Read Imbabura Highland Quichua 2 JUAN 1 Bible Online

2 JUAN 1 - Imbabura Highland Quichua bible

2 JUAN 1

¹Crijcunata mandaj rucu cashpami, Dios agllashca paniguman, cambaj huahuacunamambash escribimuni. Ñucami, tucui shunguhuambacha cangunataca juyani. Na ñucalla juyanichu. Ashtahuangarin na llullashpa villajuj Shimita yachajushca crijcunapash, tucuicunami juyanajun.

²Na llullashpa villajuj Shimica, ñucanchipi causaita causaicaman ñucanchihuanmi canga.

³Taita Diospash, Taita Diospaj Churi Apunchi Jesucristopash ninan juyaita, llaquinata, casilla ali causaiguta cangunaman carachunmi munani. Na llullashpa villajuj Shimipi nijunshna, juyarishpa causanata carachun.

⁴Cambaj huahua puracunamanda huaquingunataca, Taita Dios mandashcashna, na llullashpa villajuj Shimita catishpa causanajujtami ricurcani. Shinamandami, ninandapacha cushijurcani.

⁵Panigu, cunanga caigutallami ningapaj munani: “Caishujhuan chaishujhuan juyarinami canchi” nishpaca, nara mandashca shuj mushuj shimitaca na escribimunichu. Ashtahuangarin cri callari punllamandapacha, caitaca ña yachanchimi.

⁶“Juyarishpami causana canguichi” nishpa, Dios mandashca shimicunataca, pactachinami canchi. “Juyarishpami causana canguichi” nishcataca, cri callarishca punllamandapacha ña uyashcanguichimi.

⁷Llullashpa yachachijcunaca, ashtacacunami cai pachapica purinajun. Paicunaca: “Jesucristoca, na runa aichayu tucushpa shamurcachu” ninajunmi. Chashna nishpa llullashpa yachachijmi, Cristota fiñaj runa.

⁸Granota fucuchinshna canguna imatalla rurashcata ama chingachingapaca, aliguta yarishpa causanguichi. Ashtahuangarin Dios caranataca, tucuillatapacha japigrinata ashtahuan yaringuichi.

⁹Cristo yachachishcata na catishpa, miraihuan yachachij runaca, napacha Taita Dioshuanllu. Ashtahuangarin Cristo yachachishcata catij runami, Taita Dioshuambash, paipaj Churihuambash.

¹⁰Pipash cangunapajman cai yachachishcata na yachachingapaj shamujpica, huasipipash na chasquinachu canguichi. “¿Alillachu shamupangui?” nitallapash, na nininachu canguichi.

¹¹Maijambash: “¿Alillachu shamupangui?” nishpaca, paishnallatami nalicunata rurajun.

¹²Cangunaman escribinataca, ashtacatami charini. Papelpi, tintahuan escribishpalla yachachingapaca na munanichu. Ashtahuangarin cangunapajman rishpa, ñavi ñavi chimbapura parlanatami yariajuni. Cangunahuan ninanda cushijungapajmi, shina ringapaj munani.

¹³Dios agllashca cambaj ñañapaj huahuacunapash, candaca alillachu capangui ninajunmi. Shina cachun.