Read Imbabura Highland Quichua 3 JUAN 1 Bible Online

3 JUAN 1 - Imbabura Highland Quichua bible

3 JUAN 1

¹Crijcunata mandaj rucu cashpami, ñuca juyashca Gayo shuti huauquiguman, caitaca escribini. Candaca, tucui shunguhuanmi juyajuni.

²Juyashca huauquigu, canga tucui shunguhuanmi Diosta catijungui. Shinallata tucui ima ruranapipash, cambaj cuerpopash, ali cachunmi munapani.

³“Na llullashpa villajuj shimita crishpami, aliguta causajun” nishpami, caishuj huaquingunaca ñucapajman shamushpa, canmanda villahuarca. Shina villajpimi, ninanda cushijurcani.

⁴“Na llullashpa villajuj Shimita ñuca huahuacunashna causanajushpa, aliguta catinajun” nijta uyashpami, ninandapacha cushijuni.

⁵Juyashca huauquigu, canga crijcunata servishpami, aliguta rurajungui. Na rijsishca crijcunamangarin, ashtahuan aligutami rurajungui.

⁶Paicunami, can imashna juyashcataca, caipi tandanajushca crijcunaman villarca. Taita Diosta servijcuna cajpimi, pai munashcashna ashtahuan purichun, imagupaj illajpipash ricushpa carashpa cachapangui nini.

⁷Cristota juyaimanda villashpa purijcuna cashpami, na crijcunapaj maquimandaca, imatallapash na japinajun.

⁸Shina cajpimi ñucanchica, paicunaman imagutapash caranata charinchi. Shina carashpami, na llullashpa villajuj Shimita ashtahuan villachun ayudanchi.

⁹Tandanajuj crijcunamanmi, ña escribimurcani. Ashtahuangarin Diótrefes shuti runaca, paicunata mandangapaj yaicushapacha nishpami, ñucanchi rimashcataca na cazujun.

¹⁰Chashna cajpimi ñuca rishpaca, ñucanchita llullashpa nali shimita huasha parlashcata tapuchingapaj, paita cayachun cachasha. Paica, na chaitalla rurajunllu. Ashtahuangarin shuj crijcuna chayajpipash, na mingachinllu. Maijan mingachingapaj munajcunatapash, napacha mingachinachu nishpami, tandanajuj crijcunamandapash llujchishpa cachajun.

¹¹Juyashca huauquigu, imatapash nalita ruranataca ama catishpa, ashtahuangarin aliguta rurashcata catingui. Maijan cashpapash aliguta rurashpa causajushpaca, Taita Diospajmi. Ashtahuangarin maijan cashpapash nalita rurashpa causajujca, Taita Diosta na ricushcachu.

¹²Demetrio shuti runataca, tucuicunami alicachishpa parlanajun. Na llullashpa villajuj Shimita catishpami, paica aliguta causajun. Ñucanchipash, paitaca alicachinchimi. Ñucanchi villashca shimipash, na llulla cajtaca, cangunallata yachanguichimi.

¹³Canman escribinataca, ashtacatami charini. Tintahuan, plumahuan escribishpalla yachachingapaca na munanichu.

¹⁴Ashtahuangarin canda ricungapajmi, uchalla ringapaj munani. Chaipimi, chimbapura ñavi ñavi ricushpa parlanajushun.

¹⁵Casilla ali causaita charichunmi munani. Canda alipacha rijsijcunapash, alillachu capangui ninajunmi. Ñucanchipaj alipacha rijsijcunatapash, alillachu capanguichi ninajunmi nipangui.