Read Imbabura Highland Quichua APOCALIPSIS 12 Bible Online

APOCALIPSIS 12 - Imbabura Highland Quichua bible

APOCALIPSIS 12

¹Chai jipallami, jahua pachapica shuj juyaillagupacha ricurirca: Indita churajushca huarmimi, lunata sarushpa shayajurca. Umapipash, chunga ishcai luzerocunahuan coronata churajushcami carca.

²Chai huarmica, vijsayu cashpa unguna pactajpi ña ungugrijushpami, nanaihuan ninanda caparijurca.

³Shinallata shuj ricuchinapashmi, jahua pachapica ricurirca: Dragón nishca yana puca, canchis umata, chunga cachuta charij, jatun animaltami ñapash ricurcani. Chai umacunapica, canchis diadema nishcata churajushcami carca.

⁴Chai dragonga, quimsata chaupishpa churashca chai quimsamanda shuj chaupi luzerocunatami, paipaj chupahuan aisashpa, jahua pachamanda cai pachaman urmachirca. Chai dragonga, huahuata ungujhuan micungapajmi, ungunalla huarmipaj ñaupajpi shayajurca.

⁵Chai huarmica, jari huahuatami ungurca. Chai huahuami, cai pachapi tucui causajcunataca, jirru varahuan mandajunga. Chai huahuataca, mandangapaj tiarinapi tiajuj Taita Diospajmanmi aparca.

⁶Chai huarmica, Taita Dios alichishca charijuj jichushca pambapi pacajungapajmi rirca. Chaipimi, shuj huaranga ishcai patsaj sucta punllacaman micunata carana carca.

⁷Chai jipallami, jahua pachapica jatun macanajui tiarca. Miguel shuti angelca, paipaj angelcunadimi, dragonhuan macanajurca. Shinallatami dragonbash, paipaj angelcunandi macanajurca.

⁸Shina macanajushpapash, chai dragonga na unaicaman macanajui usharcachu. Jahua pachapipash, paicuna causanaca na tiarcachu.

⁹Chai dragonga, jahua pachamandami shitai tucurca. Paica, pundamandapacha causajuj culebrami. Paillatami, diablo shutipash, Satanás shutipash. Paica, tucui cai pachapi causajcunatami umachin. Paica, paipaj angelcunandimi, alpaman shitai tucurca.

¹⁰Chai jipami, cashna nishpa jahua pachapi ninanda caparijta uyarcani: “Cunanmari, ñucanchita quishpichina punlla chayamushca. Ñucanchi Taita Diosca, ninan ushaita charishpa, mandajushcatami ricuchimushca. Pai caramushca Quishpichij Cristo mandajujtapash, ñamari ricuchimushca. Ñucanchi Taita Diospaj ñaupajpi tutapash, punllapash ñucanchi huauquicunata juchachijca, jahua pachamandami shitai tucurca.

¹¹Chai huauquicunaca, yahuarta Llama jichashpa huañushcamanda, Diospaj Shimita villashcamandami, diablotaca mishashca. Huañuchina cajpipash, huañunataca na manllarcachu.

¹²Chaimandami jahua pachapash, chaipi causajcunapash, cushijuna canguichi. Alpapi causajcuna, mama cuchapi causajcunapash, ¡aij imachari tucunguichi! Diabloca, punllacuna tucurijujta yachashpami, ninanda fiñarishpa cangunapajman uriajumurca” ninajujtami uyarcani.

¹³Chai dragonga, alpaman ña shitai tucushca cashpami, jari huahuata ungushca huarmitaca huañuchingapaj catijurca.

¹⁴Shina catijujpimi, jatun angapaj ishcai alasta chai huarmiman curca. Chai alascunata cujpimi, chai culebrapaj ladomandaca, paipaj pushtu jichushca pambaman rirca. Chai pambapimi, quimsa huata chaupicaman micunata Dios carajpi, chai huarmica causajurca.

¹⁵Chai culebrami, paipaj shimimandaca, chai huarmita apachun jatun larca yacutashna shitarca.

¹⁶Ashtahuangarin chai dragonbaj shimimanda shitashca yacutaca, alpa pascarishpami langarca. Shina langashpami, chai huarmitaca quishpichirca.

¹⁷Chaimandami dragonga, chai huarmitaca ninanda fiñarca. Chashna fiñashpami, chai huarmipaj miraipura quedashca gentecunahuan macanajugrirca. Paicunaca, Taita Dios mandashca shimicunata aliguta cazuj, Jesucristo villashcatapash, aligutami catinajun.