Read Imbabura Highland Quichua JUDAS 1 Bible Online

JUDAS 1 - Imbabura Highland Quichua bible

JUDAS 1

¹Jesucristota servij Judasmi cani. Jacobopaj huauquimi cani. Taita Diosmi cangunataca, paipajlla causachun cayarca. Jesucristomandami, cangunataca Diosca alichishpa charijun. Cangunamanmi caitaca escribini.

²Cangunapica, ninanda llaquinatapash, casilla ali causaigutapash, juyaitapash ashtahuan mirachijuchunmi munani.

³Juyashca crijcuna, cangunatapash, ñucatapash Dios quishpichishcata yachanchimi. Shina cajpimi escribinata ninanda yarijushpallata, cangunaman escribini. Diosmi crinataca, paipajlla causajcunaman shuj viajella caramushca. Chaita ashtahuan shinlli catichunmi, aliguta yarichishpa escribini.

⁴Huaquin runacunaca, ñucanchi purapi ñamari pacalla yaicunajushca. Diosta na manllaj, pundamandapacha ninan llaquiman rinapachami nishca runacunami yaicunajushca. Paicunaca imashna causajpipash, Taita Diosca juyanllami ninajunmi. Shinallata shujlla mandaj Taita Diospash, ñucanchi Apunchi Jesucristopash na tianllu ninanajunmi.

⁵Ña yachajpipash, caitami cangunaman cutin yarichingapaj munani: Jatun Diosca, pai agllashcacunata Egiptomanda llujchishpa quishpichishpapash, paita na crijcunataca tucuchishcallami.

⁶Shinallata angelcunapash, paicuna alicachi tucushcata na alichishpami, ashtahuangarin paicuna causashca pushtutapash saquinajurca. Chaimandami paicunataca, ninanda llaquichina punlla chayangacaman, yana yana ucupi causaita causaicaman prezu charijun.

⁷Sodoma shuti, Gomorra shuti pueblocunapi causajcunapash, chai ladolla shuj pueblocunapi causajcunapash, chai angelcunashnami, paicuna purallata huainayashpa na rurana jatun nalicunata ruranajushca. Shinamandami, causaita causaicaman rupajuj ninahuan ninanda llaquichi tucurca. Cunambi ama chashna causachun ricuchingapajmi, chashna tucushca.

⁸Chai gentecunashnallatami, cunambi muscujcunapash, paicunapaj cuerpotaca mapayachinajun. Mandana ushaita charij Jesustapash na cazushpami, jahua pachapi tiaj mandajcunatapash nali shimicunata rimanajun.

⁹Angelcunata mandaj ángel Miguelca, Moisés huañushca cuerpogutami, diablohuan quichurishpa fiñanajushca. Chashna quichurinajushpapash, diablota ninan llaquiman cachangapaj, ima nalitapash na rimarcachu. Ashtahuangarin: “Jatun Dios candaca, jarcashpa rimachun” nircami.

¹⁰Ashtahuangarin chai yachachijcunaca, paillata na rijsishca imacunatapashmi, nali shimicunata rimanajun. Paicunaca, imatapash yachana cashcamanda yachashpami, juizu illaj animalcunashna huaglita rurashpa causanajun.

¹¹¡Aij, paicunaca imachari tucunga! Caín shuti runapaj ñandamari catinajun. Balaam shuti runashnamari, culquita munaimanda pandanajun. Na cazushpa huañuchi tucushca Coré shuti runashnami, chingaita chingagrinajun.

¹²Chai runacunaca, crij puralla juyarishpa tandanajushcapimi, pinganayaita purinajun. Canguna tandanajushcapica, paicunallata michirinshnami, pitapash na pinganayachishpa micunajun. Paicunaca, yacu illaj fuyuta caiman chaiman huaira apajpishnami purinajun. Fucui punllacuna chayajpi na fucuj quiruta, ishcai viajeta chaquijpi sapindi llujchishpa shitashcashnami.

¹³Paicunapaj pinganayai rurashcacunaca, mama cucha yacuta huaira ninanda shitajujpi, yacu putsujuyajushcashnami. Paicunaca, caita chaita pandashpa purinajuj luzerocunashnami. Paicunapaca, yana yana tutapi causaita causangapaj richun alichishcallami ña tiajun.

¹⁴Enoc shuti runaca, Adán runapaj mirai sucta taitacunapaj jipa taitami cashca. Dios villashcata villashpami, yachachijcunamandapash cashna nishca: “Ricuichi, paipajlla causaj huaranga huaranga angelcunahuan, Mandaj Dios shamujujtami ricurcani.

¹⁵Paica, tucuicunata llaquichingapajmi shamurca. Diosta na manllaj runacuna, Diosta na manllashpa tucui nalita ruranajujta ricuchingapajmi shamurca. Juchata rurashpa causaj, Diosta na manllaj gentecuna shimi cacharishcata, paita fiñashpa rimanajushcata ricuchingapajmi shamunga” nishcami.

¹⁶Chai yachachijcunaca, huasha parlashpami nalicachishpa rimarinajun. Paicunapaj munaitalla rurashpami purinajun. Ninanda jariyashpami, cacharishcata rimanajun. Imatapash aliguta japingapajllami, pitapash cushi cushi rimanajun.

¹⁷Juyashca crijcuna, cangunaca ñucanchi Apunchi Jesucristo villachun cachashca runacuna punda villashca shimicunataca yaripanguichi.

¹⁸Paicunami, cangunaman cashna villanajurca: “Tucurimui punllacunapica, nalicachishpa asishpa ricujcunami tianga. Paicunaca, paicunapaj nali munaicunatalla rurashpami causanajunga” ninajurcami.

¹⁹Paicunami, crijcunataca shicanyachinajun. Imatapash nalitalla yarishpa causashpami, Diospaj Espiritutaca na charin.

²⁰Ashtahuangarin juyashca crijcuna, cangunaman juyailla crinata Dios caramushcataca, ashtahuan aliguta catipanguichi. Diospaj jucha illaj Espirituhuan causashpami, Diosta mañana canguichi.

²¹Taita Diospaj juyaitaca, na cunganachu canguichi. Causaita causagrinata ñucanchi Apunchi Jesucristo llaquishpa carana punllacaman shuyashpa causaichi.

²²Ishcai shungu tucushpa purijcunamambash, aliguta cringacaman yachachipaichi.

²³Ninapi rupangapaj rinajujcunataca, aisashpa ninamanda llujchipaichi. Shujcunatapash, manllaihuan llaquishpa charipaichi. Paicuna nali munaicunata rurashpa churajunata mapayachishcataca, millanayachinami canguichi.

²⁴Diosca ninan ushaitami charin. Paimi, ñucanchitaca ima nalipi urmachumbash, na saquishpa cuidajun. Shinami ñucanchitaca, ima mapapash illajta, pai punchapamba tiajuj ñaupajman ninanda cushijushpa pushanga.

²⁵Taita Diosca, ñucanchita Quishpichij, tucuita yachaj, shujlla Diosmi. Paitami cunambash, causaita causaicamambash punchapambagumi cangui. Mandana ushaita charij, tucuita rurai ushaj, tucuita mandajmari cangui ninami canchi. Shina cachun.