Read Imbabura Highland Quichua APOCALIPSIS 10 Bible Online

APOCALIPSIS 10 - Imbabura Highland Quichua bible

APOCALIPSIS 10

¹Chai jipaca, cashnatapashmi ricurcani. Shuj ninan shinlli angelmi, jahua pachamanda fuyupi pillurishca uriajumurca. Paipaj uma jahuapica, shuj cuichijmi ricurirca. Ñavipash, indishna punchapambami carca. Chaquipash, rupajuj ninashnami carca.

²Chai angelmi, uchilla libroguta pascashca charijurca. Ali lado chaquihuanga, mama cucha jahuapi, lluqui lado chaquihuanga, alpa jahuapimi shayajurca.

³Shina shayajushpami, león huacanshna ninanda caparijurca. Shina caparijujpimi, culun ninshna rimashcacuna canchiscaman uyarirca.

⁴Shina culun ninshna chai rimashcacuna canchiscaman uyarijpimi, escribingapaj munarcani. Ashtahuangarin jahua pachamandaca: “Chai canchiscaman culun ninshna rimashca uyarishcataca pacashpa, na escribinachu cangui” nijtami uyarcani.

⁵Shuj chaquihuanga, mama cucha jahuapi, shuj chaquihuanga, alpa jahuapi shayajujtami, angeltaca ricurcani. Chai angelmi, paipaj ali lado maquitaca, jahua pachaman ñapash vichai alsarca.

⁶Jahua pachata, cai pachata, mama cuchatapash, chaicunapi ima tiachumbash ruraj, causaita causaicaman causajuj Diospaj shutipimi, chai angelca juramentushpa, cashna nirca: “Cunanga, ña na ashtahuan shuyangachu.

⁷Ashtahuangarin suctapaj cati ángel trompetata huacachi callarijpimi, Taita Diosca chai pipash na yachanataca pactachinga. Chaitaca, paita servij, pai ima nishcata villajcunaman villashcashnallatami pactachinga” nircami.

⁸Jahua pachamanda rimajta ñuca uyashcallatami, cutin ñucata cashna nihuarca: “Ricui, chai mama cucha jahuapi, alpa jahuapi shayajuj ángel pascashca charijuj uchilla libroguta japingapaj ri” nihuarcami.

⁹Shina nijpi, angelpajman rishpaca: “Chai uchilla libroguta carahuai” nishpami mañarcani. Chashna nijpimi chai angelca, cashna nihuarca: “Jaica, micuilla. Cambaj shimipica, balun mishquishna mishqui mishquimi canga. Ashtahuangarin vijsapica, jayaj jayajmi tucunga” nihuarcami.

¹⁰Shina nijpimi chai angelpaj maquimandaca, uchilla libroguta japishpa micurcani. Ñuca shimipica balun mishquishna, mishqui mishquimi carca. Micushca jipa ñuca vijsapica, jayaj jayajmi tucurca.

¹¹Chai jipami chai angelca, cashna nihuarca: “Ashtaca gentecuna, ashtaca llactacuna, shuj shuj shimita parlajcuna, jatun mandajcuna ima tucunatapash Dios villashcataca, cutin villagrinapachami cangui” nihuarcami.