Benjamín aillu purami carca. Aod shuti runaca, lluqui maquihuanllami imatapash ruran carca. Paitami israelcunaca, Moab llactata jatun mandaj Eglón shuti runaman caranata cugrichun cacharca.

¹⁶Aod shuti runaca, chaupi metro largo ishcai filoyu espadatami rurashca carca. Paica, pai churajushca ucuman chumbilirishpami, chai espadataca ali ladoman churashpa aparca.

¹⁷Chai caranataca, Moab llactata jatun mandaj Eglón shuti runamanmi curca. Eglón shuti runaca, racu racu runami carca.

¹⁸Chai caranata Eglón shuti runaman cushca jipami, chai caranata apamushca gentecunataca, cayacaman nishpa cacharca.

¹⁹Ashtahuangarin paica, Gilgal shuti pueblopi yanga dioscuna tianajuj pambamandalla cutin tigrashpami, cashna nirca: —Jatun mandajlla, pipash na yachanalla shuj villanatami, canman villanata charipani— nijpimi chai mandajca, paita servijcuna canllaman llujshingacaman, upalla cachun mandarca.

²⁰Rupai punllacunapi llanduna ucupi pailla tiajujpimi Aod shuti runaca, ashtahuan quimirirca. Chaipimi, Aod shuti runaca: —Taita Diospaj Shimitami, canman villangapaj charini— nirca. Shina nijpimi Eglón shuti runaca, pai tiajushcamanda jatarirca.

²¹Pai jatarijpica Aod shuti runaca, ali ladoman huatarishca espadata, lluqui maquihuan surcushpami, Eglón shuti runapaj vijsapi satirca.

²²Shina satijpimi espadaca, maqui charinandi tucuilla huashajurca. Eglón shuti runaca, racu racu cajpimi, chai espadaca maqui charinandi huashajujpi, chai espadataca na surcushpa paipaj vijsapillata saquirca. Shinamandami mapapash llujshirca.

²³Chai jipami Aod shuti runaca, canlla corredorman llujshishpa, chai huasi pungucunatapash vichashpa, chaitaca aldabahuan ali jarcashpa llujshirca.

²⁴Pai rishca jipa, jatun mandajta servijcuna shamushpami, chai llandurina huasi pungucuna vichashcata ricurca. Chaimandami paicunaca: “Jatun mandajca, cai llandurina huasi ucupica, pai minishtishcatapachami rurajunga” yanajurca.

²⁵Paicunaca ña unaita shuyashpa, pungucunatapash na pascajpimi, imata ruraitapash na ushashpa llaveta japishpa, punguta pascanajurca. Punguta pascashpaca, paicunata mandajtaca alpapi huañushca sirijujtami ñapash ricunajurca.

²⁶Ashtahuangarin paicuna chaita ricushpa unayangacamanmi Aod shuti runaca, Gilgal shuti pueblopi yanga dioscuna tiaj pambatapash yalishpa, Seirat shuti puebloman rishpa quishpirirca.

²⁷Chaiman ña yaicushpami Aod shuti runaca, Efraín shuti urcupi cachuta huacachirca. Chashna huacachijpimi israelcunaca, Aod shuti runahuan urcumanda urai rinajurca. Paica, paicunata ñaupashpami urai rijurca.

²⁸Chaipimi Aod shuti runaca, paicunataca cashna nirca: “Ñucata catihuaichilla. Cangunata fiñaj moabitacunataca, Mandaj Diosmi cangunapaj maquipi churashca” nircami. Shina nijpimi, Aod shuti runata catishpa urai rinajurca. Paicunaca, Jordán yacuta chimbai ushanalla pushtucunapi chapashpami, moabitacunataca shujllatapash na yalichun saquirca.

²⁹Chai punllacunapimi, chunga huarangashna moabitacunata huañuchirca. Paicunaca, tucuicunami macanajunata ali yachaj, shinlli runacuna carca. Paicunaca, shujllapash na pacajushpa quedarcachu.

³⁰Chai punllapica, chashnami moabitacunaca israelcunapaj maquipi cazuchi tucunajurca. Chai llactaca, pusaj chunga huatatami, casilla aliguta samajurca.

³¹Aod shuti runa huañushca jipaca, Anat shuti runapaj churi Samgar shuti runami, israelcunata quishpichirca. Paica, filisteo puracunataca, huagrata tujsina jirruhuanmi sucta patsaj runacunata huañuchirca. Chashnami paipash, israelcunata quishpichirca.